କରାଚି,୨୧।୧୨(ପି.ଟି.): ଅଷ୍ଟ୍ରେଲିଆ ବିପକ୍ଷ ପ୍ରଥମ ଟେଷ୍ଟର ଦ୍ୱିତୀୟ ଇନିଂସରେ ଭାରତ ମାତ୍ର ୩୬ ରନ କରି ଅଲଆଉଟ ହେବା ପରେ ବିଶ୍ୱବ୍ୟାପୀ କ୍ରିକେଟ ଜଗତର ଜଣାଶୁଣା ଖେଳାଳିମାନେ ପ୍ରତିକ୍ରିୟା ପ୍ରକାଶ କରିଛନ୍ତି। ପାକିସ୍ତାନ ପୂର୍ବତନ କ୍ରିକେଟର ଜାଭେଦ ମିଆଁଦାଦ, ମହସୀନ ଖାଁ ଓ ସୋଏବ ଅଖତାର ଏଥିରେ ଚକିତ ହୋଇଛନ୍ତି।
ଭାରତ ଏହି ବ୍ୟାଟିଂ ବିପର୍ଯ୍ୟୟକୁ ବିଶ୍ୱାସ କରିପାରୁନାହିଁ ବୋଲି ମହସିକ କହିଛନ୍ତି। ପିଚି ଓ ଉଇକେଟରେ କୌଣସି ତ୍ରୁଟି ନ ଥିଲା। ଅଷ୍ଟ୍ରେଲିଆ ଦ୍ରୁତ ବୋଲରଙ୍କୁ କିଭଳି ସାମ୍ନା କରାଯିବ ସେ ନେଇ ଭାରତୀୟ ବ୍ୟାଟ୍ସମ୍ୟାନମାନେ ସନ୍ଦୀହାନ ଥିଲେ ଓ ବ୍ୟାଟିଂ କରିବାରେ ସେତେଟା ଉତ୍ସାହ ପ୍ରକଟ କରି ନ ଥିଲେ। ତେବେ ଏହା ଟେଷ୍ଟ କ୍ରିକେଟର ସୌନ୍ଦର୍ଯ୍ୟ ବଢାଇଛି ବୋଲି ସେ କହିଚନ୍ତି।
ସେହିପରି ୨୦୦୨ରେ ଅଷ୍ଟ୍ରେଲିଆ ଗସ୍ତରେ ଯାଇ ପାକିସ୍ତାନ ଦୁଇଥର ୫୯ ଓ ୫୩ ରନରେ ଅଲଆଉଟ ହୋଇଥିଲେ ବୋଲି ପୂର୍ବତନ ପାକିସ୍ତାନ ଅଧିନାୟକ ରସିଦ ଲତିଫ କହିଛନ୍ତି। ବୋଲରମାନେ ଠିକ୍ ସ୍ଥାନରେ ଶତପ୍ରତିଶତ ବଲ୍ ପକାଇଲେ ଏପରି ସ୍ଥିତି ସୃଷ୍ଟି ହୋଇଥାଏ ଓ ବଲ ବ୍ୟାଟର ଏଜ୍ ନେଇ ସିଧା ଫିଲ୍ଡରଙ୍କ ହାତକୁ ଯାଇଥାଏ ବୋଲି ସେ କହିଛନ୍ତି। ଅଷ୍ଟ୍ରେଲୀୟ ବୋଲରଙ୍କୁ ଆକ୍ରମଣ କରି ପ୍ରଭାବ ବିସ୍ତାର କରିବାକୁ ଭାରତୀୟ ବ୍ୟାଟ୍ସମ୍ୟାନ ପ୍ରୟାସ କରିଥିଲେ। ଏହାଦ୍ୱାରା ବିପର୍ଯ୍ୟୟ ସୃଷ୍ଟି ହୋଇଥିଲା। ପ୍ରଥମ ଦୁଇ ଦିନ ପରେ ପିଚ୍ର ପରିବର୍ତ୍ତନ ହୋଇଥିଲା ବୋଲି ସେ କହିଛନ୍ତି। ପ୍ରଥମ ଇନିଂସରେ ବିରାଟ କୋହଲି ଜବରଦସ୍ତ ପାଳି ଖେଳିଥିଲେ ମଧ୍ୟ ଦ୍ୱିତୀୟ ଇନିଂସରେ ସେ ବିଫଳ ହୋଇଥିଲେ ବୋଲି ଲତିଫ୍ କହିଛନ୍ତି। ଏହା କୋହଲିଙ୍କ ପାଇଁ ଏକ ଦୁଃସ୍ବପ୍ନ ସଦୃଶ ହୋଇଛି।
ସେହପରି ଭାରତର ଏଭଳି ବିପର୍ଯ୍ୟୟ ବିଶ୍ୱାସ କରିହେଉନି ବୋଲି ଅଖତାର କହିଛନ୍ତି। ଭାରତୀୟ ବ୍ୟାଟ୍ସମ୍ୟାନ ସକାରାତ୍ମକ ପ୍ରଦର୍ଶନ କରିପାରି ନ ଥିଲେ। ଫୁଟ୍ ମୁଭ୍ମେଣ୍ଟ ଓ ଟେକ୍ନିକକୁ ସେ ସମାଲୋଚନା କରିଛନ୍ତି। ବୋଲରଙ୍କ ସିମ୍ ଓ ସୁଇଙ୍ଗ୍କୁ ବୁଝିବାରେ ଭାରତୀୟ ବ୍ୟାଟ୍ସମ୍ୟାନ ବିଫଳ ହୋଇଥିଲେ। ସେହିପରି ଅଷ୍ଟ୍ରେଲିଆ ବୋଲରମାନେ ଉଚ୍ଚକୋଟୀର ପ୍ରଦର୍ଶନ କରିଥିଲେ ଓ ସେମାନଙ୍କ ବଲ୍ ଖେଳିବା ନିଶ୍ଚିତ ଭାବେ କଷ୍ଟକର ଥିଲା। ତେବେ ଏଭଳି ଆତ୍ମସମର୍ପଣ ଅବିଶ୍ୱସନୀୟ ବୋଲି ପୂର୍ବତନ ଅଧିନାୟକ ଜାଭେଦ ମିଆଁଦାଦ କହିଛନ୍ତି।
