ନବରଙ୍ଗପୁର,୩୦ା୮(ସଦାଶିବ ପ୍ରହରାଜ): ପୂର୍ବତନ ମନ୍ତ୍ରୀ ଡମ୍ବରୁଧର ମାଝୀ (୮୭)ଙ୍କ ରବିବାର ସକାଳ ପ୍ରାୟ ୫ଟା ସମୟରେ ତାଙ୍କର ଦେହାନ୍ତ ହୋଇଛି । ଚିକିତ୍ସାଧୀନ ଅବସ୍ଥାରେ ସେ ଶେଷ ନିଶ୍ବାସ ତ୍ୟାଗ କରିଛନ୍ତି । କିଛିଦିନ ଧରି ସେ ଅସୁସ୍ଥ ଥିବାବେଳେ ନବରଙ୍ଗପୁର ଜିଲା ସଦର ମହକୁମା ଡାକ୍ତରଖାନାର ଆଇସିୟୁରେ ଚିକିତ୍ସାଧୀନ ଥିଲେ ।
ତାଙ୍କ ବିୟୋଗରେ ଜିଲାର ରାଜନୈତିକ ଓ ସାମାଜିକ ମହଲରେ ଶୋକର ଛାୟା ଖେଳିଯାଇଛି । ପ୍ରଶାସନ ପକ୍ଷରୁ ଗାର୍ଡ଼ ଅଫ ଅନର ପରେ ତାଙ୍କ ପୈତୃକ ଗାଁ ତେନ୍ତୁଳୀଖୁଣ୍ଟି ବ୍ଲକ ଚିତ୍ରୋକୋଟ ଠାରେ ଶେଷ କୃତ୍ୟ ସମ୍ପନ୍ନ କରାଯିବ । ଡମ୍ବରୁଧର ମାଝୀ ନବରଙ୍ଗପୁର ଜିଲା ରାଜନୀତିର ଜଣେ ପରିଚିତ ଓ ପ୍ରଭାବଶାଳୀ ବ୍ୟକ୍ତିତ୍ୱ ଥିଲେ । ୧୯୬୬ ମସିହାରେ କଟକ ଉତ୍କଳ ବିଶ୍ୱବିଦ୍ୟାଳୟରୁ ଏଲ୍ଏଲ୍ବି ଶିକ୍ଷା ଶେଷ କରିବା ପରେ ୧୯୬୭ରେ ସେ ସକ୍ରିୟ ରାଜନୀତିରେ ପାଦ ଥାପିଥିଲେ । ଚତୁର୍ଥ ବିଧାନସଭା (୧୯୬୭-୧୯୭୧) ଡାବୁଗାଁ ନିର୍ବାଚନ ମଣ୍ଡଳୀରୁ ସ୍ୱତନ୍ତ୍ର ଦଳ ପ୍ରାଥୀ ଭାବେ ନିର୍ବାଚିନ ଲଢ଼ି ବିଜୟୀ ହୋଇଥିଲେ । ପଞ୍ଚମ ବିଧାନସଭା (୧୯୭୧-୧୯୭୩) ଡାବୁଗାଁ ନିର୍ବାଚନମଣ୍ଡଳୀରୁ କଂଗ୍ରେସ ଦଳରୁ ବିଧାୟକ ଭାବେ ନିର୍ବାଚିତ ।
ସପ୍ତମ ବିଧାନସଭା (୧୯୭୭-୧୯୮୦) କୋଡିଙ୍ଗା ନିର୍ବାଚନମଣ୍ଡଳୀରୁ ନିର୍ବାଚିତ । ଅଷ୍ଟମ ବିଧାନସଭା (୧୯୮୦-୧୯୮୫)କୋଡିଙ୍ଗା ନିର୍ବାଚନମଣ୍ଡଳୀରୁ ନିର୍ବାଚିତ ହୋଇଥିଲେ । ୯ମ ବିଧାନସଭା (୧୯୮୫-୧୯୯୦)ଡାବୁଗାଁରୁ ନିର୍ବାଚିତ ହୋଇଥିଲେ । ପୂର୍ବତନ ମୁଖ୍ୟମନ୍ତ୍ରୀ ନନ୍ଦିନୀ ଶତପଥୀଙ୍କ ତତ୍ତ୍ୱାବଧାନରେ ସେ କଂଗ୍ରେସରେ ଯୋଗଦେଇଥିଲେ । ୨୦୦୯ରେ ବିଜେଡିରେ ଯୋଗ ଦେଇ ନବରଙ୍ଗପୁର ନିର୍ବାଚନ ମଣ୍ଡଳୀ ଏମପି ପ୍ରାର୍ଥୀ ହୋଇ ପରାଜୟ ହୋଇଥିଲେ । ୨୦୧୮ରେ ପୁଣି ସେ ଭାଜପାରେ ଯୋଗ ଦେଇଥିଲେ । ୧୯୭୦-୭୧ରେ ସେ କୃଷି, ସମବାୟ, ବାଣିଜ୍ୟ ଓ ପରିବହନ ବିଭାଗର ଉପମନ୍ତ୍ରୀ ଭାବେ ଦାୟିତ୍ୱ ନିର୍ବାହ କରିଥିଲେ । କଂଗ୍ରେସ ସମୟରେ ନନ୍ଦିନୀ ଶତପଥୀଙ୍କ ମୁଖ୍ୟମନ୍ତ୍ରୀ ସମୟରେ ମାଝୀ ଜଳ ସମ୍ପଦ ଓ ଶକ୍ତି, ହେମାନନ୍ଦ ବିଶ୍ୱାଳଙ୍କ ସମୟରେ ଆଦିବାସୀ କଲ୍ୟାଣ, ମନ୍ତ୍ରୀ ରହିଥିଲେ ।
ସେ ବିଧାୟକ ଥିବା ସମୟରେ ନବରଙ୍ଗପୁର କଲେଜ, ଡାବୁଗାଁ ଭୈରବୀ ମହାବିଦ୍ୟାଳୟ, ଡାବୁଗାଁ ଗୌରୀ ଦେବି ବାଳିକା ଉଚ୍ଚ ବିଦ୍ୟାଳୟ ପ୍ରତିଷ୍ଠାରେ ତାଙ୍କର ସକ୍ରିୟ ଭୂମିକା ରହିଥିଲା । ନବରଙ୍ଗପୁର ଇନ୍ଦ୍ରାବତୀ ପୋଲ ନିର୍ମାଣ ତାଙ୍କ ସମୟରେ ହୋଇଥିଲା । ତେବେ କଂଗ୍ରେସ ରାଜନୀତିରେ ଜାନକୀ ବଲ୍ଲଭ ପଟ୍ଟନାୟକ ଓ ହେମାନନ୍ଦ ବିଶ୍ୱାଳଙ୍କ ଦୁଇ ଗୋଷ୍ଠୀ ମଧ୍ୟରୁ ହେମାନନ୍ଦ ବିଶ୍ୱାଳଙ୍କ ସହ ଡମ୍ବରୁଧର ମାଝୀଙ୍କ ଘନିଷ୍ଠତା ରହିଥିଲା। ଦୀର୍ଘ ରାଜନୈତିକ ଜୀବନରେ ଜନସାଧାରଣଙ୍କ ସହ ତାଙ୍କର ନିବିଡ଼ ସମ୍ପର୍କ ରହିଥିଲା। ତାଙ୍କ ବିୟୋଗ ନବରଙ୍ଗପୁର ରାଜନୀତି ପାଇଁ ଏକ ଅପୂରଣୀୟ କ୍ଷତି ଘଟିଛି । ବିଭିନ୍ନ ମହଲରେ ଶୋକପ୍ରକାଶ କରାଯାଇଛି । ବିୟୋଗ ସମୟରେ ଝିଅ, ଜ୍ୱାଇଁ ଛତିଶଗଡ଼ର ପୂର୍ବତନ ମନ୍ତ୍ରୀ ଶୁଭୟୁ କଷ୍ୟପ, ସୋନପୁର ଅତିରିକ୍ତ ଜିଲାପାଳ ରାଜେନ୍ଦ୍ର ମାଝୀ,ପରିବାର ବର୍ଗ ଉପସ୍ଥିତ ଥିଲେ । ନବରଙ୍ଗପୁର ଜିଲାପରିଷଦ ମୁଖ୍ୟ ଉନ୍ନୟନ ଅଧିକାରୀ ବିରଞ୍ଚି ନାରାୟଣ ଦାରା୍ୱାନ, ତେନ୍ତୁଳୀଖୁଣ୍ଟି ବି ଦି ଓ ମନୋଜ କୁମାର ପାଣିଗ୍ରାହୀ,
ଏସ ଡି ପି ଓ କୃଷ୍ଣ ଚନ୍ଦ୍ର ଭତ୍ରା, ପୂର୍ବତନ ଏମ ପି ପର୍ଶୁରାମ ମାଝୀ, ନବରଙ୍ଗପୁର ବିଧାୟକ ତଥା ଜିଲା ଯୋଜନା କମିଟି ଅଧ୍ୟକ୍ଷ ଗୌରୀ ଶଙ୍କର ମାଝୀ, ବରିଷ୍ଠ କଂଗ୍ରେସ ନେତା ମୁନା ତ୍ରିପାଠୀ, ଚନ୍ଦ୍ର ଧ୍ବଜ ମାଝୀ ସମେତ ଜିଲ୍ଲାର ବହୁ ରାଜନେତା ଓ ମାନ୍ୟ ଗଣ୍ୟ ବ୍ୟକ୍ତି ଉପସ୍ଥିତ ରହି ଶୋକ ସନ୍ତପ୍ତ ପାରିବାରକୁ ସମବେଦନା ଜଣାଇବା ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ ।
