ଅନୁଗୋଳ ଅଫିସ, ୧୨ ।୩
କଳା, ସଂସ୍କୃତି, ଐତିହ୍ୟ ଏବଂ ଲୋକକଳାର ପ୍ରଚାରପ୍ରସାର ଉଦ୍ଦେଶ୍ୟରେ ଅନୁଗୋଳ ଜିଲାରେ ଆୟୋଜିତ ହେବାକୁ ଯାଉଛି ୯ମ ଜିଲା ମହୋତ୍ସବ। ୫ଦିନ ବ୍ୟାପୀ ହେବାକୁ ଥିବା ଏହି କାର୍ଯ୍ୟକ୍ରମ ଲାଗି ବିଧିବଦ୍ଧ ଭାବେ ଦିନ ଧାର୍ଯ୍ୟ ହୋଇ ନ ଥିଲେ ମଧ୍ୟ ପ୍ରଶାସନିକ ପ୍ରସ୍ତୁତି ଆରମ୍ଭ ହୋଇଛି। ଏ ନେଇ ଶୁକ୍ରବାର ଜିଲା କାର୍ଯ୍ୟାଳୟ ସମ୍ମିଳନୀ କକ୍ଷରେ ଅତିରିକ୍ତ ଜିଲାପାଳ (ରାଜସ୍ବ) ସନ୍ତୋଷ କୁମାର ପ୍ରଧାନଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଯାଇଛି। ପୂର୍ବବର୍ଷ ଭଳି ପାଲଲହଡାର ଖୁଲୁଡି, ଆଠମଲ୍ଲିକର ଦେଉଳଝରି, ଟିକରପଡା ଶିବ ମନ୍ଦିର ସହ ଛେଣ୍ଡିପଦାର ଅଧିଷ୍ଠାତ୍ରୀ ଦେବୀ ମା’ ବାୟାଣୀଙ୍କ ପୀଠରୁ ପ୍ରଥମଥର ମଶାଲ ଶୋଭାଯାତ୍ରା ବାହାରିବ। ମଶାଲ ଶୋଭାଯାତ୍ରାରେ ବିଭିନ୍ନ ସରକାରୀ ଯୋଜନା ସମ୍ପର୍କିତ ସଚେତନତା ସୃଷ୍ଟି ଲାଗି ପ୍ରଜ୍ଞାପନ ରଥ ପରିକ୍ରମା କରିବ। ଚଳିତ ବର୍ଷ ମଧ୍ୟ ବ୍ଲକସ୍ତରୀୟ, ଏନ୍ଏସିସ୍ତରୀୟ ମହୋତ୍ସବ କରାଯାଇ ଶ୍ରେଷ୍ଠ ଦଳକୁ ଜିଲା ମହୋତ୍ସବରେ ଅଂଶଗ୍ରହଣ ନିମନ୍ତେ ଚୟନ କରାଯିବ। ଏହି ଅବସରରେ ୫ଦିନ ବ୍ୟାପୀ ପଲ୍ଲିଶ୍ରୀ ମେଳା, ଜିଲା ଉନ୍ନୟନ ପ୍ରଦର୍ଶନୀ ମଧ୍ୟ ଆୟୋଜିତ ହେବ। ମହୋତ୍ସବର ପ୍ରଥମ ୩ଦିନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯିବ। ବାଲୁକା କଳା, ଯୋଗ, ପ୍ରାଣାୟମ, ସାହିତ୍ୟ ମହୋତ୍ସବ, ଚିତ୍ରକଳା ଏବଂ ଅନୁଗୋଳ ଗୌରବ ସମ୍ମାନ ପାଇଁ ବିଭିନ୍ନ କମିଟି ଗଠନ ହେବ।
ମହୋତ୍ସବ ସୁପରିଚାଳନା ଏବଂ ଶାନ୍ତିଶୃଙ୍ଖଳା ରକ୍ଷା ଲାଗି ଅଗ୍ନିଶମ ବାହିନୀ, ସ୍ବାସ୍ଥ୍ୟ ସେବା ଦଳ, ପୋଲିସ ମୁତୟନ ହେବେ। ପାନୀୟ ଜଳ, ଅସ୍ଥାୟୀ ଶୌଚାଳୟ ବ୍ୟବସ୍ଥା କରାଯିବ। ପରିଚାଳନା କମିଟି, କଳାକାରଙ୍କ ଖାଦ୍ୟପେୟ, ରହଣି, ଯାତାୟାତ ସୁବିଧା ସମ୍ପର୍କରେ ବୈଠକରେ ଆଲୋଚନା ହୋଇଛି। ଜିଲାପାଳଙ୍କ ଅଧ୍ୟକ୍ଷତାରେ ଆୟୋଜିତ ପରବର୍ତ୍ତୀ ବୈଠକରେ ସମସ୍ତଙ୍କ ମତାମତକୁ ନେଇ ଜିଲା ମହୋତ୍ସବ ଏବଂ ମଶାଲ ଶୋଭାଯାତ୍ରା ଲାଗି ଦିନ ଧାର୍ଯ୍ୟ କରାଯିବ ବୋଲି ନିଷ୍ପତ୍ତି ହୋଇଛି।
ଅନ୍ୟମାନଙ୍କ ମଧ୍ୟରେ ଅତିରିକ୍ତ ଜିଲାପାଳ ରଜନୀକାନ୍ତ ସ୍ବାଇଁ, ଅନୁଗୋଳ ଉପଜିଲାପାଳ ବାସୁଦେବ ଶତପଥୀ, ଜିଲା ସଂସ୍କୃତି ଅଧିକାରୀ ଦୁଃଶାସନ ନାୟକଙ୍କ ସମେତ ଜିଲା ସଂସ୍କୃତି ପରିଷଦର ସଦସ୍ୟମାନେ ଯୋଗ ଦେଇଥିଲେ। ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ଦିଲୀପ ସାହୁ ଧନ୍ୟବାଦ ଦେଇଥିଲେ।
