ଯାଜପୁର ସଦର,୨୬।୨(ଡି.ଏନ.ଏ.): ଯାଜପୁର ତହସିଲ ଅନ୍ତର୍ଗତ ଯାଜପୁର ସହର ଭିତରେ ଏକ ଫ୍ଲାଏ ଆଶ୍ ଇଟା କାରଖାନା ଚାଲିଛି। ଏହି କାରଖାନାରେ ନମ୍ବର ବିହୀନ ଗାଡ଼ିଗୁଡ଼ିକୁ ଇଟା ପରିବହନ କାର୍ଯ୍ୟରେ ନିୟୋଜିତ କରାଯାଇଛି। ଏଥିସହିତ ଇଟା ଅନ୍ଲୋଡିଂ ପାଇଁ ଶିଶୁ ଶ୍ରମିକମାନଙ୍କୁ ନିୟୋଜିତ କରାଯାଉଛି। ସହର ଭିତରେ ଶିଶୁ ଶ୍ରମିକମାନଙ୍କୁ ନେଇ ଇଟା ପରିବହନ ପୋଲିସ୍ ଜାଣତରେ ହେଉଛି। ଏହାବାଦ କାରଖାନାରୁ ବାହାରୁଥିବା ଧୂଆଁ, ଇଟା ତିଆରି ମେଶିନର ଶବ୍ଦରେ ଜନ ସାଧାରଣ ଅତିଷ୍ଠ ହେଉଥିବା ଅଭିଯୋଗ ହେଉଛି। ସହର ଭିତରେ ଇଟା କାରଖାନାକୁ କିପରି ଅନୁମତି ମିଳିଲା ତାହା ପ୍ରଶ୍ନବାଚୀ ସୃଷ୍ଟି କରିଛି। ଗୁରୁବାର ଅପରାହ୍ନରେ ଏହି କାରଖାନାରୁ ୨ଟି ନମ୍ବର ବିହୀନ ଟ୍ରାକ୍ଟର ମାଧ୍ୟମରେ ଇଟା ବୋଝେଇ ହୋଇ ଯାଉଥିବା ବେଳେ ରାସ୍ତାରେ ଓଲଟି ପଡ଼ିଥିଲା। ଟ୍ରାକ୍ଟର ଉପରେ ବସି ଇଟା ଖଲାସ୍ କରିବାକୁ ଯାଉଥିବା ୨ଜଣ ନାବାଳିକା ଶ୍ରମିକ ଗୁରୁତର ଆହତ ହୋଇ ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଛନ୍ତି। ଜଣକ ହାତରେ ଗଭୀର ଆଘାତ ଲାଗିଛି ଓ ଅନ୍ୟ ଜଣେ ଘରକୁ ଫେରି ଯାଇଥିବା ଜଣାପଡ଼ିଛି। ଦୁର୍ଘଟଣା ପରେ ୧ଘଣ୍ଟା ପର୍ଯ୍ୟନ୍ତ ୨୦ନମ୍ବର ଜାତୀୟ ରାଜପଥ ଅବରୋଧ ହୋଇଥିଲାବେଳେ ଯାଜପୁର ପୋଲିସ୍ ଘଟଣାସ୍ଥଳରେ ପହଞ୍ଚି ନମ୍ବର ବିହୀନ ଟ୍ରାକ୍ଟରକୁ ଜବତ କରି ଯାତାୟାତକୁ ସ୍ବାଭାବିକ କରିଥିଲା। ପ୍ରଶାସନ ଆଖି ଆଗରେ ଶିଶୁ ଶ୍ରମିକ ବିପଦପୂର୍ଣ୍ଣ ଭାବେ ଖଟୁଥିବାରୁ ସଚେତନ ନାଗରିକମାନେ କ୍ଷୋଭ ପ୍ରକାଶ କରୁଛନ୍ତି। ଘଟଣା ସମ୍ପର୍କରେ ସ୍ଥାନୀୟ ମହାବୀରନଗର ବାସିନ୍ଦା ଶିଶୁ ସୁରକ୍ଷା ଅଧିକାରୀ ନିରଞ୍ଜନ କରଙ୍କୁ ଅବଗତ କରିବା ସହ ବେଆଇନ୍ କାର୍ଯ୍ୟ ସମ୍ପର୍କରେ ଟାଉନ୍ ଥାନାରେ ଲିଖିତ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ(ଏସ୍ପିସିବି) କଳିଙ୍ଗନଗର ଆଞ୍ଚଳିକ ଅଧିକାରୀ ପ୍ରମୋଦ କୁମାର ବେହେରାଙ୍କୁ ପଚାରିବାରେ ସେ କହିଛନ୍ତି ଇଟାଭାଟି ଅନୁମତି ତାଙ୍କ ପରିସର ବାହାରେ। ଯଦି ଏଥିପାଇଁ ପ୍ରଦୂଷଣ ହେଉଛି ତେବେ ବିଭାଗ ପକ୍ଷରୁ ନିଶ୍ଚିତ ଭାବେ ପଦକ୍ଷେପ ଗ୍ରହଣ କରାଯିବ।
