ପାରଳାଖେମୁଣ୍ଡି,୩ା୨(ଡି.ଏନ୍.ଏ.): ଗଜପତି ଜିଲା ଗୋଷାଣୀ ବ୍ଲକ ଗୁରାଣ୍ଡି ପଞ୍ଚାୟତରେ ସରପଞ୍ଚ ପଦବୀ ପାଇଁ ଆଈ-ନାତୁଣୀଙ୍କ ମଧ୍ୟରେ ଲଢ଼େଇ ହେଉଛି। ଆଈ ମନୋରମା ଜେନା ଏବଂ ନାତୁଣୀ ଶିଳ୍ପା ପାତ୍ର ଉଭୟେ ନିଜ ନିଜ ଢଙ୍ଗରେ ନିର୍ବାଚନୀ ପ୍ରଚାର ଆରମ୍ଭ କରିଛନ୍ତି।
ଗୁରାଣ୍ଡି ପଞ୍ଚାୟତରେ ସରପଞ୍ଚ ପଦବୀ ଲାଗି କେବଳ ଏହି ଦୁଇ ଜଣ ପ୍ରାର୍ଥୀ ହୋଇଛନ୍ତି। ଆଈ-ନାତୁଣୀ ଭିନ୍ନ ଭିନ୍ନ ଦଳରୁ ସମର୍ଥନ ପାଇ ନିର୍ବାଚନ ରଣାଙ୍ଗନରେ ବାଜି ମାରିବାକୁ ଚେଷ୍ଟା କରୁଛନ୍ତି। ପଞ୍ଚାୟତ ପାଇଁ ଏହି ପରିବାରର ବହୁତ ଅବଦାନ ରହିଛି। ମୁଖ୍ୟତଃ ଗୁରାଣ୍ଡି ଗ୍ରାମରେ କଲେଜ, ଚିକିତ୍ସାଳୟ ଆଦି ପାଇଁ ଭୂମି ଦାନ କରିଥିବା ନଜିର ରହିଛି। ଗୋଟିଏ ଗାଁ ଗୁରାଣ୍ଡିକୁ ନେଇ ଗଠିତ ଗୁରାଣ୍ଡି ପଞ୍ଚାୟତ। ପଞ୍ଚାୟତରେ ମୋଟ ୪,୨୦୦ ଭୋଟର ଅଛନ୍ତି। ପାରଳାଖେମୁଣ୍ଡି ନିର୍ବାଚନ ମଣ୍ଡଳୀ ଇତିହାସରେ ଗୁରାଣ୍ଡି ପଞ୍ଚାୟତ ସବୁବେଳେ ଚର୍ଚ୍ଚାରେ ରହିଆସିଛି। ଏହି ପଞ୍ଚାୟତରୁ ବିଧାୟକ, ବ୍ଲକ ଅଧ୍ୟକ୍ଷ ପ୍ରାର୍ଥୀ ହୋଇ ଆସିଛନ୍ତି। ତେବେ ସରପଞ୍ଚ ପଦବୀ ଲାଗି ଦୁଇ ସମ୍ପର୍କୀୟଙ୍କ ମଧ୍ୟରେ ମୁହାଁମୁହିଁ ଲଢ଼େଇ ହେଉଥିବାରୁ ଗୁରାଣ୍ଡି ପଞ୍ଚାୟତ ଉପରେ ସମସ୍ତଙ୍କ ନଜର ରହିଛି।
