ଅତାବିରା,୨୫ା୬(ଯୁଧିଷ୍ଠିର ମହାପାତ୍ର): ରବି ଫସଲ ଧାନ କିଣାବିକା ପ୍ରକ୍ରିୟା ଆଉ ମାତ୍ର ୫ ଦିନ ପରେ ଅର୍ଥାତ୍ ଜୁନ ୩୦ ତାରିଖ ଶେଷ ହେବାକୁ ଯାଉଛି । ହେଲେ ଅତାବିରା ନିୟନ୍ତ୍ରିତ ବଜାର କମିଟି ଅଧୀନରେ ଏବେ ବି ହଜାର ହଜାର ପ୍ୟାକେଟ ଧାନ ବିକ୍ରି ଅପେକ୍ଷାରେ ପଡ଼ି ରହିଛି । ଏହି ପରିପ୍ରେକ୍ଷୀରେ ଅତାବିରା ଜୟ କିଷାନ ଆନ୍ଦୋଳନ କୃଷକ ସଂଗଠନର ସଦସ୍ୟମାନେ ବିକ୍ରି କରି ପାରିନଥିବା ଚାଷୀମାନଙ୍କ ସହ ଧାରଣାରେ ବସିଛନ୍ତି ।
ଜମି ତୁଳନାରେ ଚାଷୀଙ୍କ ସମସ୍ତ ଟୋକନ ପ୍ରଦାନ କରିବା, ଫଲ୍ସ ଏଣ୍ଟ୍ରି କରି ବାହାରେ ବେପାରୀଙ୍କ ଧାନ ବିକ୍ରି, ପ୍ରକୃତରେ ଯେଉଁ ଚାଷୀ ମଣ୍ଡିରେ ବିନା କଟନୀ ଛଟଣୀ ଧାନ ବିକ୍ରି କରିବାକୁ ଅପେକ୍ଷା କରିଛନ୍ତି ସେମାନଙ୍କ ଧାନ ଉଠାଇବାକୁ ଦାବି କରି ଧାରଣାରେ ବସିଛନ୍ତି । ସଂଗଠନର ସଭାପତି ଭଞ୍ଜନ ବାରିକ, ସମ୍ପାଦକ ଜିତୁ ବେହେରା, ବୟୋଜେଷ୍ଠ ଚାଷୀ ଉପଦେଷ୍ଟା ବିରଞ୍ଚି ମହାକୁର, ଶେଷଦେବ ଭୋଇ, ପାଣ୍ଡଵ ପ୍ରଧାନଙ୍କ ସମେତ ବହୁ ଚାଷୀ ଧାରଣାରେ କାର୍ଯ୍ୟାଳୟ ଗେଟ ବନ୍ଦ କରି ଧାରଣାରେ ବସିଛନ୍ତି ।
ମାର୍କେଟ ଦାୟିତ୍ୱରେ ଥିବା ଅତିରିକ୍ତ ତହସିଲଦାର ଅଙ୍କିତ ପଣ୍ଡା ଏବଂ ମାର୍କେଟ ଇନଚାର୍ଜ ଅଜୟ ବେହେରା ଧାରଣାରତ ଚାଷୀଙ୍କ ସହ ଆଲୋଚନା କରିଥିଲେ । ତେବେ ଆଲୋଚନା ବିଫଳ ହେବାରୁ ଧାରଣା ଜାରି ରହିଛି ।
