କୋଲକାତା,୯ା୮: ପଶ୍ଚିମବଙ୍ଗର ହାଲିସହରରେ ତୃଣମୂଳ କଂଗ୍ରେସର ଜଣେ ମୃତ କର୍ମୀଙ୍କ ପରିବାରକୁ ଭେଟିବାକୁ ଯାଇଥିବା ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଜୋରଦାର ବିରୋଧର ସାମ୍ନା କରିବାକୁ ପଡ଼ିଛି । ତାଙ୍କ କାରକୁ ରାସ୍ତାରେ ଅଟକାଇ କାଦୁଅ ଏବଂ ଚପଲମାଡ଼ କରାଯାଇଥିବା ନେଇ ଅଭିଯୋଗ ହୋଇଛି । ଏହା ସହ ମମତାଙ୍କ ବିରୋଧରେ ଅପଶବ୍ଦ ଏବଂ ‘ଚୋର’ ନାରା ଦିଆଯାଇଥିବା ସେ ଅଭିଯୋଗ କରିଛନ୍ତି ।
ଘଟଣାକୁ ନେଇ ମମତା ବାନାର୍ଜୀ ସିଧାସଳଖ ଭାଜପାକୁ ଦାୟୀ କରିଛନ୍ତି । ତାଙ୍କ କହିବା ଅନୁସାରେ, ଏହି ବିରୋଧ ସ୍ଥାନୀୟ ଗ୍ରାମବାସୀଙ୍କ ଦ୍ୱାରା ନୁହେଁ ବରଂ ଭାଜପାର ‘ଗୁଣ୍ଡା’ମାନେ ଏହା ପଛରେ ରହିଛନ୍ତି । ବାହାରୁ ଲୋକ ଆଣି ପଥର ଓ ବଡ଼ ବଡ଼ ଇଟା ଫିଙ୍ଗାଯାଇଥିବା ସେ ଅଭିଯୋଗ କରିଛନ୍ତି ।ଘଟଣାର ପୃଷ୍ଠଭୂମିରେ ଜଣେ ତୃଣମୂଳ କଂଗ୍ରେସ କର୍ମୀଙ୍କ ହେପାଜତରେ ମୃତ୍ୟୁକୁ ନେଇ ବିବାଦ ଚାଲିଛି । TMC ଏବଂ ମୃତକଙ୍କ ପରିବାର ପକ୍ଷରୁ ଅଭିଯୋଗ ହୋଇଛି ଯେ ପୋଲିସ ହେପାଜତରେ ତାଙ୍କୁ ମାଡ଼ ମାରି ହତ୍ୟା କରାଯାଇଛି । ଅନ୍ୟପକ୍ଷରେ ସ୍ଥାନୀୟ ଲୋକମାନେ ମମତାଙ୍କ ଗସ୍ତକୁ ନେଇ ଅସନ୍ତୋଷ ପ୍ରକାଶ କରିଛନ୍ତି। ମମତା ବାନାର୍ଜୀ କହିଛନ୍ତି ଯେ ହେପାଜତରେ ମୃତ୍ୟୁ ପରେ ଏବେ ମୃତ କର୍ମୀଙ୍କ ପରିବାରକୁ ଭୟଭୀତ ଓ ଧମକ ଦେବା ପାଇଁ ଚେଷ୍ଟା କରାଯାଉଛି । ତାଙ୍କ ଗସ୍ତ ସମୟରେ ପୋଲିସର ଉପସ୍ଥିତି ସତ୍ତ୍ୱେ ଗାଡ଼ି ଉପରେ ପଥର ଫିଙ୍ଗାଯାଇଥିବା ସେ କହିଛନ୍ତି।
ଘଟଣାକୁ ନେଇ ମମତା ବାନାର୍ଜୀ ପୋଲିସ ପ୍ରଶାସନ ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି, ପୋଲିସ ନିଜର ବିଫଳତା ଲୁଚାଇବା ପାଇଁ ଏଭଳି ଲୋକଙ୍କ ଉପରେ ନିର୍ଭର କରୁଛି । ହେପାଜତରେ ମୃତ୍ୟୁ ଘଟଣା ସାମ୍ନାକୁ ଆସୁଥିବା ବେଳେ ବଙ୍ଗଳ ଏବେ ‘ଗୁଣ୍ଡାଙ୍କ ହାତକୁ ଚାଲିଯାଇଛି’ ବୋଲି ସେ ଅଭିଯୋଗ କରିଛନ୍ତି। ମମତା ଆହୁରି କହିଛନ୍ତି ଯେ ପୋଲିସର ଉପସ୍ଥିତିରେ ତାଙ୍କ ଗାଡ଼ି ଉପରେ ପଥର ଫିଙ୍ଗାଯାଇଛି। ଏହାକୁ ସେ ଦୃଢ଼ ଭାବରେ ନିନ୍ଦା କରିବା ସହ ବଙ୍ଗରେ ଭାଜପାର ଦଙ୍ଗା ବୃଦ୍ଧି ପାଇଥିବା ସେ ଅଭିଯୋଗ କରିଛନ୍ତି । ତେବେ ଏହି ଘଟଣାକୁ ନେଇ ଭାଜପା ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ ।
