ୱାଶିଂଟନ,୬ ।୩: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ଫ କହିଛନ୍ତି, ଯଦି ସେ ଶାସନ କ୍ଷମତାରେ ଥାଆନ୍ତେ ତେବେ ରୁଷିଆ ଓ ୟୁକ୍ରେନ୍ ଯୁଦ୍ଧ ହୋଇ ନ ଥାଆନ୍ତା । ଟ୍ରମ୍ଫ ଆହୁରି ମଧ୍ୟ କହିଛନ୍ତି ଯଦି ସେ ପୁଣି ଶାସନ କ୍ଷମତା ହାସଲ କରିବେ ତେବେ ରୁଷିଆ ଓ ୟୁକ୍ରେନ ଯୁଦ୍ଧକୁ ଗୋଟିଏ ଦିନରେ ବନ୍ଦ କରିଦେବେ । ସେ କହିଛନ୍ତି ମୁଁ କ୍ଷମତାକୁ ଆସିଲେ ରୁଷିଆ ଓ ୟୁକ୍ରେନ୍ ଯୁଦ୍ଧକୁ ବନ୍ଦ କରିବା ସହ ତୃତୀୟ ବିଶ୍ୱ ଯୁଦ୍ଧକୁ ବି ବନ୍ଦ କରିଦେଇ ପାରନ୍ତେ ।
ସୂଚନାଯୋଗ୍ୟ, ଆମେରିକାରେ ଆସନ୍ତା ବର୍ଷ ରାଷ୍ଟ୍ରପତି ନିର୍ବାଚନ ହେବାକୁ ଯାଉଛି । ନିର୍ବାଚନରେ ଡୋନାଲ୍ଡ ଟ୍ରମ୍ଫଙ୍କ ଅନୁଗାମୀ ରିପବ୍ଲିକାନ ପାର୍ଟି ରାଷ୍ଟ୍ରପତି ପ୍ରାର୍ଥୀ ଦେବାକୁ ଏବେଠାରୁ ପ୍ରସ୍ତୁତି ଆରମ୍ଭ କରିଦେଲାଣି । ଡୋନାଲ୍ଡ ଟ୍ରମ୍ଫ ପୁଣିଥରେ ରିପବ୍ଲିକାନ ପାର୍ଟି ପକ୍ଷରୁ ଆମେରିକା ରାଷ୍ଟ୍ରପତି ନିର୍ବାଚନରେ ପ୍ରାର୍ଥୀ ହୋଇପାରନ୍ତି । ଏବେ ସେ ଭିନ୍ନ ଭିନ୍ନ ସ୍ଥାନକୁ ଯାଇ ତାଙ୍କର ଏଜେଣ୍ଡା କହୁଛନ୍ତି । ଏମିତି ଏକ କାର୍ଯ୍ୟକ୍ରମରେ ଟ୍ରମ୍ଫ ରୁଷିଆ ଓ ୟୁକ୍ରେନ୍ ଯୁଦ୍ଧକୁ ନେଇ ବୟାନ ଦେଇଛନ୍ତି । ସେ କହିଛନ୍ତି, ରୁଷିଆ-ୟୁକ୍ରେନ ଯୁଦ୍ଧକୁ ମୁଁ ଗୋଟିଏ ଦିନରେ ବନ୍ଦ କରିପାରିବି । ମୋ ସରକାର ଆସିବ ତ ମୁଁ ତୃତୀୟ ବିଶ୍ୱ୍ୱଯୁଦ୍ଧ ହେବାକୁ ଦେବିନାହିଁ । ରୁଷିଆ ଓ ୟୁକ୍ରେନ୍ ଯୁଦ୍ଧକୁ ନେଇ ପୂର୍ବରୁ ବି ଟ୍ରମ୍ଫ ବୟାନ ଦେଇଛନ୍ତି । ସେତେବେଳେ ସେ କହିଥିଲେ ମୁଁ ଶାସନ କ୍ଷମତାରେ ଥିଲେ ରୁଷିଆକୁ ୟୁକ୍ରେନ ଉପରେ ଆକ୍ରମଣ କରିବାର ସୁଯୋଗ ମୁଁ ଦେଇ ନ ଥାଆନ୍ତି । ଆମ ସମୟରେ ଶାନ୍ତି ବଜାୟ ରଖିବାକୁ ଅନେକ ପ୍ରୟାସ ସଫଳ ହୋଇଛି ।
