ଇସଲାମାବାଦ,୬ ।୩: ତୋଶାଖାନା ମାମଲାରେ ଇସଲାମାବାଦ ପୋଲିସ ରବିବାର ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ତଥା ପାକିସ୍ତାନ ତେହରିକ-ଏ-ଇନସାଫର ମୁଖ୍ୟ ଇମ୍ରାନ ଖାଁଙ୍କୁ ଗିରଫ କରିବାକୁ ଲାହୋର ସ୍ଥିତ ତାଙ୍କ ଜମନ ପାର୍କ ଘରେ ପହଞ୍ଚିଥିଲା । ହେଲେ ସମର୍ଥକଙ୍କ ବିରୋଧ ଯୋଗୁ ପୋଲିସ ଖାଲି ହାତରେ ଫେରିଥିଲା । ଏହାରି ଭିତରେ ପୋଲିସଠାରୁ ବଞ୍ଚିବାକୁ ଯାଇ ଇମ୍ରାନ ଏଠି ସେଠି ଲୁଚିଥିଲେ । ପୋଲିସ ଫେରିଯିବା ପରେ ସେ ଘରେ ପହଞ୍ଚି ସମର୍ଥକଙ୍କୁ ସମ୍ବୋଧନ କରିଥିଲେ । କହିଥିଲେ ଆପଣମାନେ ମୋର ଟାଇଗର୍ସ । ମୁଁ କେବେ କାହା ସାମ୍ନାରେ ନଇଁ ନାହିଁ ଅବା ନଇଁବି ନାହିଁ । ଆମେ କେବଳ ଆଲ୍ଲାଙ୍କ ସାମ୍ନାରେ ନଇଁବା ଲୋକେ । ସେ ପ୍ରଧାନମନ୍ତ୍ରୀ ଶରିଫଙ୍କୁ ଟାର୍ଗେଟ କରି କହିଛନ୍ତି, ଆମ ପ୍ରଧାନମନ୍ତ୍ରୀ ସାରା ବିଶ୍ୱରେ ଭିକ ମାଗିମାଗି ପାକିସ୍ତାନକୁ ଲଜ୍ଜିତ କରୁଛନ୍ତି ।
ସୂଚନାଯୋଗ୍ୟ, ଇସଲାମାବାଦର ଏକ ଅଦାଲତ ତୋଶାଖାନା ମାମଲାରେ ସମନ ଜାରି କରିବା ପରେ ବି ହାଜର ନ ହେବାରୁ ଗତ ସପ୍ତାହରେ ଇମ୍ରାନଙ୍କ ବିରୋଧରେ ଜାମିନ ବିହିନ ୱାରଣ୍ଟ ଜାରି କରି କହିଥିଲେ, କି ଯଦି ଇମ୍ରାନ ୭ ମାର୍ଚ୍ଚରେ ଶୁଣାଣିରେ ଉପସ୍ଥିତ ନ ହୁଅନ୍ତି ତେବେ ପୋଲିସ ତାଙ୍କୁ ଗିରଫ କରି ହାଜର କରୁ । ଇମ୍ରାନ ୭ ମାର୍ଚ୍ଚ ପୂର୍ବରୁ ଗିରଫଦାରୀକୁ ବେଆଇନ ଦର୍ଶାଇ କହିଥିଲେ, ସରକାର ତାଙ୍କୁ ରାସ୍ତାରୁ ହଟାଇବାକୁ ଚାହୁଁଛନ୍ତି । ସେ ଆହୁରି ମଧ୍ୟ କହିଥିଲେ ଏବେକାର ସରକାର ଦେଶକୁ ସବୁଠାରୁ ଖରାପ ପରିସ୍ଥିତିକୁ ନେଇ ଆସିଛନ୍ତି । ଅର୍ଥବ୍ୟବସ୍ଥା ବୁଡି ଯାଇଛି । ଲୋକେ ମହଙ୍ଗା ମାଡରେ ବେହାଲ, ସେମାନଙ୍କ ଉପରେ ଋଣ ବୋଝ ଲଦି ଦିଆଯାଉଛି । ଇମ୍ରାନ କହିଛନ୍ତି ପାକିସ୍ତାନ ଦେବାଳିଆ ହେବା ପଛରେ ଶାସନରେ ଥିବା ସରକାରଙ୍କ ନେତା ଦାୟୀ, ଯେଉଁମାନେ ଜନତାଙ୍କ ଟଙ୍କାରେ ବିଦେଶରେ ଜାଗା କିଣିଛନ୍ତି ।
