ନୂଆଦିଲ୍ଲୀ,୧୭।୬: ଭାରତରେ ଗ୍ରୀନ ଏନର୍ଜି (ଶକ୍ତି) ଏବଂ ବୈକଳ୍ପିକ ଇନ୍ଧନର ଚାହିଦା ଦ୍ରୁତ ଗତିରେ ବଢ଼ିବାରେ ଲାଗିଛି। ଏହି ସମୟରେ ଇଥାନଲ (Ethanol) ଏଭଳି ଏକ ସେକ୍ଟର ଭାବେ ଉଭା ହେଉଛି, ଯାହା ମାଧ୍ୟମରେ ଆଗାମୀ ଦିନରେ ପ୍ରଚୁର ରୋଜଗାରର ସମ୍ଭାବନା ଦେଖିବାକୁ ମିଳୁଛି। ସରକାରଙ୍କ ଇଥାନଲ ବ୍ଲେଣ୍ଡିଂ ପଲିସି (ମିଶ୍ରଣ ନୀତି) ଅଧୀନରେ ପେଟ୍ରୋଲରେ ଇଥାନଲ ମିଶାଇ କେବଳ ବଢ଼ୁଥିବା ପ୍ରଦୂଷଣକୁ କମାଯାଉନାହିଁ, ବରଂ ଏହି ଇଣ୍ଡଷ୍ଟ୍ରିରେ ନିବେଶ ଏବଂ ବ୍ୟବସାୟର ନୂଆ ନୂଆ ସୁଯୋଗ ମଧ୍ୟ କ୍ରମାଗତ ଭାବେ ବୃଦ୍ଧି ପାଉଛି।
ବିଶେଷଜ୍ଞଙ୍କ ମତରେ, ଦେଶ ଯେପରି ୨୦% ଇଥାନଲ ଅର୍ଥାତ ‘ଇ୨୦’ (E20) ମିଶ୍ରଣ ଆଡ଼କୁ ଅଗ୍ରସର ହେଉଛି, ସେହିପରି ଏହାର ଚାହିଦା ଆହୁରି ଦ୍ରୁତ ହେବାରେ ଲାଗିବ। ଏହି କାରଣରୁ ଏହା କେବଳ ବଡ଼ ବଡ଼ ଶିଳ୍ପ ମଧ୍ୟରେ ସୀମିତ ନାହିଁ, ବରଂ ଛୋଟ ଏବଂ ମଧ୍ୟମ ଧରଣର ନିବେଶକମାନେ ମଧ୍ୟ ଏହା ସହ ଜଡ଼ିତ ହୋଇ ବେଶ ଭଲ ମୁନାଫା କମାଉଛନ୍ତି। ଆସନ୍ତୁ ଇଥାନଲ ସହ ଜଡ଼ିତ ୩ଟି ଦମଦାର୍ ବିଜନେସ ଆଇଡିଆ (ବ୍ୟବସାୟିକ ଯୋଜନା) ବିଷୟରେ ବିସ୍ତାର ଭାବେ ଜାଣିବା…
ଇଥାନଲ ଉତ୍ପାଦନ ପ୍ଲାଣ୍ଟ (Ethanol Production Plant)
ଆଜିର ସମୟରେ ଇଥାନଲ ମାନୁଫ୍ୟାକଚରିଂ ପ୍ଲାଣ୍ଟ ପ୍ରତିଷ୍ଠା କରିବା ସବୁଠାରୁ ବଡ଼ ଏବଂ ଲାଭଜନକ ବ୍ୟବସାୟ ଭାବେ ବିବେଚନା କରାଯାଉଛି। ଯଦି ଆପଣଙ୍କ ପାଖରେ ଭଲ ନିବେଶ (Capital) ଅଛି, ତେବେ ଏହା ଏକ ମଜଭୁତ ବ୍ୟବସାୟ ସାବ୍ୟସ୍ତ ହୋଇପାରେ।
ଇଥାନଲ ଏବେ କେବଳ ଆଖୁରୁ ନୁହେଁ, ବରଂ ମକା, ଭଙ୍ଗା ଚାଉଳ ଏବଂ କୃଷି ବର୍ଜ୍ୟବସ୍ତୁ ଯେପରିକି ନଡ଼ା (ପରାଲି), ବାଉଁଶ ଆଦିରୁ ମଧ୍ୟ ପ୍ରସ୍ତୁତ କରାଯାଉଛି, ଯାହାକୁ 2G ଇଥାନଲ କୁହାଯାଏ।
ପେଟ୍ରୋଲରେ ୨୦% ଇଥାନଲ ମିଶାଇବା ସରକାରଙ୍କ ଲକ୍ଷ୍ୟ ରହିଛି, ଯାହାଫଳରେ ଆଗାମୀ ଦିନରେ ଏହି ଉତ୍ପାଦର ଚାହିଦା ସବୁବେଳେ ବଜାୟ ରହିବ।
ବାୟୋମାସ ସପ୍ଲାଇ ଚେନ ବ୍ୟବସାୟ (Biomass Supply Chain)
ଇଥାନଲ ଉତ୍ପାଦନ ପାଇଁ ବଡ଼ ଆକାରରେ କୃଷି ବର୍ଜ୍ୟବସ୍ତୁ (କଞ୍ଚାମାଲ) ର ଆବଶ୍ୟକତା ହୋଇଥାଏ। ଏଭଳି ସ୍ଥିତିରେ ଆପଣ ଚାଷୀ ଏବଂ ଇଥାନଲ ପ୍ଲାଣ୍ଟଗୁଡ଼ିକ ମଧ୍ୟରେ ଏକ ସପ୍ଲାଇ ଚେନ (ଯୋଗାଣ ଶୃଙ୍ଖଳା) ର କାମ ଆରମ୍ଭ କରିପାରିବେ।
ଏହି ବ୍ୟବସାୟରେ ଆପଣ ଚାଷୀମାନଙ୍କଠାରୁ ନଡ଼ା, ଆଖୁ ଚୋପା, ମକା କିମ୍ୱା ନଷ୍ଟ ହୋଇଯାଇଥିବା ଶସ୍ୟ ସଂଗ୍ରହ କରି ତାହାକୁ ପ୍ରୋସେସ କରିପାରିବେ ଏବଂ ଇଥାନଲ କମ୍ପାନୀଗୁଡ଼ିକୁ ଯୋଗାଇ ପାରିବେ।
ଏହି ବ୍ୟବସାୟ କମ ପୁଞ୍ଜିରେ ଆରମ୍ଭ ହୋଇପାରିବ ଏବଂ ଏହା ପରିବେଶକୁ ପ୍ରଦୂଷଣରୁ ରକ୍ଷା କରିବାରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ଏହାର ସବୁଠାରୁ ବଡ଼ ଲାଭ ହେଉଛି ଏଥିରେ କ୍ରମାଗତ ଅଭିବୃଦ୍ଧିର ସମ୍ଭାବନା ରହିଛି।
ଫ୍ଲେକ୍ସ-ଫ୍ୟୁଲ କନଭର୍ସନ କିଟ ବ୍ୟବସାୟ (Flex-Fuel Conversion Kits)
ଆଗାମୀ ସମୟରେ କାର୍ ଏବଂ ବାଇକ ଗୁଡ଼ିକ ସମ୍ପୂର୍ଣ୍ଣ ରୂପେ ୧୦୦% ଇଥାନଲ (E100) କିମ୍ୱା ଫ୍ଲେକ୍ସ-ଫ୍ୟୁଲରେ ଚାଲିବାକୁ ଲାଗିବ। ଏଭଳି ପରିସ୍ଥିତିରେ ପୁରୁଣା ପେଟ୍ରୋଲ ଗାଡ଼ିଗୁଡ଼ିକୁ ମଧ୍ୟ ଅପଗ୍ରେଡ କରିବାର ଆବଶ୍ୟକତା ପଡ଼ିବ।
ଏଥିପାଇଁ ଆପଣ ଫ୍ଲେକ୍ସ-ଫ୍ୟୁଲ କନଭର୍ସନ କିଟର ଡିଲରସିପ କିମ୍ୱା ନିଜର ଏକ ୱାର୍କସପ ଆରମ୍ଭ କରିପାରିବେ।
ଯେପରି ପୂର୍ୱରୁ ସିଏନଜି (CNG) କିଟ୍ର ଟ୍ରେଣ୍ଡ ବଢ଼ିଥିଲା, ସେହିପରି ଆଗାମୀ ଦିନରେ ଲୋକେ ଇଥାନଲ କିଟ ଦ୍ରୁତ ଗତିରେ ବ୍ୟବହାର କରିବେ, କାରଣ ଇଥାନଲ ପେଟ୍ରୋଲ ତୁଳନାରେ ବହୁତ ଶସ୍ତା ଅଟେ।
