ନୂଆଦିଲ୍ଲୀ,୨୬।୮: ଦୈନନ୍ଦିନ ଖାଦ୍ୟସାମଗ୍ରୀର ବୃଦ୍ଧିପାଉଥିବା ଦରଦାମ୍ ମଧ୍ୟରେ ଏବେ ଅଣ୍ଡା ଦର ସାଧାରଣ ଖାଉଟିଙ୍କ ଚିନ୍ତା ବଢ଼ାଇଦେଇଛି । ବିଗତ ଗୋଟିଏ ବର୍ଷ ମଧ୍ୟରେ ଅଣ୍ଡା ମୂଲ୍ୟରେ ପ୍ରାୟ ୩୫-୪୦ ପ୍ରତିଶତ ବୃଦ୍ଧି ଘଟିଛି । ନ୍ୟାସନାଲ୍ ଏଗ୍ କୋ-ଅର୍ଡିନେସନ୍ କମିଟି (NECC) ଅନୁଯାୟୀ, ପୋଲଟ୍ରି ଫାର୍ମରୁ ବାହାରୁଥିବା ଗୋଟିଏ ଅଣ୍ଡାର ମୂଲ୍ୟ ପ୍ରାୟ ୭ ଟଙ୍କାରେ ପହଞ୍ଚିଥିବା ବେଳେ ଖୁଚୁରା ବଜାରରେ ଏହା ୮.୫୦ ରୁ ୯ ଟଙ୍କାରେ ବିକ୍ରି ହେଉଛି।
ଅଣ୍ଡା ଦର ବୃଦ୍ଧିର ମୁଖ୍ୟ କାରଣ ହେଉଛି କୁକୁଡ଼ା ଦାନା (ପୋଲଟ୍ରି ଫିଡ୍)ର ବର୍ଦ୍ଧିତ ଖର୍ଚ୍ଚ । କୁକୁଡ଼ା ଦାନା ପ୍ରସ୍ତୁତିରେ ମକା ହେଉଛି ମୁଖ୍ୟ କଞ୍ଚାମାଲ। ପେଟ୍ରୋଲରେ ଇଥାନଲ୍ ମିଶ୍ରଣ (E20) ନୀତି ଯୋଗୁଁ ଇଥାନଲ୍ ଉତ୍ପାଦନ ପାଇଁ ମକାର ଚାହିଦା ବ୍ୟାପକ ଭାବେ ବୃଦ୍ଧି ପାଇଛି। ESY 2025-26 ରେ ଇଥାନୋଲ୍ ଉତ୍ପାଦନ ପାଇଁ ପ୍ରାୟ ୧୨୫.୭୮ ଲକ୍ଷ ଟନ୍ ମକା ବ୍ୟବହାର ହେବାର ଆକଳନ କରାଯାଇଛି।
ଦେଶ ଭିତରେ ମକାର ବର୍ଦ୍ଧିତ ଚାହିଦା ଯୋଗୁଁ ଭାରତକୁ ମକା ଆମଦାନୀ କରିବାକୁ ପଡ଼ିଛି । ୨୦୨୪ରେ ଭାରତ ମିଆଁମାର ଏବଂ ୟୁକ୍ରେନରୁ ପ୍ରାୟ ୮.୯ ଲକ୍ଷ ଟନ୍ ମକା ଆମଦାନୀ କରିଥିଲା। ପୂର୍ବରୁ ମକା ରପ୍ତାନି କରୁଥିବା ଭାରତରେ ଏବେ ଇଥାନୋଲ୍ ଓ ପୋଲଟ୍ରି ଶିଳ୍ପ ଯୋଗୁଁ ଯୋଗାଣ ଉପରେ ଚାପ ସୃଷ୍ଟି ହୋଇଛି । ଯଦିଓ ୨୦୨୪-୨୫ରେ ଦେଶରେ ମକା ଉତ୍ପାଦନ ୪.୩୪ କୋଟି ଟନ୍ ରହିଛି, ତଥାପି ଚାହିଦା ଅଧିକ ରହିଛି। ଶୀତଦିନେ ସାଧାରଣତଃ ଅଣ୍ଡାର ଚାହିଦା ବୃଦ୍ଧି ପାଇଥାଏ। ଯଦି ମକା ଏବଂ କୁକୁଡ଼ା ଦାନାର ମୂଲ୍ୟ ଏହିପରି ଉଚ୍ଚ ରହେ, ତେବେ ଆଗାମୀ ଦିନରେ ଅଣ୍ଡା ଦର ଆହୁରି ବଢ଼ିବା ସମ୍ଭାବନା ରହିଛି। ତେବେ କେବଳ ଇଥାନଲ୍ ନୁହେଁ, ବରଂ ପାଣିପାଗ, ଅନ୍ୟାନ୍ୟ ଦାନା ଖର୍ଚ୍ଚ ଏବଂ ବଜାର ଯୋଗାଣ ମଧ୍ୟ ଅଣ୍ଡାର ଚୂଡ଼ାନ୍ତ ମୂଲ୍ୟ ନିର୍ଦ୍ଧାରଣ କରିବ।
