ଇଷ୍ଟ ରୋଦରଫୋଡ,୨୬ା୬: ଗୋଞ୍ଜାଲୋ ପ୍ଲାଟାଙ୍କ ଗୋଲ ବଳରେ ଶୁକ୍ରବାର ଖେଳାଯାଇଥିବା ଏକ ରୋମାଞ୍ଚକ ମ୍ୟାଚ୍ରେ ଇକ୍ୱେଡର ୨-୧ ଗୋଲରେ ଜର୍ମାନୀକୁ ପରାସ୍ତ କରିଛି। ଫିଫା ର଼୍ୟାଙ୍କିଙ୍ଗ୍ରେ ୨୩ତମ ସ୍ଥାନରେ ଥିବା ଇକ୍ୱେଡର ଲାଗି ଏହା ସର୍ବବୃହତ୍ ବିଜୟ। ଏହି ବିଜୟ ସହ ଇକ୍ୱେଡର ବିଶ୍ୱକପ୍ ଇତିହାସରେ ଦ୍ୱିତୀୟ ଥର ପାଇଁ ନକ୍ଆଉଟ୍ ରାଉଣ୍ଡରେ ସ୍ଥାନ ପକ୍କା କରିଛି। ପୂର୍ବରୁ ୨୦୦୬ ସଂସ୍କରଣରେ ଦଳ ରାଉଣ୍ଡ ଅଫ୍-୧୬ରୁ ବିଦାୟ ନେଇଥିଲା।
ଷ୍ଟାଡିୟମରେ ୮୦,୬୬୩ ଦର୍ଶକଙ୍କ ଉପସ୍ଥିତିରେ ମ୍ୟାଚ୍ ଆରମ୍ଭ ହେବାର ଦୁଇ ମିନିଟ୍ ମଧ୍ୟରେ ଗୋଲପୋଷ୍ଟ ସାମ୍ନାରେ ଫ୍ଲୋରିଆନ ଓ୍ବିର୍ଜଙ୍କଠାରୁ ପାଇଥିବା ପାସକୁ ଲେରୟ ସେନ ଗୋଲରେ ପରିଣତ କରିଥିଲେ। ଫଳରେ ଜର୍ମାନୀ ୧-୦ ଗୋଲର ଅଗ୍ରଣୀ ହାସଲ କରିଥିଲା। ଏହାର ୭ ମିନିଟ୍ ପରେ ଇକ୍ୱେଡର ପାଇଁ ନିଲସନ ଅଙ୍ଗୁଲୋ ବକ୍ସ ବାହାରୁ ଏକ ଚମତ୍କାର ଗୋଲ କରିଥିଲେ। ଫଳରେ ପ୍ରଥମାର୍ଦ୍ଧ ୧-୧ ଗୋଲରେ ବରାବର ଭାବେ ଶେଷ ହୋଇଥିଲା।
ଦ୍ୱିତୀୟାର୍ଦ୍ଧର ୭୭ତମ ମିନିଟ୍ରେ ଇକ୍ୱେଡରକୁ ମିଳିଥିବା ଏକ କର୍ନର କିକ୍ରୁ ପ୍ଲାଟା ଜର୍ମାନୀର ୪୦ ବର୍ଷୀୟ କିମ୍ବଦନ୍ତୀ ଗୋଲକିପର ମାନୁଏଲ ନେଉରଙ୍କ ସାମ୍ନାରୁ ଗୋଲ କରିଥିଲେ। ଏହି ପରାଜୟ ସହ ୪ ଥରର ଚାମ୍ପିୟନ ଜର୍ମାନୀର ଗତ ୧୧ ମ୍ୟାଚ୍ ଧରି ଚାଲି ଆସୁଥିବା ବିଜୟ ଧାରାରେ ବ୍ରେକ ଲାଗିଛି।
ଅନ୍ୟପକ୍ଷରେ ଗତ ୨୨ ମ୍ୟାଚ୍ରେ ମାତ୍ର ଥରେ ପରାଜିତ ହୋଇଥିବା ଇକ୍ୱେଡର ଗ୍ରୁପ୍-ଇ’ରେ ୪ ପଏଣ୍ଟ ସହ ତୃତୀୟ ସ୍ଥାନରେ ରହିଛି। ଏହି ଦଳ ମଙ୍ଗଳବାର ମେକ୍ସିକୋ ସିଟିରେ ରାଉଣ୍ଡ ଅଫ୍-୩୨ ମ୍ୟାଚ୍ରେ ମେକ୍ସିକୋକୁ ଭେଟିପାରେ।
