ନୂଆଦିଲ୍ଲୀ,୧୮।୮: ବର୍ତ୍ତମାନ ଫ୍ଲେକ୍ସ ଫ୍ୟୁଏଲ ବା ଇ୨୦ ପେଟ୍ରୋଲ ବ୍ୟବହାରକୁ ନେଇ ବିଭିନ୍ନ ସ୍ତରରେ ବିବାଦ ମୁଣ୍ଡ ଟେକିଛି। ଏହି କିସମର ଇନ୍ଧନ ବ୍ୟବହାର ଦ୍ୱାରା ମାଇଲେଜ୍ କମିବା ସହିତ ଗାଡି ଯନ୍ତ୍ରାଂଶ ଖରାପ ହେବା ବିଷୟକୁ ନେଇ ସରକାର, ଅଟୋମୋବାଇଲ ସଂଘ ଏବଂ ଗାଡି ନିର୍ମାତାଙ୍କ ମଧ୍ୟରେ ବିବାଦ ତେଜିବାରେ ଲାଗିଛି। ଏହାମଧ୍ୟରେ ମୁଖ୍ୟ ଅର୍ଥନୈତିକ ପରାମର୍ଶଦାତା(ସିଇଏ) ଭି ଅନନ୍ତ ନାଗେଶ୍ୱରନ୍ ପୁରୁଣା ଯାନବାହନଗୁଡ଼ିକ ପାଇଁ ଇ୧୦ ପେଟ୍ରୋଲର ବ୍ୟବହାରକୁ ଗୁରୁତ୍ୱ ଦେଇ ରିଟେଲ ସ୍ତରରେ ଏହି ବ୍ୟବସ୍ଥା ଫେରାଇ ଆଣିବାକୁ ପ୍ରସ୍ତାବ ଦେଇଛନ୍ତି। ସେ ଯୁକ୍ତି ବାଢ଼ିଛନ୍ତି ଯେ ଇଥାନଲ୍ ମିଶ୍ରଣ ସ୍ତରକୁ ଇ୨୦ରୁ ଅଧିକ ବଢ଼ାଇବା ପୂର୍ବରୁ ସରକାର ଜରୁରୀକାଳୀନ ଭାବେ ଖାଦ୍ୟ ସହିତ ଇନ୍ଧନକୁ ମଧ୍ୟ ଗୁରୁତ୍ୱ ଦେବା ଉଚିତ ଏବଂ ‘ଖାଦ୍ୟ ବନାମ ଜାଳେଣି’ର ସନ୍ତୁଳନକୁ ସମାଧାନ କରିବା ଆବଶ୍ୟକ। ଏକ ଦୈନିକ ଖବର କାଗଜରେ ନାଗେଶ୍ୱରନ୍ଙ୍କ ଦ୍ୱାରା ଲିଖତ ପ୍ରବନ୍ଧ ପ୍ରକାଶ ପାଇବା ପରେ ଇଥାନଲ ମିଶ୍ରିତ ଇନ୍ଧନର ବ୍ୟବହାରକୁ ନେଇ ତାଙ୍କର ମତାମତ ସାମ୍ନାକୁ ଆସିଛି। ଇ୨୦ ପେଟ୍ରୋଲ ବ୍ୟବହାର ଦ୍ୱାରା ଇଞ୍ଜିନ ଏବଂ ଗାଡିର ଅନ୍ୟାନ୍ୟ ଯନ୍ତ୍ରାଂଶ ନଷ୍ଟ ହେଉଥିବା ବିଭିନ୍ନ ସ୍ତରରେ ଅଭିଯୋଗ ଆସିବା ସେହି ସମସ୍ୟାଗୁଡିକର ସମାଧାନ କରିବାକୁ ନାଗେଶ୍ୱରନ୍ ତାଙ୍କ ପ୍ରବନ୍ଧ ମାଧ୍ୟମରେ ଉଦ୍ୟମ କରିଛନ୍ତି। ସେ ଉଲ୍ଲେଖ କରିଛନ୍ତି , ଭାରତର ୭.୫ ରୁ ୮ କୋଟି ପ୍ରି-ବିଏସ୪ ଦୁଇଚକିଆ ଯାନଗୁଡ଼ିକ କାର୍ବୁରେଟର ସଂଯୁକ୍ତ ରହିଛି। ଏହି ଗାଡ଼ିଗୁଡ଼ିକ ଇଥାନଲର ଅତିରିକ୍ତ ଅମ୍ଳଜାନ ପରିମାଣ ସହିତ ଖାପଖୁଆଇ ପାରନ୍ତି ନାହିଁ। ଫଳରେ ଅଧିକ ଗରମ ହୋଇଯାନ୍ତି ଏବଂ ସମୟକ୍ରମେ ସେଗୁଡ଼ିକର ଅନ୍-କୋଟେଡ୍ ରବର ସିଲ୍ଗୁଡ଼ିକ ନଷ୍ଟ ହୋଇଯାଏ। ତେଣୁ ଏହି ପୁରୁଣା ଗାଡ଼ି ପାଇଁ ପେଟ୍ରୋଲ ପମ୍ପ୍ରେ ଇ୧୦ ଭଳି କମ୍ ଇଥାନଲ ମିଶ୍ରିତ ପେଟ୍ରୋଲ ପୁଣି ଉପଲବ୍ଧ କରାଯିବା ଆବଶ୍ୟକ ବୋଲି ନାଗେଶ୍ୱରନ କହିଛନ୍ତି। ଅନ୍ୟପକ୍ଷରେ ଅଟୋମୋଟିଭ୍ ରିସର୍ଚ୍ଚ ଆସୋସିଏସନ୍ (ଏଆରଏ) ଏବଂ ଇଣ୍ଡିଆନ୍ ଅଏଲ୍ ସମେତ ବିଶ୍ୱସ୍ତରୀୟ ଏବଂ ଦେଶୀୟ ପରୀକ୍ଷଣର ଉଦାହରଣ ଦେଇ ସେ କହିଛନ୍ତି, ଇ୨୦ ଯୋଗୁଁ ସ୍ଥାୟୀତ୍ୱ ସମସ୍ୟା ସୃଷ୍ଟି ହେଉଥିବା ନେଇ ବ୍ୟାପକ ଆଶଙ୍କା ରହିବା କଥା ଯାହା କୁହାଯାଉଛି , ତାହା ଠିକ୍ ନୁହେଁ। ଇ୨୦ ପେଟ୍ରୋଲ ବ୍ୟବହାର ଦ୍ୱାରା ୩୦% କ୍ଷତି ବଦଳରେ ପ୍ରକୃତ କାର୍ଯ୍ୟଦକ୍ଷତା ବା ମାଇଲେଜ୍ ହ୍ରାସ ମାତ୍ର ୬-୭% ବୋଲି ଆକଳନ କରାଯାଇଛି ବୋଲି ସେ କହିଛନ୍ତି। ଇ୨୦ ଇନ୍ଧନ ବ୍ୟବହାର ସପକ୍ଷରେ ଯୁକ୍ତି ବାଢି ଚାଲୁଥିଲାବେଳେ ଗାଡି ଖରାପ ହେବା ବିଷୟକୁ ନେଇ ବିଭିନ୍ନ ସ୍ତରରେ ଅଭିଯୋଗ ଉଠିଛି। ବହୁ ପ୍ରମୁଖ କାର୍ ନିର୍ମାଣକାରୀ କମ୍ପାନୀ ମଧ୍ୟ ପରୋକ୍ଷରେ ଏହାକୁ ସ୍ବୀକାର କରିଛନ୍ତି। ଏହାଭିତରେ ସିଇଏ ନାଗେଶ୍ୱରନ୍ଙ୍କ ଏଭଳି ମତାମତ ସରକାରଙ୍କ ଆଭିମୁଖ୍ୟ ପ୍ରତି ପ୍ରଶ୍ନ ଉଠାଇଛି।
