କେସିଙ୍ଗା,୨୫ା୬(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ଥାନା ଅନ୍ତର୍ଗତ ଖଜୁରପଡ଼ା ଛକ ନିକଟରେ ବୁଧବାର ରାତିରେ ଏକ ଦୁର୍ଘଟଣା ଘଟିଛି।
ସୂଚନାନୁଯାୟୀ, ଖଜୁରୀପଡ଼ା ଛକରେ ଅବସ୍ଥିତ ଅରିହନ୍ତ୍ ରାଇସ ମିଲ୍ରେ ଶ୍ରମିକ ଭାବେ କାର୍ଯ୍ୟ କରୁଥିବା ମାଟିଆ ଗ୍ରାମର ଜୟରାମ ଗୌଡ଼ ବୁଧବାର ରାତିରେ ନିଜ କାର୍ଯ୍ୟ ସାରି ଘରକୁ ଯିବା ପାଇଁ ଜାତୀୟ ରାଜପଥ ୨୬ ପାର କରୁଥିବା ସମୟରେ ଭବାନୀପାଟଣାରୁ କେସିଙ୍ଗା ଅଭିମୁଖେ ଯାଉଥିବା ଏକ ପିକ ଅପ୍ ଭ୍ୟାନ ନଂ. ଓଡି ୦୨ ଡିକେ ୭୭୪୧ ଧକ୍କା ଦେବାରୁ ଅଚେତ ହୋଇ ରାଜପଥରେ ପଡ଼ିରହିଥିଲେ। ଏକ ମାଲ୍ ବୋଝେଇ ପିକଅପ୍ର ବିଭିନ୍ନ ପ୍ରକାର କପଡା ଓ ପୋଷାକ ପ୍ୟାକେଟ ନେଇ ଯାଉ ଥିବା ବେଳେ ଦ୍ରୁତଗତିରେ ଆସି ଶ୍ରମିକ ଜଣକୁ ଜୋର୍ରେ ଧକ୍କା ଦେଇ ଚାଲିଯାଇଥିଲା। ଦୁର୍ଘଟଣା ଘଟାଇଥିବା ପରେ ଡ଼୍ରାଇଭର ଜଣକ ଭୟରେ ଦ୍ରୁତଗତିରେ ଫେରାର ହୋଇଯାଉଥିବାବେଳେ ଦୁର୍ଘଟଣା ଅଞ୍ଚଳରୁ ମାତ୍ର ଅଧା କିମି ଦୂରରେ ସେହି ଗାଡ଼ିଟି ଭାରସାମ୍ୟ ହରାଇ ଚିଚର୍ଲା ଗ୍ରାମ ନିକଟରେ ଦୁର୍ଘଟଣାଗ୍ରସ୍ତ ହୋଇ ରାସ୍ତା ତଳକୁ ପଡ଼ି ଯାଇଥିଲେ। ଦୁର୍ଘଟଣାର ଶିକାର ହୋଇଥିବା ଶ୍ରମିକ ଏବଂ ଡ୍ରାଇଭର ଗୁରୁତର ହୋଇଛନ୍ତି। ଦୁର୍ଘଟଣା ବିଷୟରେ ଖବର ପାଇଁ ଉତ୍କେଲା ପୋଲିସ ଫାଣ୍ଡି ଅଧିକାରୀ ତୁରନ୍ତ ଦୁର୍ଘଟଣାସ୍ଥଳରୁ ଉଭୟଙ୍କୁ ଉଦ୍ଧାର କରି କେସିଙ୍ଗା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିବା ବେଳେ ଦୁହିଁଙ୍କ ଅବସ୍ଥା ସଙ୍କଟାପନ୍ନ ଥିବାରୁ ଉଭୟଙ୍କୁଭବାନୀପାଟଣା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଏ ସଂକ୍ରାନ୍ତରେ ଉତ୍କେଲା ଫାଣ୍ଡି ଅଧିକାରୀ ଏଏସ୍ଆଇ ଅନୁପ କୁମାର ଶତପଥୀଙ୍କୁ ପଚାରିବାରୁ ତଦନ୍ତ ଜାରି ରହିଛି ବୋଲି ପ୍ରକାଶ କରିଥିଲେ। ଗତ କିଛିଦିନ ତଳେ ଏହି ଜାଗାରେ ଧାନ ବୋଝେଇ ଟ୍ରକର ଦୁଇ ଡ୍ରାଇଭରଙ୍କ ଦୁର୍ଘଟଣା ମୃତ୍ୟୁ ଘଟିଥିଲା।
