ନୂଆଦିଲ୍ଲୀ,୨୭।୮: ପୂର୍ବତନ ଟିମ ଇଣ୍ଡିଆ ଅଧିନାୟକ ରାହୁଲ ଦ୍ରାବିଡ ଏବଂ କିମ୍ବଦନ୍ତୀ ଓପନର ବୀରେନ୍ଦ୍ର ସେହ୍ବାଗଙ୍କ ପୁଅ ଏବେ ଟିମ ଇଣ୍ଡିଆ ଜର୍ସି ପିନ୍ଧି ନଜର ଆସିବେ। ଉଭୟ ଖେଳାଳିଙ୍କ ପୁଅ ୧୯ ବର୍ଷରୁ କମ ଦଳରେ ସ୍ଥାନ ପାଇଛନ୍ତି।
ଅଷ୍ଟ୍ରେଲିଆ ବିପକ୍ଷରେ ତିନି ମ୍ୟାଚ ବିଶିଷ୍ଟ ଦିନିକିଆ ସିରିଜ ପାଇଁ ଭାରତୀୟ ୧୯ ବର୍ଷରୁ କମ ଦଳ ଘୋଷଣା କରାଯାଇଛି। ଏଥିରେ ୧୫ ଜଣ ଖେଳାଳିଙ୍କୁ ସାମିଲ କରାଯାଇଛି। ତାଲିକାରେ ଆର୍ଯ୍ୟବୀର ସେହ୍ବାଗ ଏବଂ ଅନଭୟ ଦ୍ରାବିଡଙ୍କ ନାମ ରହିଛି।
ଆର୍ଯ୍ୟବୀର ତାଙ୍କ ପିତାଙ୍କ ପରି ଜଣେ ପ୍ରାରମ୍ଭିକ ବ୍ୟାଟ୍ସମ୍ୟାନ। ସେ ତାଙ୍କର ଆକ୍ରମଣାତ୍ମକ ବ୍ୟାଟିଂ ଶୈଳୀ ପାଇଁ ଜଣାଶୁଣା। ରାହୁଲ ଦ୍ରାବିଡଙ୍କ ପୁଅ ଅନଭୟ ଜଣେ ଉଇକେଟକିପର-ବ୍ୟାଟ୍ସମ୍ୟାନ ଯିଏ ମଧ୍ୟମ କ୍ରମରେ ବ୍ୟାଟିଂ କରନ୍ତି।
୧୯ ବର୍ଷରୁ କମ ଦଳ ସେପ୍ଟେମ୍ବର ୨୧ରୁ ଅଷ୍ଟ୍ରେଲିଆ ବିପକ୍ଷରେ ଦିନିକିଆ ସିରିଜ ଖେଳିବାକୁ ଯାଉଛି। ଏହି ତିନି ମ୍ୟାଚ ବିଶିଷ୍ଟ ସିରିଜ ରାଜକୋଟରେ ଅନୁଷ୍ଠିତ ହେବ। ପ୍ରଥମ ଦିନିକିଆ ସେପ୍ଟେମ୍ବର ୧୮, ଦ୍ୱିତୀୟ ସେପ୍ଟେମ୍ବର ୨୧ ପାଇଁ ଏବଂ ତୃତୀୟ ସେପ୍ଟେମ୍ବର ୨୩ ପାଇଁ ଧାର୍ଯ୍ୟ କରାଯାଇଛି।
ଭାରତର ଅଣ୍ଡର-୧୯ ସ୍କ୍ବାଡ: ଲକ୍ଷ୍ମୀ ରାଇଚନ୍ଦାନୀ (ଅଧିନାୟକ), ଯଶବର୍ଦ୍ଧନ ଚୌହାନ (ଅଧିନାୟକ), ରଜତ ବାଗେଲ, ଆର୍ଯ୍ୟବୀର ସେହ୍ବାଗ, ଭି.କେ ଭିନେଥ, କୁଶାଗ୍ରା ଓଝା, ଅର୍ଜୁନ ରାଜପୁତ, ମନଲ ଚୌହାନ, ଅନଭୟ ଦ୍ରାବିଡ, ଭି ଯଶବୀର, ରୋହିତ ଯାଦବ, ଶବିନ ବିନୋଦ, ମୋହିତ ଉଲଭା, ଚିଗୁରୁପତି ଭେଙ୍କଟା ଏବଂ କାଭିଆ ପଟେଲ।
Dharitri – Odisha’s No.1 Odia Daily
