ଜି.ଉଦୟଗିରି,୭ା୮(ଶିଶିର ପଟ୍ଟନାୟକ/ଚିନ୍ମୟ କୁମାର ସେଠୀ): କନ୍ଧମାଳ ଜିଲାର ଜି.ଉଦୟଗିରି ବଜାର ଫୁଟପାଥରେ ଡ୍ରାଗନ ଫ୍ରୁଟ ବିକ୍ରି ହେଉଛି। ଏହାର କିଲୋ ୨୦୦ ଟଙ୍କା ରହିଥିଲେ ମଧ୍ୟ ଗ୍ରାହକଙ୍କ କିଣି ନେଉଥିବା ଦେଖିବାକୁ ମିଳିଛି। ଜି. ଉଦୟଗିରିଠାରୁ ୨୫ କି.ମି. ଦୂର ବେହେରା ଗାଁର ଚାଷୀ ପ୍ରଦୀପ ଦିଗାଳ (୫୦) ପାରମ୍ପରିକ ଚାଷରୁ ନିବୃତ୍ତ ହୋଇ ନୂତନ ଭାବେ ଲାଭଦାୟକ ଫସଲ ଡ୍ରାଗନ ଫ୍ରୁଟ ଚାଷ କରି ଲାଭନ୍ବିତ ହୋଇଛନ୍ତି। ଏଥିରୁ ସେ ସ୍ବାବଲମ୍ବୀ ହେବା ସହ ଭଲ ଆୟ ହେଉଥିବା କହିଛନ୍ତି । ଅଳ୍ପ ଜମିରେ ମଧ୍ୟ ଉନ୍ନତ ପ୍ରଣାଳୀରେ ଚାଷ କରି ଅଧିକ ଲାଭ ମିଳିପାରେ ଏହା ସେ ଅନ୍ୟମାନଙ୍କୁ ଦେଖାଇ ଦେଇଛନ୍ତି। ପୂର୍ବରୁ ପ୍ରଦୀପ ପାରମ୍ପରିକ ଫସଲ ଚାଷ କରୁଥିଲେ। ଏଥିରେ ପାଣିପାଗର ଅନିଶ୍ଚିତତା, ଖର୍ଚ୍ଚ ବୃଦ୍ଧି ଏବଂ ଉତ୍ପାଦିତ ଫସଲର ଉଚିତ ମୂଲ୍ୟ ନ ମିଳିବା ହେତୁ ତାଙ୍କୁ ଆଶାନୁରୂପ ଲାଭ ମିଳୁ ନ ଥିଲା। ଡ୍ରାଗନ ଫ୍ରୁଟ ଚାଷ ସମ୍ପର୍କରେ ଜାଣିବା ପରେ ସେ ଏହି ଚାଷ ପ୍ରତି ଆଗ୍ରହ ପ୍ରକାଶ କରିଥିଲେ। ନିଜ ଗାଁରେ ଏହି ଚାଷ କରିବାକୁ ଯୋଜନା କରି ପ୍ରଦୀପ ଲିଜ ସୂତ୍ର ରେ ଜଣଙ୍କଠାରୁ ଏକ ଏକର ଜମି ଆଣି ଚାଷ ଆରମ୍ଭ କରିଥିଲେ। ସମାନ ବ୍ୟବଧାନରେ କଂକ୍ରିଟ ଖୁଣ୍ଟ ପୋତି ସେଥିରେ ୨ହଜାର ଡ୍ରାଗନ ଫ୍ରୁଟ ଗଛ ଲଗାଇଥିଲେ। ସେଗୁଡ଼ିକର ନିୟମିତ ଯତ୍ନ, ଜଳସେଚନ, ଜୈବସାର ପ୍ରୟୋଗ ଓ ରୋଗ ପୋକ ନିୟନ୍ତ୍ରଣ ଦିଗରେ ପଦକ୍ଷେପ ନେଉଥିଲେ। ଗଛ ଗୁଡ଼ିକର ରକ୍ଷଣାବେକ୍ଷଣ କରିଥିଲେ। ପ୍ରାୟ ବର୍ଷେ ପରେ ସେହି ଗଛରେ ଫଳ ଆସିବା ଆରମ୍ଭ କରିଥିଲା । ଚାଷ ଆରମ୍ଭ କରିବାର ଦ୍ବିତୀୟ ବର୍ଷରୁ ସେ ଡ୍ରାଗନ ଫଳ ବିକ୍ରି କରିବା ଆରମ୍ଭ କରିଥିଲେ। ଏଥିରୁ ସେ ଗତ ୪ ବର୍ଷ ହେବ ବାର୍ଷିକ ୧.୭ ଲକ୍ଷରୁ ଊର୍ଦ୍ଧ୍ୱ ଆୟ କରୁଛନ୍ତି। ଜମିର ରକ୍ଷଣା ବେକ୍ଷଣ ଦିଗରେ ବାର୍ଷିକ ୫୦ରୁ ୬୦ ହଜାର ଖର୍ଚ୍ଚ କରୁିଛନ୍ତି ପ୍ରଦୀପ । ଡ୍ରାଗନ ଫ୍ରୁଟ୍ର ଚାହିଦା ସ୍ଥାନୀୟ ବଜାର ସମେତ ସହରାଞ୍ଚଳରେ ମଧ୍ୟ ରହିଥିବାରୁ ଉତ୍ପାଦିତ ଫଳ ବିକ୍ରି କରି ପ୍ରଦୀପ ଭଲ ମୂଲ୍ୟ ପାଇପାରୁଛନ୍ତି। ଏଥିସହ ସେ ଅନ୍ୟ ଚାଷୀଙ୍କୁ ମଧ୍ୟ ଡ୍ରାଗନ ଫ୍ରୁଟ ଚାଷ ସମ୍ପର୍କରେ ଜଣାଇବା ସହ ନୂତନ କୃଷି ପଦ୍ଧତି ଆପଣାଇବାକୁ ପ୍ରୋତ୍ସାହିତ କରୁଛନ୍ତି। ଆଗାମୀ ଦିନରେ ଚାଷର ପରିମାଣ ବଢ଼ାଇବା ସହ ଅନ୍ୟ ଚାଷୀଙ୍କୁ ଏଥିରେ ସାମିଲ କରିବାର ଲକ୍ଷ୍ୟ ରଖିଛନ୍ତି ସେ। ଅଞ୍ଚଳର ଜଳବାୟୁ ଓ ମାଟିର ଉପଯୋଗିତା ଅନୁଯାୟୀ ଉଚିତ ପ୍ରଣାଳୀ ଓ ବଜାର ବ୍ୟବସ୍ଥା ସହିତ ଡ୍ରାଗନ ଫ୍ରୁଟ ଭଳି ଉଚ୍ଚମୂଲ୍ୟର ଫସଲ ଚାଷ କଲେ ଚାଷୀଙ୍କ ଆୟ ବୃଦ୍ଧି ପାଇବ ବୋଲି ତାଙ୍କର ମତ। କନ୍ଧମାଳ ର ଜଣେ ସାଧାରଣ ଚାଷୀଙ୍କ ଏହି ସଫଳତା ଏବେ ଅନ୍ୟ ଚାଷୀଙ୍କ ମନରେ ନୂଆ ଆଶା ସୃଷ୍ଟି କରିବ। ଚାଷୀ ଅଧିକ ଆୟ କରି ସ୍ବାବଲମ୍ବୀ ହୋଇପାରିବେ ବୋଲି ସ୍ଥାନୀୟ ଅଞ୍ଚଳର ବରିଷ୍ଠ ନାଗରିକ ରମାକାନ୍ତ ମହାପାତ୍ର କହିଛନ୍ତି ।
<div style=”background-color: #eee; border: 1px solid #cccccc; padding: 5px 20px; margin: 0 Auto; border-radius: 22px;” align=”center”>
<h6>Dharitri – Odisha’s No.1 Odia Daily</h6>
</div>
