ବରଗଡ଼,୩।୭(ପ୍ରେମାନନ୍ଦ ଖମାରୀ)- ରାଜ୍ୟରେ ଡାକ୍ତରମାନଙ୍କ ବିଭିନ୍ନ ଦାବିକୁ ନେଇ ଚାଲିଥିବା ଆନ୍ଦୋଳନ ଯୋଗୁ ସାଧାରଣ ସ୍ୱାସ୍ଥ୍ୟସେବା ଗୁରୁତର ଭାବେ ପ୍ରଭାବିତ ହୋଇଛି। ଡାକ୍ତରଖାନା ଗୁଡ଼ିକରେ ରୋଗୀସେବା ତଥା ଜରୁରୀକାଳୀନ ଚିକିତ୍ସା ବ୍ୟାହତ ହେଉଥିବା ବେଳେ ଶୁକ୍ରବାର ବରଗଡ଼ ଜିଲା ମୁଖ୍ୟ ଡାକ୍ତରଖାନାରେ ଏହାର ଏକ ଚିନ୍ତାଜନକ ଚିତ୍ର ସାମ୍ନାକୁ ଆସିଛି। ଏକ ସଡ଼କ ଦୁର୍ଘଟଣାରେ ଗୁରୁତର ହୋଇ ଆସିଥିବା ଆହତମାନଙ୍କୁ ଠିକ୍ ସମୟରେ ପର୍ଯ୍ୟାପ୍ତ ଚିକିତ୍ସା ନ ମିଳିବାରୁ ସେମାନଙ୍କୁ ବୁର୍ଲା ଭୀମସାର୍କୁ ସ୍ଥାନାନ୍ତର କରାଯାଇଥିବା ଅଭିଯୋଗ ହୋଇଛି।
ସୂଚନା ଅନୁଯାୟୀ, ବରଗଡ଼-ବିଜେପୁର ରାସ୍ତାର ଏକାମ୍ର ଛକ ନିକଟରେ ଆଜି ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଥିଲା। ଏକ ଦ୍ରୁତଗାମୀ ପିକଅପ୍ ଭ୍ୟାନ୍ ଧକ୍କାରେ ୩ ଜଣ ଯୁବକ ଗୁରୁତର ଭାବେ ଆହତ ହୋଇଥିଲେ। ଆହତ ଯୁବକମାନେ ହେଲେ ଧୂସରବାହାଲ ଗ୍ରାମର ମହେନ୍ଦ୍ର ବୁଡ଼େକ (୨୧), ବାନ୍ଦେନବାହାଲ ଗ୍ରାମର ରାକେଶ (୨୪) ଏବଂ ଭୀମା ଭୁଏ (୨୦)। ଦୁର୍ଘଟଣା ପରେ ସ୍ଥାନୀୟ ଲୋକଙ୍କ ସହାୟତାରେ ସେମାନଙ୍କୁ ଉଦ୍ଧାର କରାଯାଇ ତୁରନ୍ତ ଚିକିତ୍ସା ପାଇଁ ବରଗଡ଼ ଜିଲ୍ଲା ମୁଖ୍ୟ ଡାକ୍ତରଖାନାକୁ ଅଣାଯାଇଥିଲା।
ଅଭିଯୋଗ ଅନୁଯାୟୀ, ଆହତମାନଙ୍କୁ ଡାକ୍ତରଖାନା ଅଣାଯିବା ସମୟରେ ସେଠାରେ ଡାକ୍ତରଙ୍କ ଆନ୍ଦୋଳନ ଚାଲିଥିଲା। ଫଳରେ ଜରୁରୀକାଳୀନ ବିଭାଗରେ ରୋଗୀଙ୍କୁ ଦେଖିବା ପାଇଁ ବରିଷ୍ଠ ଡାକ୍ତର ଉପସ୍ଥିତ ନଥିଲେ। ସେଠାରେ ମାତ୍ର ଜଣେ ଜୁନିୟର ଡାକ୍ତର ଉପସ୍ଥିତ ଥିବାରୁ ସେ ଆହତମାନଙ୍କୁ କେବଳ ପ୍ରାଥମିକ ଚିକିତ୍ସା ଯୋଗାଇ ଦେଇଥିଲେ। ମାତ୍ର ଯୁବକମାନଙ୍କ ଅବସ୍ଥା ଗୁରୁତର ଥିବାରୁ ଏବଂ ପର୍ଯ୍ୟାପ୍ତ ଚିକିତ୍ସା ସୁବିଧା ମିଳିପାରି ନଥିବାରୁ ସେମାନଙ୍କୁ ତୁରନ୍ତ ବୁର୍ଲା ସ୍ଥିତ ବୀର ସୁରେନ୍ଦ୍ର ସାଏ ମେଡିକାଲ କଲେଜ ଆଣ୍ଡ ହସ୍ପିଟାଲ (ଭୀମସାର୍) କୁ ସ୍ଥାନାନ୍ତର କରାଯାଇଛି।
ଡାକ୍ତରମାନଙ୍କ ନିଜସ୍ୱ ଦାବି ଯୋଗୁ ଏଭଳି ଜରୁରୀକାଳୀନ ସମୟରେ ଗୁରୁତର ରୋଗୀ ଓ ଆହତମାନେ ହଇରାଣ ହେଉଥିବାରୁ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଜୀବନ ମରଣ ସହ ସଂଗ୍ରାମ କରୁଥିବା ରୋଗୀଙ୍କ ସୁରକ୍ଷା ପାଇଁ ବିକଳ୍ପ ବ୍ୟବସ୍ଥା କରିବାକୁ ସାଧାରଣରେ ଦାବି ହେଉଛି।
