ବରଗଡ଼,୪।୭(ପ୍ରେମାନନ୍ଦ ଖମାରୀ): ବରଗଡ଼ ଜିଲା ବିଜେପୁରସ୍ଥିତ ଏକ ଘରୋଇ ନର୍ସିଂହୋମ୍ରେ ଚିକିତ୍ସାରେ ଅବହେଳା କରାଯାଇଥିବା ଯୋଗୁ ପ୍ରସୂତିଙ୍କ ମୃତ୍ୟୁ ଅଭିଯୋଗ ଘଟଣାକୁ ଜିଲାପାଳ ଆଦିତ୍ୟ ଗୋୟଲ ଗୁରୁତ୍ୱର ସହିତ ନେଇଛନ୍ତି। ଶନିବାର ଜିଲାପାଳ ଗୋୟଲ ଏହି ଘଟଣାକୁ ନେଇ କହିଛନ୍ତି, ବିଜେପୁରସ୍ଥିତ ଅମୃତଧାରା ନର୍ସିଂହୋମ ବିରୋଧରେ ସେଭଳି ଅଭିଯୋଗ ମିଳିଛି। ଅଭିଯୋଗ ପାଇବା ପରେ ଏକ ତଦନ୍ତ କମିଟି ଗଠନ କରାଯାଇଛି। କମିଟିରେ ସ୍ବାସ୍ଥ୍ୟ ବିଭାଗର ଅଧିକାରୀ ମଧ୍ୟ ଅଛନ୍ତି। ତଦନ୍ତ ରିପୋର୍ଟ ମିଳିବା ପରେ ବିହିତ କାର୍ଯ୍ୟାନୁଷ୍ଠାନ ନିଆଯିବ। ତେବେ ତଦନ୍ତ କମିଟିର ରିପୋର୍ଟ କିଭଳି ଆସିବ ଏବଂ ତଦନ୍ତ ପରେ ନର୍ସିଂହୋମ ତଥା ପ୍ରସୂତିଙ୍କୁ ଚିକିତ୍ସା କରିଥିବା ଡାକ୍ତରଙ୍କ ବିରୋଧରେ କିଭଳି କାର୍ଯ୍ୟାନୁଷ୍ଠାନ ନିଆଯିବ, ସେଥିପ୍ରତି ଏବେ ସମସ୍ତଙ୍କ ନଜର ରହିଛି।
ସୂଚନା ଅନୁଯାୟୀ, ଗତମାସ ୨୩ତାରିଖ ସକାଳ ପ୍ରାୟ ୭ଟାରେ ବିଜେପୁର ବ୍ଲକ ବେନିଆଁଚାଳ ପଞ୍ଚାୟତ ଟୁହିଆମାଲ ଗ୍ରାମର ନାରାୟଣ ମହାନନ୍ଦ ତାଙ୍କ ଗର୍ଭବତୀ ସ୍ତ୍ରୀ ନଳିନୀ ୪ମାସର ଅନ୍ତଃସତ୍ତ୍ୱା ଥିବାବେଳେ ପେଟ ଯନ୍ତ୍ରଣା ହେବାରୁ ଚିକିତ୍ସା ପାଇଁ ଉପରୋକ୍ତ ନର୍ସିଂହୋମକୁ ଆଣିଥିଲେ। ଡାକ୍ତରଖାନାକୁ ପହଞ୍ଚିବା ସମୟରେ ଡାକ୍ତର ଉପସ୍ଥିତ ନ ଥିବାରୁ ସେଠାରେ କାର୍ଯ୍ୟରତ ନର୍ସ ନଳିନୀଙ୍କୁ ଇଞ୍ଜେକ୍ସନ, ସାଲାଇନ ଦେଇ ଚିକିତ୍ସା କରିଥିଲେ।
ଅନ୍ୟପଟେ ପେଟ ଯନ୍ତ୍ରଣା ବଢ଼ି ଚାଲିଥିଲା ଏବଂ ଦୀର୍ଘ ସମୟ ଧରି ଡାକ୍ତର ଆସି ନ ଥିଲେ। ଫଳରେ ଜିଲା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରିବା ପାଇଁ ବାରମ୍ବାର ନିବେଦନ ସତ୍ତ୍ୱେ ତାହା କରାଯାଇ ନ ଥିଲା। ଅପରପକ୍ଷେ ବିଳମ୍ବରେ ଅର୍ଥାତ୍ ଦିନ ପ୍ରାୟ ୨ଟାରେ ଡାକ୍ତର ଆସି ଚିକିତ୍ସା ଆରମ୍ଭ କରିଥିଲେ ଏବଂ ବିଳମ୍ବରେ ଅଲଟ୍ରାସାଉଣ୍ଡ କରିଥିଲେ। ଅଲଟ୍ରାସାଉଣ୍ଡ୍ ରିପୋର୍ଟ ଆସିବା ପରେ ଗର୍ଭସ୍ଥ ଶିଶୁ ମୃତ ଥିବା ଦର୍ଶାଇ ଗର୍ଭପାତ କରିଥିଲେ। ତେବେ ଗର୍ଭପାତ ପରେ ତାଙ୍କ ସ୍ତ୍ରୀଙ୍କ ଅବସ୍ଥା ଆହୁରି ବିଗିଡ଼ି ଯାଇଥିଲା ଏବଂ ଏହାପରେ ତାଙ୍କୁ ଜିଲା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିବା ନାରାୟଣ ଅଭିଯୋଗ କରିଛନ୍ତି।
ତେବେ ଜିଲା ମୁଖ୍ୟ ଡାକ୍ତରଖାନାକୁ ଆଣିବା ପରେ ସେଠାରୁ ପୁଣି ତାଙ୍କୁ ଭିମସାର୍, ବୁର୍ଲା ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା ଏବଂ ସେଠାରେ ଚିକିତ୍ସାଧୀନ ଅବସ୍ଥାରେ ନଳିନୀଙ୍କ ମୃତ୍ୟୁ ହୋଇଥିଲା। ଏ ନେଇ ଗତମାସ ୨୯ତାରିଖ ନାରାୟଣ ଜିଲାପାଳଙ୍କଠାରେ ଲିଖିତ ଅଭିଯୋଗ କରିବା ସହିତ ବିହିତ କାର୍ଯ୍ୟାନୁଷ୍ଠାନ ନେବା ପାଇଁ ନିବେଦନ କରିଥିଲେ।
