ଅନୁଗୋଳ ଅଫିସ, ୮।୫: ଆର୍ମି ନିଯୁକ୍ତି ମେଳାରେ ଯୋଗଦେଇ ଶାରୀରିକ ଓ ଡାକ୍ତରୀ ପରୀକ୍ଷାରେ କୃତକାର୍ଯ୍ୟ ହେଲେ। କିନ୍ତୁ ଲିଖିତ ପରୀକ୍ଷା ଏଯାଏ ହେଉ ନ ଥିବାରୁ ଅନୁଗୋଳର ୧୧୮ ଆଶାୟୀ ପରୀକ୍ଷାର୍ଥୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ବୟସ ଗଡ଼ିଯାଉଥିବାରୁ ତୁରନ୍ତ ପରୀକ୍ଷା କରାଯିବା ଦାବିରେ ଏହି ଆଶାୟୀ ଯୁବକମାନେ ଆନ୍ଦୋଳନ ପାଇଁ ରବିବାର ରାଜପଥକୁ ଓହ୍ଲାଇବେ ବୋଲି ଶନିବାର ଅନୁଗୋଳ ଉପଜିଲାପାଳଙ୍କ ସହ ପୋଲିସକୁ ଅବଗତ କରିଛନ୍ତି।
ପ୍ରକାଶ ଯେ, ସମ୍ବଲପୁରଠାରେ ସ୍ଥଳସେନା ନିଯୁକ୍ତି କାର୍ଯ୍ୟାଳୟ (ଏଆର୍ଓ) ପକ୍ଷରୁ ୨୦୨୧ ମାର୍ଚ୍ଚ ୨ରୁ ୧୨ ତାରିଖ ପର୍ଯ୍ୟନ୍ତ ଗୋପାଳପୁରଠାରେ ନିଯୁକ୍ତି ମେଳା କରାଯାଇଥିଲା। ଉକ୍ତ ନିଯୁକ୍ତି ମେଳାରେ ଶାରୀରିକ ପରୀକ୍ଷା ପରେ ମେଡିକାଲ ଯାଞ୍ଚ ହୋଇଥିଲା। ଏହାପରେ ଲିଖିତ ପାରୀକ୍ଷା ପାଇଁ ମେ ୩୦କୁ ତାରିଖ ଧାର୍ଯ୍ୟ କରାଯାଇଥିଲା। କିନ୍ତୁ ସେତେବେଳେ ଦେଶରେ କରୋନାର ମାତ୍ରାଧିକ ପ୍ରଭାବ ଥିବାରୁ ହେବାକୁ ଥିବା ଲିଖିତ ପରୀକ୍ଷାକୁ ବାତିଲ କରାଯାଇ ନୂଆ ତାରିଖ ଜୁଲାଇ ୨୫କୁ ଧାର୍ଯ୍ୟ କରାଯାଇଥିଲା। କିନ୍ତୁ ପରୀକ୍ଷାର ଗୋଟିଏ ଦିନ ପୂର୍ବରୁ ଲିଖିତ ପରୀକ୍ଷା ପୁଣି ବାତିଲ ହୋଇଥିଲା। ସେବେଠାରୁ ପରୀକ୍ଷା ପାଇଁ ଆଉ ତାରିଖ ଦିଆଯାଉନାହିଁ। କେବେ ପରୀକ୍ଷା ହେବ ସେ ନେଇ ମଧ୍ୟ ସ୍ପଷ୍ଟ ଚିତ୍ର ଏଯାଏ ଆସୁନାହିଁ। ଫଳରେ ପରୀକ୍ଷା ଦେବାକୁ ଯୋଗ୍ୟ ବିବେଚିତ ହୋଇଥିବା ଯୁବକମାନେ ଏ ନେଇ ସମ୍ବଲପୁରରୁ ଅନୁଗୋଳ ପର୍ଯ୍ୟନ୍ତ ବିଭିନ୍ନ ବିଭାଗୀୟ ଅଧିକାରୀଙ୍କ ନିକଟକୁ ବାରମ୍ବାର ଧାଉଁଥିଲେ ମଧ୍ୟ କିଛି ସନ୍ତୋଷଜନକ ଉତ୍ତର ମିଳୁନାହିଁ। ଚିଠି ଆସିଲେ ଜଣାଇ ଦିଆଯିବ ବୋଲି କେବଳ କୁହାଯାଉଥିବା ଅଭିଯୋଗ ହେଉଛି। ଇତିମଧ୍ୟରେ ପୂର୍ବପରି କରୋନା ସଂକ୍ରମଣ ଦେଶରେ ନାହିଁ। ଅନ୍ୟ ପାରା ମିଲିଟାରି ନିଯୁକ୍ତି ମଧ୍ୟ ହେଲାଣି। ଏପରି କି ରାଜ୍ୟ ଓ କେନ୍ଦ୍ର ସରକାରଙ୍କ ପକ୍ଷରୁ ପରିଚାଳିତ ଅନ୍ୟାନ୍ୟ ପରୀକ୍ଷା ହେଉଥିବାବେଳେ ଆର୍ମି ନିଯୁକ୍ତି ପରୀକ୍ଷା କାହିଁକି କରାଯାଉନାହିଁ ବୋଲି ଅପେକ୍ଷା କରିଥିବା ଯୁବକମାନେ ପ୍ରଶ୍ନ କରିଛନ୍ତି। ତୁରନ୍ତ ପରୀକ୍ଷା ତାରିଖ ଧାର୍ଯ୍ୟ କରିବା ସହ ବୟସରେ କୋହଳ କରିବାକୁ ସେମାନେ କରିଛନ୍ତି। ତେବେ ପ୍ରତିରକ୍ଷା ବିଭାଗ ପକ୍ଷରୁ ଏହି ପରୀକ୍ଷା ପରିଚାଳନା କରାଯାଉଥିବାରୁ ଜିଲା ପ୍ରଶାସନ କିଛି କରିପାରିବ ନାହିଁ ବୋଲି ପ୍ରଶାସନ ପକ୍ଷରୁ କୁହାଯାଇଛି।
ଭବିଷ୍ୟତରେ ସମସ୍ୟା ହେଲେ କିଏ ଦାୟୀ ରହିବେ
ସୈନ୍ୟବାହିନୀରେ ନିଯୁକ୍ତି ପାଇଁ ରକ୍ତକୁ ପାଣି କରି ପରିଶ୍ରମ କରିଛୁ। ଶାରୀରିକ ଓ ଡାକ୍ତରୀ ପରୀକ୍ଷାରେ ମଧ୍ୟ କୃତକାର୍ଯ୍ୟ ହୋଇଛୁ। କିନ୍ତୁ ଲିଖିତ ପରୀକ୍ଷା କରାଯାଉନାହିଁ। ଯଦି ଆଗକୁ କୌଣସି କାରଣରୁ କିଛି ଅସୁବିଧା ହେଲା, ତେବେ ଏ ନେଇ କିଏ ଦାୟୀ ରହିବେ।
-ଅବନୀ ରଞ୍ଜନ ସାହୁ
ସମସ୍ତେ ଚିନ୍ତାରେ ରହୁଛନ୍ତି
ପରୀକ୍ଷା କେବେ କରାଯିବ ତାହା କୁହାଯାଉ ନାହିଁ। ଏହାକୁ ନେଇ ସମସ୍ତେ ଚିନ୍ତାରେ ରହୁଛନ୍ତି। ଦେଶରେ ବେକାରି ସମସ୍ୟା ବଢ଼ୁଥିବା ବେଳେ ଆର୍ମି ନିଯୁକ୍ତି ଏ ଦିଗରେ କିଛିଟା ଆଶ୍ୱାସନା ହୋଇପାରନ୍ତା। ସରକାର ଏ ଦିଗରେ ତୁରନ୍ତ ପଦକ୍ଷେପ ନିଅନ୍ତୁ।
-ବିବେକ ଦେବତା
ଚୂଡ଼ାନ୍ତ ତାରିଖ ପ୍ରଦାନ କରାଯାଉ
ଲିଖିତ ପରୀକ୍ଷା ବାରମ୍ବାର ବାତିଲ ପରେ ଆଗାମୀ ପରୀକ୍ଷା ନେଇ ସରକାର ଚୁପ୍ ହୋଇ ବସି ଯାଇଛନ୍ତି। ଆଶାୟୀ ଯୁବକମାନଙ୍କ କଥା ଚିନ୍ତା କରି କେନ୍ଦ୍ର ସରକାର ନିର୍ଦ୍ଦିଷ୍ଟ ତାରିଖ ପ୍ରଦାନ କରନ୍ତୁ। ଏହା ହେଲେ ଆଶାୟୀମାନେ ଆଶ୍ୱସ୍ତି ଲାଭ କରିବେ।
-ସୌମ୍ୟରଞ୍ଜନ ଗଡ଼ନାୟକ
ବୟସ କୋହଳ କରାଯାଉ
ଲିଖିତ ପରୀକ୍ଷା କରାଯାଉ ନ ଥିବାବେଳେ ଆଶାୟୀମାନଙ୍କ ବୟସ ମଧ୍ୟ ବଢ଼ିବାରେ ଲାଗିଛି। ଆଉ କିଛି ଦିନ ପରେ ନିଯୁକ୍ତି ବୟସ ଚାଲିଯିବ। ଫଳରେ ସେମାନଙ୍କ ପାଇଁ ସୁଯୋଗ ରହିବ ନାହିଁ। ତେଣୁ ୨ ବର୍ଷ ବୟସ କୋହଳ କରାଯାଉ।
-ଚନ୍ଦ୍ରକାନ୍ତ ପ୍ରଧାନ
