ମଥୁରାନଗରୀ,୮।୧(ପ୍ରେମାନନ୍ଦ ଖମାରୀ):ବରଗଡ଼ ଧନୁଯାତ୍ରା ମହୋତ୍ସବ ସମିତିର ଏନ୍ଫୋର୍ସମେଣ୍ଟ କମିଟିର ଏକ ପ୍ରତନିଧି ଦଳ ମଙ୍ଗଳବାର ସ୍ଥାନୀୟ ଜର୍ଜ ହାଇସ୍କୁଲ ପଡ଼ିଆରେ ଲାଗିଥିବା ମୀନାବଜାର ଏବଂ ପାର୍ଶ୍ୱବର୍ତ୍ତୀ ଅଞ୍ଚଳରେ ଅତର୍କିତ ଚଢ଼ାଉ କରିଥିଲା। ମାଜିଷ୍ଟ୍ରେଟ ଦାୟିତ୍ୱରେ ରହିଥିବା ବିଡ଼ିଓ ବି. ଡୁଙ୍ଗଡୁଙ୍ଗଙ୍କ ଉପସ୍ଥିତି ଏବଂ ଏନ୍ଫୋର୍ସମେଣ୍ଟ କମିଟିର ଆବାହକ ଭୀଷ୍ମଦେବ ସରାଫଙ୍କ ନେତୃତ୍ୱରେ ଏହି ଚଢ଼ାଉ ହୋଇଥିଲା। ଚଢ଼ାଉବେଳେ ବିଭିନ୍ନ ଜାଗାରେ ବେଆଇନ ପାର୍କିଂ ଷ୍ଟାଣ୍ଡ କରାଯାଉଥିବା ଯୋଗୁ ୨୦ହଜାର ଟଙ୍କା ଜରିମାନା ଅସୁଲ କରାଯାଇଥିଲା। ସେହିପରି ସରକାରୀ ସେବା ଯୋଗାଇବା ପାଇଁ ଉଦ୍ଦିଷ୍ଟ ଜାଗାକୁ ବିନା ଟେଣ୍ଡରରେ ଆବଣ୍ଟନ ଅଭିଯୋଗକୁ ନେଇ ମଧ୍ୟ ଏନ୍ଫୋର୍ସମେଣ୍ଟ କମିଟି ଗୁରତ୍ୱର ସହିତ ନେଇଥିଲା। ସମ୍ପୃକ୍ତ ଜାଗାକୁ ଯାଇ କମିଟି ସ୍ଥିତି ଅନୁଧ୍ୟାନ କରିଥିଲା। ସେହି ଜାଗା ନେଇଥିବା ବ୍ୟବସାୟୀଙ୍କୁ ପଚରାଉଚରା କରାଯାଇଥିଲା। ସେ ନେଇ ବୁଧବାର ପୂର୍ବାହ୍ନ ୧୧ଟା ୩୦ମିନିଟ୍ରେ ଉପଜିଲାପାଳଙ୍କ କାର୍ଯ୍ୟାଳୟରେ ସମ୍ପୃକ୍ତ ବ୍ୟବସାୟୀ, ଉପଜିଲାପାଳ ଏବଂ ଏନ୍ଫୋର୍ସମେଣ୍ଟ କମିଟି ଉପସ୍ଥିତିରେ ବିନା ଟେଣ୍ଡରରେ ଜମି ଆବଣ୍ଟନ ନେଇ ଆଲୋଚନା କରାଯିବ ବୋଲି କମିଟିର ଆବାହକ ସରାଫ କହିଛନ୍ତି। ଏହାସହିତ ଝୁଲା, ଦୋଳିରେ ମାତ୍ରାଧିକ ଟିକେଟ୍ ଦର ରହିଥିବା ଅଭିଯୋଗ ନେଇ ମଧ୍ୟ ସମ୍ପୃକ୍ତ ବ୍ୟବସାୟୀଙ୍କୁ କମିଟି ତାଗିଦ୍ କରିଥିଲା ଏବଂ ନିର୍ଦ୍ଧାରିତ ୫୦ଟଙ୍କାରୁ ଅଧିକ ନେଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସୂଚାଇ ଦିଆଯାଇଛି ବୋଲି ସରାଫ ସୂଚନା ଦେଇଛନ୍ତି। ଚଢ଼ାଉରେ ଅନ୍ୟମାନଙ୍କ ମଧ୍ୟରେ କମିଟିର ନବକିଶୋର ପାଣିଗ୍ରାହୀ, ପରେଶ ବିଶି, ଜୟପ୍ରକାଶ ପ୍ରଧାନ, ରାଜସ୍ବ ନିରୀକ୍ଷକ ସଞ୍ଜୀବ ମିଶ୍ର, ପୋଲିସ ଏଏସ୍ଆଇ ସୁଦର୍ଶନ ପାଣ୍ଡେ ପ୍ରମୁଖ ଉପସ୍ଥିତ ଥିଲେ।
