ସାକ୍ଷୀଗୋପାଳ, ୨୫।୬(ସ୍ବ.ପ୍ର./ଡି.ଏନ୍.ଏ.): ପୁରୀ ଜିଲା ବକୁଳବନରେ ରାଜ୍ୟ ସରକାରଙ୍କ ଉଦ୍ୟମରେ ପ୍ରତିଷ୍ଠା କରାଯାଉଥିବା ଓଡ଼ିଆ ବିଶ୍ୱବିଦ୍ୟାଳୟ ପାଇଁ ଆବଶ୍ୟକ ହେଉଥିବା ଜମି ପାଇଁ ଶୁକ୍ରବାର ସତ୍ୟବାଦୀ ପ୍ରଶାସନ ପକ୍ଷରୁ ଉଚ୍ଛେଦ ପ୍ରକ୍ରିୟା ଆରମ୍ଭ କରାଯାଇଛି।
ସେହି ଅନୁସାରେ ଉକ୍ତ ଜମିରୁ ପ୍ଲଟ ନମ୍ବର ୬୫ରେ ଥିବା ତିନି ପରିବାର ଫଇଜୁ ଖାନ, ଖଇଜୁ ଖାନ୍ ଓ ବିଜୟ ନାୟକଙ୍କ ପରିବାର ରହିଥିବାରୁ ଉଚ୍ଛେଦ ପକ୍ରିୟା ବେଳେ ସେମାନେ ବିରୋଧ କରି ପ୍ରଥମେ ଥଇଥାନ କରାଯାଉ ବୋଲି ତହସିଲଦାର ଜୟନ୍ତ କୁମାର ଜୟସିଂଙ୍କୁ ଅନୁରୋଧ କରିଥିଲେ। ଏ ନେଇ ତହସିଲଦାର ଉକ୍ତ ପରିବାରଙ୍କ ସହ ଆଲୋଚନା କରି ଏହି ତହସିଲ ଅନ୍ତର୍ଗତ କୋଟଉପର ଥିବା ଜମିକୁ ଚିହ୍ନଟ କରି ଖଇଜୁ ଓ ଫଇଜୁ ପରିବାରକୁ ୪ ଡିସିମିଲି ଜମି ଯୋଗାଇ ଦିଆଯିବା ସହ ୪ ରୁ ୬ ମାସ ମଧ୍ୟରେ ଜମିର ରେକର୍ଡ ପ୍ରସ୍ତୁତ କରିଦିଆଯିବ ବୋଲି କହିଥିଲେ। ଏଥିସହ ବିଜୟ ନାୟକଙ୍କ ପରିବାରକୁ ଇନ୍ଦିରା ଆବାସ ଯୋଜନାରେ ଘର ଯୋଗାଇ ଦିଆଯିବ ବୋଲି ତହସିଲଦାର ପ୍ରତିଶ୍ରୁତି ଦେବା ପରେ ଉଚ୍ଛେଦ ହୋଇଥିଲା। ସେହିଭଳି ସାକ୍ଷୀଗୋପାଳ ମନ୍ଦିର କାର୍ଯ୍ୟାଳୟରେ ଦୀର୍ଘଦିନ ଧରି ଝାଡୁଦାର ଥିବା ସତ୍ୟଭାମା ନାୟକ ଓ ସଂଯୁକ୍ତା ନାୟକ ଠାକୁରଙ୍କ ଜମି ପ୍ଲଟ ନମ୍ବର ୬୨ରେ ଘର କରି ରହୁଛନ୍ତି। ଏହି ଜାଗାଟି ମଧ୍ୟ ବିଶ୍ୱବିଦ୍ୟାଳୟ ପାଇଁ ଦିଆଯାଇଥିବାରୁ ଉଭୟ ପରିବାରଙ୍କୁ ସେଠାରୁ ହଟିବା ପାଇଁ ନୋଟିସ ଜାରି ହୋଇଛି। ହେଲେ ମହିଳାଦ୍ୱୟ ଝାଡୁ ମାରି ଦିନକୁ ତିରିଶ ଟଙ୍କା ବେତନ ପାଇ ନୂଆ ଘର କିମ୍ବା ଭଡା ଘର କରି ରହିବା ସମ୍ଭବ ନ ଥିବାରୁୁ ଉପଯୁକ୍ତ ଥଇଥାନ ପାଇଁ ଅନୁରୋଧ କରିଥିଲେ। ଉଭୟଙ୍କୁ ସହଯୋଗ କରିବାକୁ ତହସିଲଦାର ପ୍ରତିଶ୍ରୁତି ଦେଇଛନ୍ତି। ଏହି ଉଚ୍ଛେଦ କାର୍ଯ୍ୟକ୍ରମରେ ଏକ ପ୍ଲାଟୁନ ପୋଲିସ ଫୋର୍ସ ସହ ଅତିରିକ୍ତ ତହସିଲଦାର ସନ୍ତୋଷ ପାଣିଗ୍ରାହୀ, ଥାନାଧିକାରୀ ବିଜୟକେତନ ବେହେରା, ଏଏସ୍ଆଇ କୃଷ୍ଣଚନ୍ଦ୍ର ବେହେରା, ଆରଆଇ ଶ୍ୟାମସୁନ୍ଦର ପୂର୍ତ୍ତି, ତହସିଲ ସୁପରଭାଇଜର ମୋନାଲିସା ବରାଳ ପ୍ରମୁଖ ଉପସ୍ଥିତ ଥିଲେ।
