ମିରଟ, ୨୭।୮: ଉତ୍ତର ପ୍ରଦେଶର ମିରଟ ସହରରୁ ଚକିତ କଲାଭଳି ଏକ ଘଟଣା ସାମ୍ନାକୁ ଆସିଛି। ସ୍ଥାନୀୟ ମଓ୍ବାନା ଅଞ୍ଚଳର ଜଣେ ଯୁବତୀଙ୍କୁ ଡାକ୍ତର ମୃତ ଘୋଷଣା କରିଥିଲେ। ଏହାପରେ ଶୋକସନ୍ତପ ପରିବାର ଲୋକ ଯେତେବେଳେ ଯୁବତୀଙ୍କ ଅନ୍ତିମ ସଂସ୍କାର ପାଇଁ ପ୍ରସ୍ତୁତି ଚଳାଇଥିଲେ ହଠାତ୍ ଚମତ୍କାର ଘଟିଲା। ଯୁବତୀଜଣଙ୍କ ଜୀବନ୍ତ ହୋଇଉଠିଲେ। ଏହି ଘଟଣା ଏବେ କେବଳ ମିରଟ ନୁହେଁ ସାରା ରାଜ୍ୟରେ ଚର୍ଚ୍ଚାର ବିଷୟ ପାଲଟିଛି।
ଜଣାପଡ଼ିଛି ଯେ, ମୋହଲ୍ଲା ମୁନ୍ନା ଲାଲ୍ ନିବାସୀ ୨୦ ବର୍ଷୀୟା ଯୁବତୀ ଅସ୍ମା ଗତ ୨୪ ତାରିଖରେ ହୃଦ୍ଘାତର ଶିକାର ହୋଇଥିଲେ। ଏହାପରେ ଗୁରୁତର ଅବସ୍ଥାରେ ପରିବାର ଲୋକ ଅସ୍ମାଙ୍କୁ ଦିଲ୍ଲୀର ଏକ ହସ୍ପିଟାଲରେ ଭର୍ତ୍ତି କରାଇଥିଲେ। କିନ୍ତୁ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ। ଏହାପରେ ପରିବାର ଲୋକ ଅସ୍ମାଙ୍କ ଶବକୁ ଧରି ଉତ୍ତର ପ୍ରଦେଶ ଫେରିଥିଲେ। ବାଟରେ ସେମାନେ ପରିବାର ଲୋକଙ୍କୁ ଫୋନ କରି ଅନ୍ତିମ ସଂସ୍କାର ପାଇଁ ପ୍ରସ୍ତୁତି କରିବାକୁ କହିଥିଲେ। ତେବେ ଅନ୍ତିମ ସଂସ୍କାର ସମୟରେ ଚମତ୍କାର ଘଟଣା ଘଟିଲା। ହଠାତ୍ ଅସ୍ମା ଜୀବନ୍ତ ହୋଇଉଠିଲେ। ଫଳରେ ପରିବାର ଲୋକଙ୍କ ମଧ୍ୟରେ ପୁଣିଥରେ ଖୁସିର ଲହରୀ ଖେଳିଗଲା। କିନ୍ତୁ ଜୀବୀତ ହେବାର ୧୨ ଘଣ୍ଟା ପରେ ଅସ୍ମାଙ୍କ ମୃତ୍ୟୁ ହୋଇଥିଲା। ଏହି ଘଟଣାକୁ ନେଇ ଏବେ ସ୍ଥାନୀୟ ଅଞ୍ଚଳବାସୀ ଆଶ୍ଚର୍ଯ୍ୟପ୍ରକଟ କରିଛନ୍ତି।
