ବଲାଙ୍ଗୀର ଅଫିସ, ୨୭ା୮-ବଲାଙ୍ଗୀର ଜିଲା ବଙ୍ଗୋମୁଣ୍ଡାର ଝିଅ ଶୀତଲ ଜୈନ୍ ଏକ ବିରଳ ଗୌରବର ଅଧିକାରୀ ହୋଇଛନ୍ତି ା ଇଂଲଣ୍ଡର ଅକ୍ସଫୋର୍ଡ ୟୁନିଭରସିଟିରେ ଇତିହାସ ବିଷୟରେ ପିଏଚ୍ଡି କରିବା ପାଇଁ ସେ ମନୋନୀତ ହୋଇଛନ୍ତି। ଅକ୍ସଫୋର୍ଡ ୟୁନିଭରସିଟିର ଇତିହାସ ବିଭାଗରେ ପିଏଚ୍ଡି ପାଠ୍ୟକ୍ରମ ପାଇଁ ୫୪ଟି ସିଟ୍ ରହିଛି ା ଏଥିରୁ କେବଳ ଭାରତୀୟଙ୍କ ପାଇଁ ଉର୍ଦ୍ଦିଷ୍ଟ ଗୋଟିଏ ମାତ୍ର ସିଟ୍ ପାଇଁ ଶୀତଲ ଯୋଗ୍ୟ ବିବେଚିତ ହୋଇଥିବାରୁ ଏହା ରାଜ୍ୟ ପାଇଁ ଗୌରବ ଆଣି ଦେଇଛି ା
ଶୀତଲ ଦିଲ୍ଲୀ ବିଶ୍ୱବିଦ୍ୟାଳୟରୁ ସ୍ନାତକ ଡିଗ୍ରୀ ହାସଲ କରିବା ପରେ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ(ଜେଏନ୍ୟୁ)ରେ ଇତିହାସରେ ସ୍ନାତକୋତ୍ତର ଓ ଏମ୍ଫିଲ କରୁଥିଲେ ା ଅକ୍ସଫୋର୍ଡରେ ପିଏଚ୍ଡି କରିବାକୁ ମନସ୍ଥ କରି ଶୀତଲ ଆବେଦନ କରିଥିଲେ ା ଚଳିତ ମାସରେ ଭାରତୀୟଙ୍କ ନିମନ୍ତେ ଉର୍ଦ୍ଦିଷ୍ଟ ଏକମାତ୍ର ପିଏଚ୍ଡି ସିଟ୍ରେ ଶୀତଲ ମନୋନୀତ ହୋଇଛନ୍ତି। ଶୀତଲ କହିଛନ୍ତି, ସେ ଆବେଦନ କଲାବେଳେ ତାଙ୍କର ଗବେଷଣା ସନ୍ଦର୍ଭ, ୩ ବର୍ଷର ଏକାଡେମିକ୍ ପ୍ରଫେଶନାଲ ଦାଖଲ କରିଥିଲେ ା ଏଥିପାଇଁ ସେ ତାଙ୍କର ଗାଇଡ୍, ସୁପରଭାଇଜର, ମାତାପିତାଙ୍କୁ ଶ୍ରେୟ ଦେଇଛନ୍ତି ା ସେମାନଙ୍କ ସହଯୋଗରେ ସେ ଏହି ସଫଳତା ପାଇଥିବା କହିଛନ୍ତି ା ବଙ୍ଗୋମୁଣ୍ଡା ନିବାସୀ ଆଡଭୋକେଟ୍ ତଥା ବ୍ୟବସାୟୀ ଜୟପ୍ରକାଶ ଜୈନ୍ ଓ କାନ୍ତା ଜୈନଙ୍କ ଝିଅ ଶୀତଲ ବରଗଡସ୍ଥିତ ବିକାଶ ସ୍କୁଲରେ ପଢ଼ିବା ପରେ ଦିଲ୍ଲୀ ବିଶ୍ୱବିଦ୍ୟାଳୟରେ ସ୍ନାତକ ଡିଗ୍ରୀ ହାସଲ କରିଥିଲେ ା ଶୀତଲଙ୍କ ଏହି ସଫଳତା ସମ୍ପର୍କରେ ଜାଣିବା ପରେ ତାଙ୍କ ପାଖକୁ ଶୁଭେଚ୍ଛାର ସୁଅ ଛୁଟିଛି ା
