ପାରାଦୀପ,୫।୧୨(ସ୍ବ.ପ୍ର.): ପାରାଦୀପ ବନ୍ଦର ଅଞ୍ଚଳବାସୀଙ୍କ ଏବେଠାରୁ ପାଣି ପାଇଁ ଭାଳେଣି ପଡିଲାଣି। କାରଣ ବନ୍ଦର ପ୍ରଶାସନ ସମସ୍ତ ଅଧିବାସୀଙ୍କୁ ପାଣି କମ୍ ବ୍ୟବହାର କରିବାକୁ ଡାକବାଜି ଯନ୍ତ୍ର ଯୋଗେ ସୂଚନା ଦେଇଛନ୍ତି। ତାଳଦଣ୍ଡା କେନାଲର ନବୀକରଣ ପାଇଁ ପାରାଦୀପ ଅଞ୍ଚଳକୁ ପାଣି ଯୋଗାଣ ବନ୍ଦ ରହିବ। ଏଥିଯୋଗୁ ବନ୍ଦର ପ୍ରଶାସନ ଏଭଳି କଟକଣା ଲଗାଇବାକୁ ଯାଉଛନ୍ତି। ବନ୍ଦର ଜନସ୍ବାସ୍ଥ୍ୟ ବିଭାଗର ନିର୍ବାହୀ ଯନ୍ତ୍ରୀ ବିନାୟକ ପ୍ରଧାନ ସର୍ବସାଧାରଣଙ୍କ ଉଦ୍ଦେଶ୍ୟରେ ଜାରି କରିଥିବା ବିଜ୍ଞପ୍ତି(ପିଏଚଡି, ଏମ, ଇଏସ୍ଟିଟି/୨୭।୨୨) ଗତ ୨ ତାରିଖରେ ଦର୍ଶାଇଛନ୍ତି। ଅର୍ଥାତ ଏବେଠାରୁ ୨୦୨୧ ଜୁନ୍ ୧୫ ପର୍ଯ୍ୟନ୍ତ ପାଣି ଉପରେ କଟକଣା ବଳବତ୍ତର ରହିବ। ମୁଖ୍ୟତଃ ନେହେରୁ ବଙ୍ଗଳା, ଅଠରବାଙ୍କୀ, ରେଳବାଇ କଲୋନୀ, ଡକ୍ ଅଞ୍ଚଳ, ବୃନ୍ଦାବନ କଲୋନୀ, ଜଗନ୍ନାଥ କଲୋନୀ, ମଧୁବନ କଲୋନୀ, ନୂଆବଜାର କଲୋନୀ, ସିଆଇଏସ୍ଏଫ୍ କଲୋନୀ, ଷଣ୍ଢକୁଦ ଅଞ୍ଚଳକୁ ପାଣି ଯୋଗାଣରେ କଟକଣା ରହିବ। ଚଳଣି ପାଇଁ ଯେତିକି ପାଣି ଯୋଗାଣ କରାଯିବ ତାକୁ ସୁବିନିଯୋଗ କରିବା ସହ ପ୍ରଶାସନକୁ ସହଯୋଗ କରିବାକୁ ନିବେଦନ କରିଛନ୍ତି।
ବନ୍ଦରାଞ୍ଚଳର ଅଧିବାସୀଙ୍କୁ ପ୍ରତିଦିନ ଦୁଇଥର ଜଳଯୋଗାଣ କରାଯାଏ। ଏହି ପାଣି ରାଜ୍ୟ ସରକାରଙ୍କଠାରୁ ବନ୍ଦର ଆଣିଥାନ୍ତି। କଟକ ଜୋବ୍ରାରୁ ପାଣି ତାଳଦଣ୍ଡା କେନାଲ ଦେଇ ବନ୍ଦର ଜଳାଶୟକୁ ଆସେ। ସେଠାରେ ଜଳକୁ ବିଶୋଧନ କରାଯାଇ ଯୋଗାଇ ଦିଆଯାଏ। ୨୦୧୩ରୁ ପ୍ରତିବର୍ଷ ଏଭଳି ଜଳସଙ୍କଟ ପାରାଦୀପରେ ଲାଗି ରହିଛି। ଖରାଦିନେ ଲୋକମାନେ ଅସୁବିଧା ଭୋଗୁଥିବା ବିଗତବର୍ଷରେ ଦେଖିବାକୁ ମିଳିଛି। ଚଳିତବର୍ଷ ସମାନ ସମସ୍ୟାକୁ ନେଇ କଲୋନୀବାସୀଙ୍କ ଚିନ୍ତା ବଢିବାରେ ଲାଗିଲାଣି। ଏ ସମ୍ପର୍କରେ ଜଳସମ୍ପଦ ବିଭାଗର କନିଷ୍ଠ ଯନ୍ତ୍ରୀ ଦେବାଶିଷ ମହାନ୍ତିଙ୍କୁ ପଚାରିବାରେ କଟକର ଜୋବ୍ରାଠାରୁ ବିରିବାଟୀ ଯାଏ ତାଳଦଣ୍ଡା କେନାଲ ସଫା କରାଯିବାର ପ୍ରସ୍ତାବ ଥିବାରୁ ପାଣି ସପ୍ଲାଇ ବନ୍ଦ କରାଯାଇଛି। ପାରାଦୀପ ଶିଳ୍ପାଞ୍ଚଳକୁ ପାଣି ଯୋଗାଇବାକୁ କଟକ-ପାରାଦୀପ ତାଳଦଣ୍ଡା କେନାଲର ଚୌଧୁରୀଗଡାଠାରେ ବିକଳ୍ପ ବ୍ୟବସ୍ଥା କରାଯାଇଛି। ମହାନଦୀରୁ ମୋଟର ଯୋଗେ ପାଣି ଉଠାଇ କେନାଲରେ ଛଡାଯିବ। ପ୍ରାୟତଃ ପାଣି ପାଇଁ ସେପରି କିଛି ଅସୁବିଧା ହେବନାହିଁ ବୋଲି ସେ କହିଛନ୍ତି।
