ହାଟଡିହୀ,୧ା୯(ଡି.ଏନ୍.ଏ.): କେନ୍ଦୁଝର ଜିଲା ହାଟଡିହୀ ବ୍ଲକ ଡଅଁର ପଞ୍ଚାୟତରେ ସରକାରୀ ଅନୁଦାନ ଆତ୍ମସାତ ହୋଇଥିବା ନେଇ ଓଡ଼ିଶା ଲୋକାୟୁକ୍ତଙ୍କ ତଦନ୍ତକାରୀ ଦଳ ସେପ୍ଟେମ୍ବର ୨ରେ ବ୍ଲକ କାର୍ଯ୍ୟାଳୟରେ ପହଞ୍ଚି ପ୍ରାଥମିକ ତଦନ୍ତ କରିବେ। ଏ ବାବଦରେ ଲୋକାୟୁକ୍ତଙ୍କ କାର୍ଯ୍ୟାଳୟ ପକ୍ଷରୁ ଜଣାଯାଇଛି। ଚିଠି ନଂ ୬୬୯୯ ଏବଂ ୬୭୦୧/୩୦.୮.୨୨ରେ ପୂର୍ବତନ ପିଇଓ ରମେଶ ମାଝି ଏବଂ ଜିଆରଏସ୍ ବିନୟ ମଲିକଙ୍କୁ ବିଡିଓଙ୍କ ଜରିଆରେ ନୋଟିସ ଜାରି କରାଯାଇଛି। ଉଭୟ ପିଇଓ ଏବଂ ଜିଆରଏସ୍ଙ୍କ ବୟାନ ସଂଗ୍ରହ କରାଯିବ ବୋଲି ନୋଟିସ୍ରେ ଉଲ୍ଲେଖ ରହିଛି। ସେହିପରି ଚିଠି ନଂ ୬୬୯୮/୩୦.୦୯.୨୨ (ତାରିଖକୁ ନେଇ ସନ୍ଦେହ) ଅନୁସାରେ ସେପ୍ଟେମ୍ବର ୨ ଏବଂ ୩ ତାରିଖ ବ୍ଲକ କାର୍ଯ୍ୟାଳୟରେ ତଦନ୍ତ ହେବା ସହ ଇନ୍କ୍ୱାରୀ ଦଳ ଘଟଣାସ୍ଥଳ ପରିଦର୍ଶନ କରିବ। ତଦନ୍ତ ସମୟରେ ଏବିଡିଓ ଏବଂ ଅନ୍ୟ ସମ୍ପୃକ୍ତ କର୍ମଚାରୀ ଉପସ୍ଥିତ ରହିବା ପାଇଁ ବିଡିଓଙ୍କୁ ଜଣାଯାଇଛି। ଏଥିସହ ସମ୍ପୃକ୍ତ ପଞ୍ଚାୟତର ସରପଞ୍ଚ ଏବଂ ପିଇଓ ଧାର୍ଯ୍ୟ ତାରିଖରେ ଉପସ୍ଥିତ ରହିବା ପାଇଁ ସେମାନଙ୍କୁ ସୂଚନା ଦେବାକୁ ମଧ୍ୟ କୁହାଯାଇଛି।
ସୂଚନାଯୋଗ୍ୟ, ପୂର୍ବତନ ସରପଞ୍ଚ ହିସି ହେମ୍ବ୍ରମ ପଞ୍ଚାୟତରେ ଭତ୍ତା, ଏସ୍ଏଫ୍ସି, ସିଏଫ୍ସି, ପ୍ରଧାନମନ୍ତ୍ରୀ ଆବାସ ଅନୁଦାନ ଆତ୍ମସାତ ହୋଇଥିବା ନେଇ ଅଭିଯୋଗ କରିଥିଲେ। ଏଥିରେ ଜିଲାପାଳ ଏବଂ ଅନ୍ୟମାନଙ୍କୁ ପକ୍ଷଭୁକ୍ତ କରାଯାଇଛି। କେସ ନଂ ଏଲଓ୍ବାଇ ୭୫୮/୨୦୨୧ ଅଟେ।
ସମ୍ପୃକ୍ତ ସରପଞ୍ଚ ଜଣକ ପୂର୍ବରୁ ଜଣେ ଜିଆରଏସ୍ଙ୍କୁ ମାଡ଼ ମାରିବା ଅଭିଯୋଗରେ ତାଙ୍କ ନାମରେ ମାମଲା ରୁଜୁ ହେବା ସହ ସେ ନିଲମ୍ବିତ ହୋଇଥିଲେ। ପରେ ଓଡ଼ିଶା ହାଇକୋର୍ଟ ଏହି ନିଲମ୍ବନ ଉପରେ ସ୍ଥଗିତାଦେଶ ଜାରି କରିଥିଲେ। ପିଇଓ ରମେଶ ମାଝି ଏବଂ ଜିଆରଏସ୍ ବିନୟ ମଲିକ କହିଛନ୍ତି, ସରକାରୀ ଅନୁଦାନ ଆତ୍ମସାତ ହୋଇନି। ପୂର୍ବତନ ସରପଞ୍ଚ ଜଣକ ଏପରି ମିଥ୍ୟା ଅଭିଯୋଗ ଆଣି ଅଯଥା ହଇରାଣ କରୁଛନ୍ତି।
