କୋରାପୁଟ,୭।୨(ସ୍ବ.ପ୍ର.): କୋରାପୁଟ ଜିଲା ପାଡୁଆ ଅଞ୍ଚଳରୁ କୋରାପୁଟକୁ ଗଞ୍ଜେଇ ଚାଲାଣ ବେଳେ ଲମତାପୁଟ ପୋଲିସ ଗଞ୍ଜେଇ ସହ ୩ଟି ବାଇକ୍ ଜବତ କରିଛି। ପୋଲିସ ଘଟଣାର ସମ୍ପୃକ୍ତ ୫ ଜଣଙ୍କୁ ଗିରଫ କରିଛି। ସେମାନେ ହେଲେ ପାଡୁଆ ଗ୍ରାମର ବାବୁଲା ବାଟଗରିଆ, ସେମିଳିଗୁଡ଼ା ଅଞ୍ଚଳର ପ୍ରମୋଦ ମଙ୍ଗରାଜ, ରାଜୀବ ଖିଲ, ରବିକିଶୋର ପଟ୍ଟନାୟକ ଓ କୋରାପୁଟର ମୋତିରାମ ଗଣ୍ଡା। ଗିରଫ ଅଭିଯୁକ୍ତଙ୍କ ମଧ୍ୟରେ ୪ ଜଣ କଲେଜ ଛାତ୍ର ରହିଥିବା ଜଣାପଡିଛି।
ମିଳିଥିବା ସୂଚନା ମୁତାବକ, ରବିବାର ବିଳମ୍ବିତ ରାତିରେ ଲମତାପୁଟ ପୋଲିସ ପକ୍ଷରୁ ଲମତାପୁଟ- ପାଡୁଆ ରାସ୍ତାରେ ଗାଡ଼ି ଯାଞ୍ଚ କରାଯାଉଥିଲା। ସେତିକିବେଳେ ୩ଟି ବାଇକ୍ ଦ୍ରୁତ ଗତିରେ ପୋଲିସକୁ ଚକମା ଦେଇ ଫେରାର ହୋଇଯାଇଥିଲା। ଏନେଇ ପୋଲିସର ଏକ ଟିମ୍ ସେମାଙ୍କୁ ପିଛା କରି ସ୍ଥାନୀୟ କାଡାମ ଗାଁ ଛକ ନିକଟରେ ବାଇକକୁ ଧରିବାରେ ସଫଳ ହୋଇଥିଲା। ପୋଲିସ ଟିମ୍ ଯାଞ୍ଚ ବେଳେ ସେମାନଙ୍କଠାରୁ ୩ଟି ବସ୍ତାରେ ଥିବା ୭୫ କେଜି ଗଞ୍ଜେଇ ଜବତ କରିଥିଲା। ଜବତ ଗଞ୍ଜେଇର ଆନୁମାନିକ ମୂଲ୍ୟ ୭ ଲକ୍ଷ ଟଙ୍କା ହେବ ବୋଲି ପୋଲିସ ପକ୍ଷରୁ କୁହାଯାଇଛି। ଏନେଇ ପୋଲିସ ଏକ ମାମଲା ରୁଜୁ କରି ଘଟଣାର ଅଧିକ ତଦନ୍ତ ଚଳାଇଛି।
