ଭୁବନେଶ୍ୱର,୪।୮(ବ୍ୟୁରୋ): ରାଜ୍ୟରେ ଦିନକୁ ଦିନ ବଢ଼ିବାରେ ଲାଗିଛି କରୋନା ସଂକ୍ରମଣ। ଦୈନିକ ୧ହଜାରରୁ ଅଧିକ ବ୍ୟକ୍ତି କରୋନା ଆକ୍ରାନ୍ତ ଚିହ୍ନଟ ହେଉଛନ୍ତି। ଏପରି ସ୍ଥିତିରେ କୋଭିଡ ଯୋଦ୍ଧାମାନଙ୍କ ତ୍ୟାଗକୁ ସ୍ମରଣ କରିବା ଏବଂ ସମ୍ମାନ ଜଣାଇବା ଲାଗି ବୁଧବାର ସନ୍ଧ୍ୟା ୬ଟାରେ ନୀରବ ପ୍ରାର୍ଥନା ଲାଗି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟବାସୀଙ୍କୁ ନିବେଦନ କରିଛନ୍ତି। ନିଜ ଘରେ ଅଥବା ବାହାରେ ଥାଆନ୍ତୁ ନା କାହିଁକି, ସେଠାରେ ଛିଡ଼ା ହୋଇ ୧ ମିନିଟ୍ ନୀରବ ପ୍ରାର୍ଥନା କରନ୍ତୁ। ଏଥିସହ ଶପଥ କାର୍ଯ୍ୟକ୍ରମରେ ଭାଗ ନେବାକୁ ମୁଖ୍ୟମନ୍ତ୍ରୀ କହିଛନ୍ତି। କୋଭିଡ ଯୋଦ୍ଧାଙ୍କ ମନୋବଳ ବଢ଼ାଇବା ଲାଗି ମୁଁ ନିଜେ ଟିଭି, ସୋସିଆଲ ମିଡିଆରେ ଶପଥ ପାଠ କରାଇବି ବୋଲି ସେ କହିଛନ୍ତି। ଗତ ୫ ମାସ ଧରି କରୋନା ବିରୋଧରେ ସଂଗ୍ରାମ ଜାରି ରହିଛି। ଓଡ଼ିଶାର ଜନସାଧାରଣ ଏଥିରେ ସାମିଲ ହୋଇଛନ୍ତି। ଏବେ ପରିବାର ଏବଂ ନିଜର ସୁରକ୍ଷା ପାଇଁ କୋଭିଡ ନିୟମାବଳୀର କଡ଼ାକଡ଼ି ପାଳନ ସମ୍ପର୍କରେ ଆମକୁ ଦାୟିତ୍ୱବାନ ଭାବେ କାମ କରିବାକୁ ପଡ଼ିବ ବୋଲି ସେ ମଧ୍ୟ କହିଛନ୍ତି।
