ଭୋଗରାଇ, ୨ ।୪(ଡି.ଏନ.ଏ.) ଦେଶରେ କୋଭିଡ୍ କଟକଣା ହଟିଛି। ଏଭଳି ସ୍ଥିତିରେ ପୂର୍ବ ଭାରତର ପ୍ରସିଦ୍ଧ ଶୈବପୀଠ ବାଲେଶ୍ୱର ଜିଲାର ଭୋଗରାଇ ବ୍ଲକର ଅଧୀନ ହୁଗୁଳି ଗ୍ରାମର ଜଳଯନ୍ତ୍ର ଦେବତା ଶ୍ରୀ ଚନ୍ଦନେଶ୍ୱର ମହାଦେବଙ୍କ ପ୍ରସିଦ୍ଧ ଚୈତ୍ର ଚଡ଼କ ପର୍ବ ଶୁକ୍ରବାର ପୋଡ଼ା ବାଉଁଶ ଛେଦନରୁ ଆରମ୍ଭ ହୋଇଛି। ଶନିବାର ପ୍ରତ୍ୟୁଷରୁ ଜୀଉଙ୍କ ଚିରାଚରିତ ଧର୍ମୀୟ ପରମ୍ପରା ଅନୁଯାୟୀ ଘଟ ଉତ୍ତୋଳନ ନିମନ୍ତେ ସେବାୟତ ଓ ଭକ୍ତଙ୍କ ମଧ୍ୟରେ ଉତ୍ସାହ ପରିଲକ୍ଷିତ ହୋଇଛି। ଚନ୍ଦନେଶ୍ୱର ମହାଦେବଙ୍କ ଶ୍ରେଷ୍ଠ ଭକ୍ତ ପାଟଭକ୍ତ ବ୍ରତଧାରଣ କଲା ପରେ ପର୍ଯ୍ୟାୟକ୍ରମେ ଅନ୍ୟ ପ୍ରମୁଖ ଦେଉଳିଆ, ଶ୍ରୀବେକିଡ଼ି ସମେତ ୧୩ଜଣ ଭକ୍ତ ଉପବୀତ ଧାରଣ କରି ନୀଳକଣ୍ଠଙ୍କୁ ଆରାଧନା କରିବେ। ଚଳିତବର୍ଷ କୋଭିଡ୍ କଟକଣା ଯୋଗୁ ମନ୍ଦିର ଟ୍ରଷ୍ଟବୋର୍ଡ଼ ଓ ଜିଲା ପ୍ରଶାସନ ଗତ ୨୧।୩।୨୨ରେ ମେଳା ବନ୍ଦ ପାଇଁ ଘୋଷଣା କରିଥିବା ବେଳେ ଲକ୍ଷାଧିକ ଉପବୀତଧାରୀ ଭକ୍ତଙ୍କୁ ବ୍ରତ ପାଳନ ନିମନ୍ତେ ଅଙ୍କୁଶ ଲଗାଇଛନ୍ତି। ୧୩ ଉପବୀତଧାରୀ ପ୍ରମୁଖ ଶୈବଭକ୍ତମାନେ ୧୩ଦିନ ଧରି ୨୪ଘଣ୍ଟାରେ ଛେପ ନ ଢ଼ୋକି ଜୀଉଙ୍କ ଅର୍ଘ୍ୟ ପିଣ୍ଡରେ ସନ୍ଧ୍ୟା ପରେ ଅର୍ଘ୍ୟଦାନ କରିବେ। ଏହି ଅବସରରେ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ରୋକିବାକୁ ଟ୍ରଷ୍ଟବୋର୍ଡ଼ ଓ ପ୍ରଶାସନ ମେଳାକୁ ନା କହିଥିବା ବେଳେ ଜୀଉଙ୍କ କାମିନୀ ବିବାହ, ଦୈନିକ ନୀତିକାନ୍ତି ପୂଜା, ମହାନୀଳ ଓ ପ୍ରସିଦ୍ଧ ପାଟ ଉତ୍ସବର କୌଳିକ ପ୍ରଥା ଅନୁଯାୟୀ ହେବ ବୋଲି ଘୋଷଣା କରାଯାଇଛି। ତେବେ ସ୍ଥାନୀୟ ଶ୍ରଦ୍ଧାଳୁଙ୍କ ଭିଡ଼କୁ କିପରି ନିୟନ୍ତ୍ରଣ କରାଯିବ ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ରାଜ୍ୟରେ କୋଭିଡ୍ କଟକଣା ହଟିବା ପରେ ମହାଦେବଙ୍କଠାରେ ଦୈନନ୍ଦିନ ସହସ୍ରାଧିକ ଶୈବଭକ୍ତମାନେ ଦର୍ଶନ, ପୂଜାର୍ଚ୍ଚନା ଓ ଆରାଧନା କରୁଛନ୍ତି। ଚୈତ୍ର ମାସରେ ଚନ୍ଦନେଶ୍ୱର ମହାଦେବଙ୍କ ବିବାହ ଋତୁ ହୋଇଥିବାରୁ ରାଜ୍ୟ ଏବଂ ରାଜ୍ୟ ବାହାରୁ ବହୁ ଶୈବଭକ୍ତ ମନସ୍କାମନା ନିମନ୍ତେ ଜୀଉଙ୍କଠାରେ ଅଧିଆ ପଡ଼ିଛନ୍ତି।
