ନୂଆଦିଲ୍ଲୀ, ୭।୮: ଆଜିକାଲି ପରିବାରର ବିଭିନ୍ନ ଖର୍ଚ୍ଚ ଯେପରିକି ଘରୋଇ ବିଲ୍, ଶପିଂ, ଭ୍ରମଣ ଏବଂ ପିଲାଙ୍କ ପାଠପଢ଼ା ଖର୍ଚ୍ଚ ଆଦି ଏକାଠି ପରିଚାଳନା କରିବା କଷ୍ଟକର ହୋଇପଡ଼େ। ଏହି ସମସ୍ୟାର ସମାଧାନ ପାଇଁ ଆଡ୍-ଅନ୍ କ୍ରେଡିଟ୍ କାର୍ଡ (Add-On Credit Card) ଏକ ବେଶ୍ ଉପଯୋଗୀ ମାଧ୍ୟମ ପାଲଟିଛି।
ଆଡ୍-ଅନ୍ କ୍ରେଡିଟ୍ କାର୍ଡ କ’ଣ?
ଏହା ଏକ ଅତିରିକ୍ତ କ୍ରେଡିଟ୍ କାର୍ଡ, ଯାହା ମୁଖ୍ୟ କ୍ରେଡିଟ୍ କାର୍ଡଧାରୀଙ୍କ ଆକାଉଣ୍ଟ ଅଧୀନରେ ଜାରି କରାଯାଇଥାଏ। ପରିବାରର ସଦସ୍ୟ ଯେପରିକି ଜୀବନସାଥୀ, ପିତାମାତା, ଭାଇ-ଭଉଣୀ କିମ୍ବା ବୟସ୍କ ପିଲାମାନେ ଏହାକୁ ବ୍ୟବହାର କରିପାରିବେ। ତେବେ ଏହି କାର୍ଡର ସମସ୍ତ ଦେୟ ପରିଶୋଧ କରିବାର ଦାୟିତ୍ୱ କେବଳ ମୁଖ୍ୟ କାର୍ଡଧାରୀଙ୍କର ରହିଥାଏ। ବ୍ୟାଙ୍କଗୁଡ଼ିକ ମୁଖ୍ୟ କାର୍ଡଧାରୀଙ୍କ ଆବେଦନ କ୍ରମେ ପରିବାରର ଅନ୍ୟ ସଦସ୍ୟଙ୍କ ନାମରେ ଏକ ଅଲଗା କାର୍ଡ ଜାରି କରିଥାନ୍ତି, ମାତ୍ର ଏହାର ଖର୍ଚ୍ଚ ସୀମା ମୁଖ୍ୟ କାର୍ଡ ସହିତ ସମାନ ଭାବେ ସଂଯୁକ୍ତ ଥାଏ।
ଉଦାହରଣ ସ୍ୱରୂପ, ଯଦି ମୁଖ୍ୟ କାର୍ଡର ଲିମିଟ୍ ୧ ଲକ୍ଷ ଟଙ୍କା ଥାଏ, ତେବେ ଉଭୟ କାର୍ଡ ମିଶି ସେହି ୧ ଲକ୍ଷ ଟଙ୍କା ପର୍ଯ୍ୟନ୍ତ ବ୍ୟବହାର କରିପାରିବେ ଏବଂ ଏହାର ସମସ୍ତ ବିବରଣୀ ଗୋଟିଏ ମାତ୍ର ଷ୍ଟେଟମେଣ୍ଟରେ ଆସିଥାଏ।
ଏହି ଆଡ୍-ଅନ୍ କ୍ରେଡିଟ୍ କାର୍ଡ ବ୍ୟବହାର କରିବା ଦ୍ୱାରା ପରିବାରର ସମସ୍ତ ଖର୍ଚ୍ଚ ଗୋଟିଏ ସ୍ଥାନରେ ରେକର୍ଡ ହୋଇ ରହୁଥିବାରୁ ଏହାକୁ ଟ୍ରାକ୍ କରିବା ଅତ୍ୟନ୍ତ ସହଜ ହୋଇଥାଏ। ଏହା ବ୍ୟତୀତ ଅଧିକ ଲୋକ କାର୍ଡ ବ୍ୟବହାର କରିବା ଦ୍ୱାରା ଦ୍ରୁତ ଗତିରେ ରିୱାର୍ଡ ପଏଣ୍ଟ ଏବଂ କ୍ୟାସବ୍ୟାକ୍ ମଧ୍ୟ ଜମା ହୋଇଥାଏ।
ଅଧିକାଂଶ ବ୍ୟାଙ୍କ ଏହି କାର୍ଡ ପାଇଁ ଏକ ନିର୍ଦ୍ଦିଷ୍ଟ ସବ୍-ଲିମିଟ୍ ସ୍ଥିର କରିବାର ସୁବିଧା ଦେଉଥିବାରୁ ଖର୍ଚ୍ଚ ଉପରେ ମଧ୍ୟ ସହଜରେ ନିୟନ୍ତ୍ରଣ ରଖାଯାଇପାରିବ। ମୁଖ୍ୟ କାର୍ଡ ପରି ଏହି କାର୍ଡରେ ମଧ୍ୟ ବିଭିନ୍ନ ଅଫର୍, ଲାଉଞ୍ଜ ଆକ୍ସେସ୍ ଏବଂ ଅନ୍ୟାନ୍ୟ ଜୀବନଶୈଳୀ ସୁବିଧା ମିଳିପାରେ।
