ନୂଆଦିଲ୍ଲୀ:
ନିକଟରେ ଶେଷ ହୋଇଥିବା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ରେ ଯଶପ୍ରୀତ୍ ବୁମ୍ରାଙ୍କ ପ୍ରଦର୍ଶନ ଅତ୍ୟନ୍ତ ପ୍ରଭାବୀ ରହିଥିଲା। ମାତ୍ର ତାଙ୍କର ଅସଲ ପରୀକ୍ଷା ଆଗକୁ ଆସୁଛି। ଭାରତୀୟ ଦଳ ଅଷ୍ଟ୍ରେଲିଆ ଗସ୍ତରେ ୩ ମ୍ୟାଚ ବିଶିଷ୍ଟ ଦିନିକିଆ ସିରିଜରେ ଖେଳିବ। ଏହି ସିରିଜରେ ବୁମ୍ରାଙ୍କ ପ୍ରଦର୍ଶନ କିପରି ରହୁଛି ତା’ ଉପରେ ସମସ୍ତଙ୍କ ନଜର ରହିଛି। ଆଇପିଏଲ-୧୩ରେ ବୁମ୍ରା ଦ୍ୱିତୀୟ ସର୍ବାଧିକ ୨୭ଟି ଉଇକେଟ ନେଇ ପ୍ରତିଯୋଗିତା ଶେଷ କରିଥିଲେ। କୋଭିଡ-୧୯ ଜନିତ ଲକ୍ଡାଉନ୍ ପୂର୍ବରୁ ମଧ୍ୟ ସେ ଟି୨୦ ଅନ୍ତର୍ଜାତୀୟରେ ସଫଳ ରହିଥିଲେ। ମାତ୍ର ଗତବର୍ଷ ଆହତ ସମସ୍ୟାରୁ ମୁକୁଳିବାପରେ ଦିନିକିଆରେ ତାଙ୍କର ପ୍ରଦର୍ଶନ ଭଲ ରହିନାହିଁ। ବୁମ୍ରା ଗତବର୍ଷ ପିଠିରେ ଯନ୍ତ୍ରଣା କାରଣରୁ ବ୍ରେକ୍ ନେଇଥିଲେ। ଏହାପରେ ସେ ୨୦୧୯ରେ ଗୋଟିଏ ହେଲେ ଦିନିକିଆ ଅନ୍ତର୍ଜାତୀୟ ଖେଳି ନ ଥିଲେ। ଅଗଷ୍ଟରେ ସେ ଓ୍ବେଷ୍ଟଇଣ୍ଡିଜ ଗସ୍ତରେ କେବଳ ଟେଷ୍ଟ ଖେଳିଥିଲେ। ଚଳିତ ବର୍ଷ ଜାନୁୟାରୀରେ ସେ ଅନ୍ତର୍ଜାତୀୟ କ୍ରିକେଟ ଖେଳିଥିଲେ ହେଁ ଦିନିକିଆ ଓ ଟି୨୦ ଫର୍ମାଟରେ ତାଙ୍କ ପ୍ରଦର୍ଶନରେ ଭିନ୍ନତା ରହିଥିଲା। ସେ ୮ଟି ଟି୨୦ରେ ୬.୩୮ ଇକୋନୋମିରେ ୮ଟି ଉଇକେଟ ନେଇଥିଲେ। ମାତ୍ର ଏକଦିବସୀୟରେ ସେ ଉଇକେଟ ନେବାରେ ସଂଘର୍ଷ କରିଥିଲେ। ସେ ୬ଟି ଦିନିକିଆ ଖେଳିଥିଲେ ହେଁ ମାତ୍ର ଗୋଟିଏ ଉଇକେଟ ନେଇଥିଲେ। ଓଭର ପିଛା ସେ ୫.୧ ହାରରେ ରନ୍ ବ୍ୟୟ କରିଥିଲେ।
ବୁମ୍ରାଙ୍କ ବୋଲିଂ ଟି୨୦ ଫର୍ମାଟକୁ ସୁହାଉଥିବା ଅନୁଭବ କରୁଛନ୍ତି ପୂର୍ବତନ ଭାରତୀୟ ଅଧିନାୟକ ଗୌତମ ଗମ୍ଭୀର। ସେହିପରି ୧୯୮୩ ବିଶ୍ୱକପ ବିଜୟୀ ଭାରତୀୟ ଦଳର ସଦସ୍ୟ ମଦନ ଲାଲ ମଧ୍ୟ ବୁମ୍ରାଙ୍କ ପ୍ରଶଂସାରେ ଶତମୁଖ। କାଗିଶୋ ରାବାଡ଼ା ଯଦିଓ ଅଧିକ ଉଇକେଟ ନେଇଥିଲେ ତେବେ ପୂରା ଆଇପିଏଲରେ ବୁମ୍ରା ବୋଲିଂକୁ କେହି ସହଜରେ ଖେଳିପାରି ନ ଥିଲେ। ଫର୍ମାଟରେ ପରିବର୍ତ୍ତନ ସହ ତାଙ୍କ ଉଇକେଟ ହାସଲରେ ଭିନ୍ନତା ଦେଖାଦେଉଛି ବୋଲି ସେ କହିଛନ୍ତି। ”ସେ ଜଣେ ଉଇକେଟ ହାସଲକାରୀ ବୋଲର, ଏଥିରେ ସନ୍ଦେହ ନାହିଁ। ୫୦ ଓଭର ଫର୍ମାଟରେ ୧୦ ଓଭର ସ୍ପେଲ ରହୁଥିବାରୁ ବ୍ୟାଟ୍ସମ୍ୟାନ ଆଡ୍ଜଷ୍ଟ କରି ନେଉଛନ୍ତି। କାରଣ ଆଉ ୪୦ ଓଭର ଖେଳିବାକୁ ଅଛି ବୋଲି ପ୍ରତିପକ୍ଷ ବ୍ୟାଟ୍ସମ୍ୟାନ ଜାଣିଛନ୍ତି। ମାତ୍ର ଟି୨୦ ଫର୍ମାଟରେ ମାତ୍ର ୪ ଓଭର ସ୍ପେଲ ରହିଥାଏ। ଏହାକୁ ଜଗିଦେଲେ ପୂରା ମ୍ୟାଚ ଉପରେ ତାହାର ପ୍ରଭାବ ପଡ଼ିଥାଏ। ତେଣୁ ପ୍ରତି ବଲ୍କୁ ବ୍ୟାଟ୍ସମ୍ୟାନ ହିଟ୍ କରିବାକୁ ଚାହିଁଥାଏ। ତେଣୁ ଫଳାଫଳରେ ଭିନ୍ନତା ରହିଥାଏ ବୋଲି ମଦନ ଲାଲ କହିଛନ୍ତି।
