ବିନା ସୂଚନା ଫଳକରେ ଚାଲିଛି ବ୍ରିଜ କାମ
9:19 pmJune 25, 2020 / 43

କେସିଙ୍ଗା, ୨୪।୬ (ଡି.ଏନ.ଏ.)-କଳାହାଣ୍ଡି ଜିଲା କେସିଙ୍ଗା ବ୍ଲକ ଅନ୍ତର୍ଗତ କନ୍ତେଶିର ଗ୍ରାମପଞ୍ଚାୟତ ଅଧୀନ ଗେଠିପଡା ଉଲସ୍ତିଯୋରକୁ ଜୟନ୍ତପୁର ସହିତ ସଂଯୋଗ କରିବା ପାଇଁ ଆର୍‌ଡି ବିଭାଗ ପକ୍ଷରୁ ବ୍ରିଜ କାମ ଚାଲିଛି । ଏହି ବ୍ରିଜ ନିର୍ମାଣ ହେଲେ କନ୍ତେଶିର, ମାଝିପଡା, ଗେଠିପଡା ଓ ଜୟନ୍ତପୁରର ଲୋକଙ୍କ ଗମନାଗମନ କ୍ଷେତ୍ରରେ ସୁବିଧା ହୋଇପାରିବ। କିନ୍ତୁ ଜଙ୍ଗଲ ଭିତରେ ଥିବା ଗ୍ରାମ ଜୟନ୍ତପୁରକୁ ସଂଯୋଗ କରିବା ପାଇଁ ଏହି ବ୍ରିଜ କାମ ଗତ ୨୦୧୮-୧୯ ଆର୍ଥିକ ବର୍ଷରୁ ଟେଣ୍ଡର ହୋଇ ନିର୍ମାଣାଧୀନ ରହିଛି । ବିନା ସୂଚନାଫଳକରେ ଏହି ବ୍ରିଜ ନିର୍ମାଣ ଚାଲିଛି । ରାଜ୍ୟ ସରକାର ପ୍ରତ୍ୟେକ ଉନ୍ନତିମୂଳକ କାର୍ଯ୍ୟର ସମ୍ପୂର୍ଣ୍ଣ ସୂଚନା ଦେବା ପାଇଁ ନିୟମ କରିଥିଲେ ସୁଦ୍ଧା ସେଥିରେ ବ୍ୟତିକ୍ରମ ଦେଖାଯାଉଛି । ଏହି କାମ ନିମ୍ନମାନର ହେଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ବିଭାଗୀୟ ଇଞ୍ଜିନିୟର କିମ୍ବା ଏସ୍‌ଡିଓ ଉପସ୍ଥିତ ରହୁ ନ ଥିବାରୁ କାମର ମାନ ନିର୍ଦ୍ଧାରଣ କରିବା କଷ୍ଟକର ହୋଇଛି। ଏନେଇ ଆର୍‌ଡି ବିଭାଗର ଏସ୍‌ଡିଓଙ୍କୁ ପଚାରିବାରୁ ବର୍ତ୍ତମାନ ବର୍ଷା ଋତୁ ପାଇଁ କାମ ବନ୍ଦ ରହିଛି । ବ୍ରିଜ କାମ ସମୟରେ ଜଣେ ଏସ୍‌ଡିଓ ସେଠାରେ ଦିନ ତମାମ ବସି ରହିବା ସମ୍ଭବ ନୁହେଁ ବୋଲି ସେ କହିଛନ୍ତି।