ଭୁବନେଶ୍ୱର,୨୩।୭(ବ୍ୟୁରୋ): ସ୍ମାର୍ଟସିଟିରେ ସଂକ୍ରମଣ ସଂଖ୍ୟା ବୃଦ୍ଧି ପାଉଥିବାରୁ ଉଭୟ ସରକାର ଓ ବିଏମ୍ସି କର୍ତ୍ତୃପକ୍ଷ ସବୁ ବର୍ଗର ଟିକାକରଣ ସାଙ୍ଗକୁ ବୁଷ୍ଟର ଡୋଜ୍ ଟିକା ପ୍ରଦାନକୁ ଗୁରୁତ୍ୱ ଦେଇଛନ୍ତି। ଏଭଳି ସମୟରେ ନେକ୍ସସ୍ ଏସ୍ପ୍ଲାନେଡ୍ ପୁଣି ଥରେ ସ୍ଥାନୀୟ ପ୍ରଶାସନକୁ ସହାୟତାର ହାତ ବଢ଼ାଇଛି। ଏହି ପରିପ୍ରେକ୍ଷୀରେ ଗୁରୁବାରଠାରୁ ବିଏମ୍ସି ଓ ନେକ୍ସସ୍ ଏସ୍ପ୍ଲାନେଡ୍ର ମିଳିତ ସହଯୋଗରେ ମଲ୍ ପରିସରରେ ଟିକାକରଣ ଆରମ୍ଭ ହୋଇଯାଇଛି। ଏହି ଅବସରରେ ଜୋନାଲ କମିଶନର ବିଏମ୍ସି ପ୍ରିୟବ୍ରତ ପାଢ଼ୀ ଏବଂ ସ୍ଥାନୀୟ କର୍ପୋରେଟର କୁମାରେନ୍ଦ୍ର ମହାପାତ୍ରଙ୍କ ସମେତ ମଲ୍ର ବରିଷ୍ଠ ଅଧିକାରୀଙ୍କ ଉପସ୍ଥିତିରେ ଟିକାକରଣର ଶୁଭାରମ୍ଭ କରାଯାଇଥିଲା। ସେହିଭଳି ବୁଷ୍ଟର ଡୋଜ୍ ପାଇଁ ମଲ୍ ପରିସରରେ ଏକ ଲମ୍ବା ଲାଇନ କରାଯାଇ ହିତାଧିକାରୀଙ୍କୁ ଟିକା ଦିଆଯାଇଥିଲା। ମଲ୍ ମ୍ୟାନେଜମେଣ୍ଟ ଓ ବିଏମ୍ସିର ମିଳିତ ସହଯୋଗ ସାଙ୍ଗକୁ ସ୍ଥାନୀୟ କର୍ପୋରେଟରଙ୍କ ଉପସ୍ଥିତିରେ ଟିକାକରଣକୁ ସୁବ୍ୟବସ୍ଥିତ ଢଙ୍ଗରେ ପ୍ରଦାନ କରାଯାଉଥିଲା ବୋଲି ବିଏମସି ପକ୍ଷରୁ ସୂଚନା ଦିଆଯାଇଛି।
