ବଇଣ୍ଡା, ୧୦।୭(ପରିକ୍ଷିତ ସାହୁ): ରୋକାଯାଇ ପାରୁନାହିଁ କାଠମାଫିଆଙ୍କ ପ୍ରାଦୁର୍ଭାବ। ରାତାରାତି ମୂଲ୍ୟବାନ ଗଛ କାଟି ନେଉଛନ୍ତି ସେମାନେ। ଫଳରେ ବନ୍ୟଜୀବନରେ ସମୃଦ୍ଧ ଅନୁଗୋଳ ଜିଲା ଧଣ୍ଡାତୋପା ରେଞ୍ଜ ଅଧୀନ ବିପ୍ରଡ଼ିହ ଜଙ୍ଗଲ ଏବେ ପଦା ହେବାରେ ଲାଗିଛି। ଜଙ୍ଗଲ ସମ୍ପଦକୁ କ୍ଷତି ପହଞ୍ଚାଉଥିବା ଅଭିଯୁକ୍ତଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି ଗ୍ରାମବାସୀ ଶନିବାର ଅନୁଗୋଳ ଦାବିପତ୍ର ମାଧ୍ୟମରେ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି। ଏହାର ଏକ ନକଲ ଆଠମଲ୍ଲିକ ଡିଏଫଓଙ୍କୁ ପ୍ରଦାନ କରିଛନ୍ତି।
ଅଭିଯୋଗ ଅନୁଯାୟୀ, ରେଞ୍ଜ କାର୍ଯ୍ୟାଳୟଠାରୁ ବିପ୍ରଡିହ ଗ୍ରାମ ଜଙ୍ଗଲର ଦୂରତା ପ୍ରାୟ ୨୦ କି.ମି.। ଘଞ୍ଜ ଜଙ୍ଗଲରେ ପରିପୂର୍ଣ୍ଣ ଉକ୍ତ ଅଞ୍ଚଳରେ କାଠମାଫିଆ ସକ୍ରିୟ ହୋଇଉଠିଛନ୍ତି। ଜଙ୍ଗଲରେ ୧୯୯୩ରେ ସରକାରଙ୍କ ପକ୍ଷରୁ ୧୨ ହଜାର ୪୬୭ ଶାଗୁଆନ, ଶିଶୁ, ଶାଳ, ପଟାସ ପ୍ରଜାତିର ଗଛ ଲଗାଯାଇଥିଲା। ଏବେ ଗଛଗୁଡ଼ିକ ବଡ଼ ହୋଇଗଲାଣି। ତେବେ ରେଞ୍ଜ୍ କାର୍ଯ୍ୟାଳୟ ଦୂରରେ ରହିବା ଏବଂ ବନ କର୍ମଚାରୀମାନେ ପାଟ୍ରୋଲିଂ କରୁ ନ ଥିବାରୁ ଜଙ୍ଗଲରୁ କାଠ ଚୋରାଚାଲାଣ ବଢ଼ିବାରେ ଲାଗିଛି। ଏକ ଦଳରେ ୭-୮ଜଣ କ୍ୟାମ୍ପ କରି କଟର ସହାୟତାରେ କାଠ କାଟି ଜିଲା ତଥା ଜିଲା ବାହାରକୁ ଚାଲାଣ କରୁଛନ୍ତି। ଏହି କାର୍ଯ୍ୟରେ ଦାମୀ ଗାଡ଼ି ବ୍ୟବହାର ହେଉଛି। ବନ ବିଭାଗର କେତେଜଣ ଅଧସ୍ତନ କର୍ମଚାରୀଙ୍କ ଏହି କାର୍ଯ୍ୟରେ ସମ୍ପୃକ୍ତି ରହିଛି। ସେମାନେ ହାତଗୁଞ୍ଜା ନେଇ କାଠ ମାଫିଆଙ୍କୁ ଏଭଳି କାର୍ଯ୍ୟ କରିବାକୁ ପ୍ରଶୟ ଦେଉଛନ୍ତି। ଏ ନେଇ ଗ୍ରାମବାସୀ ପୂର୍ବରୁ ବହୁବାର ବନ କାର୍ଯ୍ୟାଳୟରେ ଅଭିଯୋଗ କରିଥିଲେ ମଧ୍ୟ କୌଣସି ପଦକ୍ଷେପ ନିଆଯାଉନାହିଁ। ଜଙ୍ଗଲକୁ ସୁରକ୍ଷା ଯୋଗାଇ ଦିଆ ନ ଗଲେ ଏହା ଧୀରେ ଧୀରେ ପଦା ହୋଇଯିବ ବୋଲି ଗ୍ରାମବାସୀ ଆଶଙ୍କା ବ୍ୟକ୍ତ କରିଛନ୍ତି।
ଅନ୍ୟପଟେ ଗ୍ରାମବାସୀଙ୍କ ଅଭିଯୋଗକୁ ଧଣ୍ଡାତୋପା ଫରେଷ୍ଟର ଏସ୍. ବେହେରା ଖଣ୍ଡନ କରିଛନ୍ତି। ସେ କହିଛନ୍ତି ବିପ୍ରଡ଼ିହ ଜଙ୍ଗଲକୁ ସୁରକ୍ଷା ଯୋଗାଇ ଦିଆଯାଉଛି। କାଠ ଚୋରା ଚାଲାଣ ହେଉନାହିଁ ବୋଲି ସେ କହିଛନ୍ତି।
