ନ୍ୟୁୟର୍କ,୮।୧୨: କେତେଜଣ ଅନ୍ଧ ଅନୁଗାମୀଙ୍କୁ ନେଇ ନିଜକୁ ନିଜେ ବାବା ବୋଲାଉଥିଲେ। ଯୌନ ପିପାସା ମେଣ୍ଟାଇବା ପାଇଁ ବହୁ ବିବାହ କଲେ। ତାଙ୍କ ୨୦ ସ୍ତ୍ରୀଙ୍କ ମଧ୍ୟରୁ ଜଣେ ହେଉଛନ୍ତି ଭଣ୍ଡବାବାଙ୍କ ନିଜ ନାବାଳିକା ଝିଅ। ଏହି ୪୬ ବର୍ଷୀୟ ଆତ୍ମଘୋଷିତ ଧର୍ମଗୁରୁ ଏବେ ପୋଲିସ ହାଜତରେ।
ଆରିଜୋନାରେ ସାମୁଏଲ ରେପ୍ପିଲି ବେଟ୍ମ୍ୟାନ ନାମକ ଜଣେ ଭଣ୍ଡବାବା ଗିରଫ ହୋଇଛନ୍ତି। ସେ ୨୦ ଜଣଙ୍କୁ ବିବାହ କରିଥିବା ଅଭିଯୋଗ ରହିଛି। ତାଙ୍କ ସ୍ତ୍ରୀମାନଙ୍କ ମଧ୍ୟରୁ ୧୫ ଜଣ ନାବାଳିକା। ଏପରିକି ଜଣଙ୍କ ବୟସ ୯ ବର୍ଷ। ଶେଷରେ ବାବା ନିଜ ଝିଅକୁ ବି ଛାଡ଼ି ନାହାନ୍ତି। ସେମାନଙ୍କୁ ସେ ଅନୈତିକ କାର୍ଯ୍ୟରେ ନିୟୋଜିତ କରୁଥିଲେ। ଫେଡେରାଲ ବ୍ୟୁରୋ ଅଫ୍ ଇନ୍ଭେଷ୍ଟିଗେଶନ୍ (ଏଫ୍ବିଆଇ) ଏହି କାରନାମା ଉପରୁ ପରଦା ହଟାଇବା ପରେ ଭଣ୍ଡବାବାଙ୍କୁ ନେଇ ସବୁଠି ଚର୍ଚ୍ଚା ଲାଗି ରହିଛି।
ଯିଶୁଙ୍କ ନାଁରେ ଯୌନ ବ୍ୟଭିଚାର କରୁଥିବା ସାମୁଏଲଙ୍କୁ ଜଣେ ସଂଘୀୟ ଏଜେଣ୍ଟ ଧରିବାରେ ସକ୍ଷମ ହୋଇଛନ୍ତି। ମାମଲା ବିଚାରାଧୀନ ଥିବାଯାଏ ତାଙ୍କୁ ହାଜତରେ ରଖିବା ପାଇଁ ମାଜିଷ୍ଟ୍ରେଟ୍ ଜଜ୍ କେମିଲେ ବାଇବଲ୍ସ ନିର୍ଦ୍ଦେଶ ଦେଇଛନ୍ତି। ୨୦୧୯ରେ ସାମୁଏଲ ୫୦ ଅନୁଗାମୀଙ୍କୁ ଠୁଳ କରିବା ପରେ ସେମାନଙ୍କ ଗୁରୁ ପାଲଟିଯାଇଥିଲେ।
