ବରଗଡ଼,୮ା୧୦(ପ୍ରେମାନନ୍ଦ ଖମାରୀ):ଅଧିକ ଧାନ ଉପତ୍ାଦନ ଯୋଗୁ ବରଗଡ଼ ଜିଲାକୁ ରାଜ୍ୟର ଭାତହାଣ୍ଡି ବୋଲି କୁହାଯାଏ। ହେଲେ ଏଠାରେ ଧାନଚାଷୀଙ୍କ ଦୁଃଖ ସରୁନାହିଁ। ଧାନବିକ୍ରି ସମସ୍ୟା ଏଠାରେ ସାଧାରଣରେ ପରିଣତ ହୋଇଛି। ଅନ୍ୟପଟେ ଏଥର ଧାନ ଅମଳ ପୂର୍ବରୁ ଚାଷୀମୁଣ୍ଡରେ ଚଡ଼କ ପଡ଼ିଛି। ପ୍ରାୟ ମାସେ ପରେ ଜିଲାରେ ଧାନ ଅମଳ କାର୍ଯ୍ୟ ଜୋର୍ ଧରିବ। ହେଲେ ଅମଳ ସମୟ ଯେତିକି ପାଖେଇ ଆସୁଛି, ଫସଲରେ ଅଜଣା ରୋଗପୋକ ଉପଦ୍ରବ ଯୋଗୁ ଜିଲାର ଚାଷୀଙ୍କ ଚିନ୍ତା ସେଭଳି ବଢ଼ି ଚାଲିଛି। କୀଟନାଶକ ପ୍ରୟୋଗ ସତ୍ତ୍ୱେ ରୋଗପୋକ ଦମନ ହେଉ ନଥିବା ଅଭିଯୋଗ ହୋଇଛି। ଏଭଳି ଅଭିଯୋଗ ନେଇ ବୁଧବାର ଜିଲାର ବିଭିନ୍ନ ଅଞ୍ଚଳର ଚାଷୀମାନେ ଜିଲାପାଳ ଆଦିତ୍ୟ ଗୋୟଲ ଏବଂ ଜିଲା ମୁଖ୍ୟ କୃଷି ଅଧିକାରୀ(ସିଡିଏଓ) ମମତାରାଣୀ ତ୍ରିପାଠୀଙ୍କୁ ଫେରାଦ ହୋଇ ସ୍ମାରକପତ୍ର ପ୍ରଦାନ କରିଛନ୍ତି। ଜିଲାପାଳ ଗୋୟଲଙ୍କ ଅନୁପସ୍ଥିତିରେ ଡେପୁଟୀ କଲେକ୍ଟର ସୁମତୀ ପଣ୍ଡା ସ୍ମାରକପତ୍ର ଗ୍ରହଣ କରିଥିଲେ। ସ୍ମାରକପତ୍ରରେ ଧାନ ଫସଲରେ ରୋଗପୋକ ଦମନ ସମେତ ୫ଦଫା ଦାବି ଉଲ୍ଲେଖ କରାଯାଇଛି।
ସୂଚନା ଅନୁଯାୟୀ, ଚଳିତବର୍ଷ ଆରମ୍ଭରୁ ଅନୁକୂଳ ପାଗ ଯୋଗୁ ଧାନଫସଲ ଭଲ ହୋଇଥିଲା। ଜିଲାର ଚାଷୀମାନେ ମଧ୍ୟ ଏଥର ଅନ୍ୟବର୍ଷ ତୁଳନାରେ ଭଲ ଅମଳ ହେବ ବୋଲି ମନରେ ଆଶା ବାନ୍ଧିଥିଲେ। କିନ୍ତୁ ଧାନ ଅମଳକ୍ଷମ ଅବସ୍ଥାକୁ ଆସିବା ପାଇଁ ଯେତେ ପାଖେଇ ଆସୁଛି, ନାନା ରୋଗପୋକ ଫସଲକୁ ଉଜାଡ଼ି ଦେଉଛି। ପତ୍ରଗୁଡ଼ିକ ହଲଦିଆ ହୋଇପଡ଼ି ଶୁଖିଯାଉଛି। ରୋଗପୋକ ଦମନ ହୋଇ ନ ପାରିଲେ ପ୍ରଭାବିତ ଫସଲରୁ ଧାନ ବଦଳରେ ଅଗାଡ଼ି ବାହାରିବା ଆଶଙ୍କା ଦେଖାଯାଇଛି। ଜିଲାର ବରପାଲି, ଭେଡେନ, ଅତାବିରା ସମେତ ବିଭିନ୍ନ ବ୍ଲକ୍ ଅଞ୍ଚଳରେ ଏଭଳି ରୋଗପୋକ ବ୍ୟାପିଥିବା ଦେଖିବାକୁ ମିଳିଛି। ଫସଲରେ ବିଭିନ୍ନ କୀଟନାଶକ ପ୍ରୟୋଗ ସତ୍ତ୍ୱେ ତାହା ଦମନ ହୋଇପାରୁ ନାହିଁ ବୋଲି ଚାଷୀମାନେ ଅଭିଯୋଗ କରିଛନ୍ତି। ଅନ୍ୟପଟେ ଏନେଇ ବିଭାଗୀୟ ଅଧିକାରୀଙ୍କୁ ବାରମ୍ବାର ଅବଗତ କରିବା ସତ୍ତ୍ୱେ ରୋଗପୋକ ଉପଦ୍ରବକୁ ପ୍ରତିହତ କରିବା ପାଇଁ କିଛି ପଦକ୍ଷେପ ନିଆଯାଇନାହିଁ ବୋଲି ସଂଯୁକ୍ତ କୃଷକ ସଙ୍ଗଠନ ଅଭିଯୋଗ କରିଛି। ଏହି କ୍ରମରେ ସଂଯୁକ୍ତ କୃଷକ ସଙ୍ଗଠନ ୫ଦଫା ଦାବି କରିଛି। କୀଟନାଶକ ପ୍ରୟୋଗ ସତ୍ତ୍ୱେ ରୋଗପୋକ ଦମନ ହୋଇପାରୁ ନଥିବାରୁ ପ୍ରଭାବିତ ଫସଲର ସନ୍ଧାନ କରାଯିବା, ୩୩ ପ୍ରତିଶତରୁ ଊର୍ଦ୍ଧ୍ୱ ଫସଲକ୍ଷତି ହୋଇଥିବା ଚାଷୀଙ୍କୁ ବୀମା ଏବଂ ଇନ୍ପୁଟ୍ ସହାୟତା ପ୍ରଦାନ, ପ୍ରଭାବିତ ଫସଲରେ ରୋଗପୋକ ନିୟନ୍ତ୍ରଣ ପାଇଁ ଆବଶ୍ୟକ ପଦକ୍ଷେପ ନିଆଯିବା ପାଇଁ ଦାବି ହୋଇଛି। ସେହିପରି ଜିଲାରେ ଆବଶ୍ୟକ କୃଷି କର୍ମଚାରୀଙ୍କ ଅଭାବ ରହିଥିବାରୁ ଖାଲିଥିବା ପଦବୀଗୁଡ଼ିକୁ ତୁରନ୍ତ ପୂରଣ କରାଯିବା ଏବଂ ଚାଷୀଙ୍କ ଅଭିଯୋଗ ସତ୍ତ୍ୱେ ରୋଗପୋକ ଦମନ କ୍ଷେତ୍ରରେ ସେମାନଙ୍କୁ ଆବଶ୍ୟକ ପରାମର୍ଶ ଦେବା ବଦଳରେ କର୍ତ୍ତବ୍ୟରେ ଅବହେଳା କରିଥିବା କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ସଂଯୁକ୍ତ କୃଷକ ସଙ୍ଗଠନ ସ୍ମାରକପତ୍ରରେ ଦାବି କରିଛି। ସଙ୍ଗଠନର ଉପଦେଷ୍ଟା ରମେଶ ମହାପାତ୍ର, ସୁରେଶ ନିକାଣ୍ଟି, ସୁଦାମ ପାତ୍ର, ରବି ପ୍ରଧାନଙ୍କ ସମେତ ଅନେକ ଚାଷୀ ସ୍ମାରକପତ୍ର ପ୍ରଦାନ ପାଇଁ ଜିଲାପାଳ ଏବଂ ଜିଲା ମୁଖ୍ୟ କୃଷି ଅଧିକାରୀଙ୍କ କାର୍ଯ୍ୟାଳୟକୁ ଆସିଥିଲେ।
Dharitri – Odisha’s No.1 Odia Daily
