ବରଗଡ଼,୬।୭,(ପ୍ରେମାନନ୍ଦ ଖମାରୀ): ବିିକଶିତ ବରଗଡ଼ ଲକ୍ଷ୍ୟ ନେଇ ରାସ୍ତାପାର୍ଶ୍ୱରୁ ଜବରଦଖଲ ଉଚ୍ଛେଦ ହୋଇଛି। ସେଠାରେ ଡ୍ରେନ ନିର୍ମାଣ କରାଯାଇଛି। କେଉଁଠି ଡ୍ରେନ ନିର୍ମାଣ ସରିଛି ତ ଆଉ କେଉଁଠାରେ ତାହା ଅଧା ପନ୍ତରିଆଭାବେ ପଡ଼ି ରହିଛି। ଅନ୍ୟପଟେ ଦୂରଦୃଷ୍ଟିର ଅଭାବ ତଥା ଯୋଜନାବିହୀନ ଭାବେ ଅନେକ ସ୍ଥାନରେ ରାସ୍ତା ନିର୍ମାଣ କରାଯାଇଛି। କେଉଁଠି ତାହା ଉଚ୍ଚ ହୋଇ ପଡ଼ିଥିବାବେଳେ କେଉଁଠାରେ ନୀଚ ହୋଇ ପଡ଼ିଛି। ଫଳରେ ପୂର୍ବାପେକ୍ଷା ସହରରେ ଡ୍ରେନେଜ ବ୍ୟବସ୍ଥାରେ ସୁଧାର ଆସିବା ବଦଳରେ ଏହା ଏଥର ଆହୁରି ସମସା ବହୁଳ ହୋଇ ପଡ଼ିଛି। ପ୍ରଥମ ବର୍ଷାରେ ସହର ତଳି ଅଞ୍ଚଳ ଜଳାର୍ଣ୍ଣବ ହୋଇ ପଡ଼ୁଛି। ଘର, ସ୍କୁଲ ସମେତ ବିିଭିନ୍ନ ସରକାରୀ, ବେସରକାରୀ କୋଠାକୁ ମଇଲା, ଆବର୍ଜନା ସହିତ ନର୍ଦ୍ଦମା ପାଣି ପଶୁଛି। ରାସ୍ତାଘାଟ, ବସଷ୍ଟାଣ୍ଡ ଆଦି ସ୍ଥାନରେବ ନ୍ୟାଭଳି ସ୍ଥିତି ଉପୁଜୁଛି। ଫଳରେ ବର୍ଷା ଲାଗି ରହିଲେ ସମ୍ପୃକ୍ତ ଅଞ୍ଚଳରେ ଲୋକଙ୍କ ଜୀବନ ଅତିବାହିତ କରିବା ଦୁର୍ବିସହ ହୋଇ ପଡ଼ୁଛି। ରାସ୍ତାଘାଟରେ ଯାତାୟାତ ବାଧାପ୍ରାପ୍ତ ହୋଇ ପଡିଛି। ଅନୁରୂପଭାବେ ସହରରୁ ନିଷ୍କାସିତ ନର୍ଦ୍ଦମା ପାଣି ସିଧାସଳଖ ସହର ଉପକଣ୍ଠରେ ରହିଥିବା ଜୀରାନଦୀରେ ମିଶୁଛି। ଜୀରାନଦୀ ପାଣି ପ୍ରଦୂଷିତ ହେଉଛି। ଗୁରୁବାର ରାତିରୁ ଶୁକ୍ରବାର ପଯର୍ୟନ୍ତ ୨ଦିନ ଧରି ବର୍ଷା ଲାଗି ରହିଥିବା ଯୋଗୁ ସହରରେ ଏଭଳି ସ୍ଥିତି ଉପୁଜିଥିଲା। ଶନିବାର ବୃଷ୍ଟିପାତ ସାମାନ୍ୟ ହ୍ରାସ ପାଇବାରୁ ସ୍ଥିତି ସ୍ବାଭାବିକକୁ ଫେରିଥିଲା। ମାତ୍ର ରବିବାର ପୁଣି ଅଧିକରୁ ଅଧିକ ବର୍ଷା ମାଡ଼ି ଆସିବାରୁ ବରଗଡ଼ ସହର ଅବସ୍ଥା ବେହାଲ ହୋଇ ପଡ଼ିଛି ଏବଂ ସହର ତଳି ଅଞ୍ଚଳରେ ରହୁଥିବା ଲୋକଙ୍କ ଦୁର୍ଦ୍ଦଶା ବଢ଼ି ଚାଲିଛି।
