ସିଡ୍ନୀ,୧୯।୭(ଏପି): ଆଣ୍ଟେ ମିଲିକିକ୍ ଅଷ୍ଟ୍ରେଲିଆ ମହିଳା ଫୁଟବଲ କୋଚ୍ ପଦରୁ ଇସ୍ତଫା ଦେଇଛନ୍ତି। ସେ ଏ- ଲିଗ୍ ଏକ୍ସାପାନ୍ସନ କ୍ଲବ୍ ମାକାର୍ଥୁର ଏଫ୍ସିର ପ୍ରଥମ କୋଚ୍ ଭାବେ ଦାୟିତ୍ୱ ଗ୍ରହଣ କରିବେ। ନୂଆ ଦାୟିତ୍ୱ ଉପରେ ଫୋକସ୍ କରବା ପାଇଁ ସେ ପଦ ଛାଡିଛନ୍ତି। ଗତ ବର୍ଷ ଫେବୃୟାରୀରେ ସେ ଅଷ୍ଟ୍ରେଲିଆ ମହିଳା ଦଳାର କୋଚ୍ ପଦରେ ନିଯୁକ୍ତ ହୋଇଥିଲେ। କୋଚ୍ ପଦରୁ ଆଲେନ ଷ୍ଟାଜକିକ୍ଙ୍କୁ ଫୁଟବଲ ଫେଡେରେଶନ ଅଷ୍ଟ୍ରେଲିଆ (ଏଫ୍ଏଫ୍ଏ) ଦାୟିତ୍ୱରୁ ବିଦା କରିବାର ପରେ ମିଏିକିକ୍ଙ୍କୁ ନିଯୁକ୍ତି ମିଳିଥିଲା।
ମିଲିକିକ୍ଙ୍କ ନେତୃତ୍ୱରେ ଅଷ୍ଟ୍ରେଲିଆ ୨୦୨୦ ଅଲିମ୍ପିକ୍ସ ଗେମ୍ସ ପାଇଁ ଯୋଗ୍ୟତା ହାସଲ କରିଥିଲା। ସେହିପରି ୨୦୧୯ରେ ଫ୍ରାନ୍ସରେ ଅନୁଷ୍ଠିତ ବିଶ୍ୱକପ୍ରେ ସେ ଅଷ୍ଟ୍ରେଲିଆକୁ ରାଉଣ୍ଡ ଅଫ୍ ୧୬କୁ ଉନ୍ନୀତ କରାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ। ୨୦୧୯ ମେ’ରେ ତାଙ୍କୁ ମାକାର୍ଥୁର ଏଫ୍ସି କୋଚ୍ ଭାବେ ଘୋଷଣା କରାଯାଇଥିଲା। ଟୋକିଓ ଅଲିମ୍ପିକ୍ସ ଶେଷ ହେବ ପରେ ସେ ନୂଆ ଦାୟିତ୍ୱ ଗ୍ରହଣ କରିଥାନ୍ତେ ଓ ଏଥିପାଇଁ ସେ ୩ ବର୍ଷିୟା ଚୁକ୍ତିରେ ସ୍ବାକ୍ଷର କରିଥିଲେ। କୋଭିଡ୍-୧୯ ମହାମାରୀ କାରଣରୁ ଅଲିମ୍ପିକ୍ସ ଘୁଞ୍ଚିବା ପରେ ମିଲିକିକ୍ ତାଙ୍କ ଯୋଜନାରେ ପରିବର୍ତ୍ତନ ଆଣିଥିଲେ। ଚଳିତ ବର୍ଷ ଶେଷ ଆଡକୁ ମାକାର୍ଥୁର ଏଫ୍ସି ଏ- ଲିଗ୍ ୨୦୨୦-୨୧ ସେସନ ଖେଳିବା ଆରମ୍ଭ କରିବ।
ମିଲିକିକ୍ କୋଚ୍ ପଦ ଚାଡିବେ ବୋଲି ଏଫ୍ଏଫ୍ଏ ମୁଖ୍ୟ ଜେମ୍ସ ଜନସନ ରବିବାର ସୂଚନା ଦେଇଛନ୍ତି। ସେ ମାକାର୍ଥୁର ଏଫ୍ସିର କୋଚ୍ ପଦ ଗ୍ରହଣ କରିବାକୁ ଯାଉଥିବାରୁ ଜନସନ୍ ତାଙ୍କ ନିଷ୍ପତ୍ତିକୁ ସମ୍ମାନ ଜଣାଇଛନ୍ତି। ପଦ ଛାଡୁଥିବାରୁ ମିଲିକିକ୍ ଦୁଃଖ ପ୍ରକାଶ କରିଛନ୍ତି। ଏବେ ଜଣେ ନୂଆ କୋଚ୍ଙ୍କୁ ଦାୟିତ୍ୱ ଦେବାକୁ ଏଫ୍ଏଫ୍ଏ ପ୍ରୟାସ ଆରମ୍ଭ କରିବ।
