ନୂଆଦିଲ୍ଲୀ,୧୧।୯(ପି.ଟି.): ‘ଅଗଷ୍ଟ ୨୦୨୬’ ବିଶ୍ୱ ଇତିହାସରେ ସବୁଠାରୁ ଉତ୍ତପ୍ତ ମାସ ଭାବେ ରେକର୍ଡ କରିଛି। ବିଶ୍ୱର ହାରାହାରି ଭୂପୃଷ୍ଠ ବାୟୁ ତାପମାତ୍ରା ୧୬.୯୬ ଡିଗ୍ରୀ ସେଲ୍ସିୟସ ରହିବା ସହ ଏହା ‘ଜୁଲାଇ ୨୦୨୩’ର ସର୍ବାଧିକ ତାପମାତ୍ରା ରେକର୍ଡ (୧୬.୯୫ ଡିଗ୍ରୀ ସେଲ୍ସିୟସ) ସହ ପ୍ରାୟ ସମକକ୍ଷ ହୋଇଥିବା ନେଇ ୟୁରୋପୀୟ ଜଳବାୟୁ ନିରୀକ୍ଷଣ ସଂସ୍ଥା ‘କୋପରନିକସ୍ କ୍ଲାଇମେଟ୍ ଚେଞ୍ଜ ସର୍ଭିସ୍’ (ସି୩ଏସ୍) ପକ୍ଷରୁ ଗୁରୁବାର ସୂଚନା ଦିଆଯାଇଛି। ମାନବସମାଜ ଔଦ୍ୟୋଗିକ ସ୍ତରରେ ତୈଳ, କୋଇଲା ଓ ଗ୍ୟାସ୍ ଦହନ କରିବା ପୂର୍ବରୁ ୧୯ଶ ଶତାବ୍ଦୀରେ ପୃଥିବୀର ଯେଉଁ ହାରାହାରି ତାପମାତ୍ରା ଥିଲା, ଗତ ଅଗଷ୍ଟ ମାସର ତାପମାତ୍ରା ତା’ଠାରୁ (ଅର୍ଥାତ୍ ପ୍ରାକ୍-ଶିଳ୍ପାୟନ ସ୍ତରଠାରୁ) ୧.୬୫ ଡିଗ୍ରୀ ସେଲ୍ସିୟସ ଅଧିକ ରହିଥିବା ‘ସି୩ଏସ୍’ ପ୍ରକାଶ କରିଛି। ‘ସି୩ଏସ୍’ର ରିପୋର୍ଟ ଅନୁଯାୟୀ, ନଭେମ୍ବର ୨୦୨୫ ପରେ ପ୍ରଥମ ଥର ପାଇଁ କୌଣସି ମାସର ହାରାହାରି ତାପମାତ୍ରା ପ୍ରାକ୍-ଶିଳ୍ପାୟନ ସ୍ତରଠାରୁ ୧.୫ ଡିଗ୍ରୀ ସେଲ୍ସିୟସ ସୀମା ଅତିକ୍ରମ କରିଛି। ଜୀବାଶ୍ମ ଇନ୍ଧନ (କୋଇଲା, ତେଲ ଓ ଗ୍ୟାସ୍) ଦହନ ଯୋଗୁ ନିର୍ଗତ ସବୁଜଗୃହ ଗ୍ୟାସ୍ (ଡିଏଚ୍ଜି) ଏବଂ ପ୍ରଶାନ୍ତ ମହାସାଗରୀୟ ଅଞ୍ଚଳରେ ସୃଷ୍ଟ ସକ୍ରିୟ ‘ଏଲ୍ ନିନୋ’ ସ୍ଥିତି ଏହି ଅସ୍ବାଭାବିକ ତାପମାତ୍ରା ବୃଦ୍ଧିର ପ୍ରମୁଖ କାରଣ ବୋଲି ଦର୍ଶାଯାଇଛି।
ଏହି ସଙ୍କଟଜନକ ପରିସ୍ଥିତି ଉପରେ ଚିନ୍ତା ପ୍ରକଟ କରି ଜାତିସଂଘ ଜଳବାୟୁ ପରିବର୍ତ୍ତନ ବିଭାଗର କାର୍ଯ୍ୟନିର୍ବାହୀ ସେକ୍ରେଟାରି ସାଇମନ ଷ୍ଟିଏଲ୍ କହିଛନ୍ତି, ଯେପର୍ଯ୍ୟନ୍ତ ମାନବସମାଜ ବିପୁଳ ପରିମାଣର କୋଇଲା, ତୈଳ ଓ ଗ୍ୟାସ୍ ଦହନ ବନ୍ଦ ନ କରିଛି, ସେପର୍ଯ୍ୟନ୍ତ ଏହି ପ୍ରଦୂଷଣ ଆମ ପୃଥିବୀକୁ ଉତ୍ତପ୍ତ କରିଚାଲିବ। ଏହି ଗ୍ରୀଷ୍ମପ୍ରବାହ ବହୁ ଲକ୍ଷ ଲୋକଙ୍କ ଜୀବନ ନେବା ସହ ଟ୍ରିଲିୟନ ଡଲାରର କ୍ଷତି ପହଞ୍ଚାଇବ, ପରିବହନ ଓ ସ୍ବାସ୍ଥ୍ୟସେବା ବ୍ୟବସ୍ଥାକୁ ବିପର୍ଯ୍ୟସ୍ତ କରିବ ଏବଂ ଖାଦ୍ୟ ଭଳି ନିତ୍ୟାବଶ୍ୟକ ସାମଗ୍ରୀର ଦରବୃଦ୍ଧି ଘଟାଇବ। ସେ ଆହୁରି କହିଛନ୍ତି, ଏହି ପ୍ରମାଣ ସମ୍ପୂର୍ଣ୍ଣ ସ୍ପଷ୍ଟ: ଏହା ହେଉଛି ମାନବସମାଜର ଜୀବାଶ୍ମ ଇନ୍ଧନ୍ ପ୍ରତି ଆସକ୍ତି ଏବଂ ଏହା ଦ୍ୱାରା ବୃଦ୍ଧି ପାଉଥିବା ବିଶ୍ୱ ଜଳବାୟୁ ସଙ୍କଟର ଏକ ଭୟାନକ ପରିଣାମ।
‘ସି୩ଏସ୍’ର ତଥ୍ୟ ଅନୁଯାୟୀ, ଗତ ଅଗଷ୍ଟରେ ମେରୁ ଅଞ୍ଚଳ ବାହାରେ ଥିବା ଅନ୍ତର୍ଜାତୀୟ ସମୁଦ୍ର ପୃଷ୍ଠର ହାରାହାରି ତାପମାତ୍ରା ୨୧.୦୭ ଡିଗ୍ରୀ ସେଲ୍ସିୟସ୍ରେ ପହଞ୍ଚିଛି, ଯାହା ଅଗଷ୍ଟ ୨୦୨୩ରେ ସୃଷ୍ଟି ହୋଇଥିବା ପୂର୍ବ ରେକର୍ଡ ୨୦.୯୮ ଡିଗ୍ରୀ ସେଲ୍ସିୟସ୍କୁୁ ଅତିକ୍ରମ କରିଛି। ବିଗତ କିଛି ଦଶନ୍ଧି ଧରି ମାନବକୃତ ଜଳବାୟୁ ପରିବର୍ତ୍ତନ ଯୋଗୁ ଉତ୍ତପ୍ତ ହେଉଥିବା ସମୁଦ୍ରକୁ କ୍ରାନ୍ତୀୟ ପ୍ରଶାନ୍ତ ମହାସାଗରରେ ସୃଷ୍ଟ ଶକ୍ତିଶାଳୀ ‘ଏଲ୍ ନିନୋ’ ଆହୁରି ଅଧିକ ଉତ୍ତପ୍ତ କରିବାରେ ବଳ ଯୋଗାଇଛି।
