ନୂଆଦିଲ୍ଲୀ,୪।୧୧: ଆଇସିସି ପକ୍ଷରୁ ବୁଧବାର ଜାରି ହୋଇଥିବା ସଦ୍ୟତମ ରାଙ୍କିଂରେ ବଡ଼ ପରିବର୍ତ୍ତନ ଦେଖିବାକୁ ମିଳିଛି । ଅଷ୍ଟ୍ରେଲିଆର ଅଭିଜ୍ଞ ଦ୍ରୁତ ବୋଲର ମିଚେଲ୍ ଷ୍ଟାର୍କ ପୁଣିଥରେ ଟେଷ୍ଟ୍ ବୋଲିଂ ରାଙ୍କିଂର ଶୀର୍ଷ ସ୍ଥାନ ଦଖଲ କରିଛନ୍ତି । ଦକ୍ଷିଣ ଆଫ୍ରିକାର ମାର୍କୋ ୟାନସେନଙ୍କୁ ପଛରେ ପକାଇ ଷ୍ଟାର୍କ ଏହି ସଫଳତା ହାସଲ କରିଛନ୍ତି।
ଷ୍ଟାର୍କଙ୍କ ରେଟିଂ ପଏଣ୍ଟ ୮୮୧ ଥିବାବେଳେ ୟାନସେନଙ୍କ ପଏଣ୍ଟ ୮୭୫ ରହିଛି । ଦକ୍ଷିଣ ଆଫ୍ରିକା ବିପକ୍ଷ ତୃତୀୟ ଟେଷ୍ଟ୍ରେ ଷ୍ଟାର୍କ ୯ଟି ୱିକେଟ୍ ନେଇଥିଲେ। ଏହି ଦମ୍ଦାର ପ୍ରଦର୍ଶନ ତାଙ୍କୁ ରାଙ୍କିଂରେ ଗୋଟିଏ ପାହାଚ ଉପରକୁ ଉଠାଇଛି । ଟେଷ୍ଟ୍ ସହ ଟି-୨୦ ରାଙ୍କିଂରେ ମଧ୍ୟ ପରିବର୍ତ୍ତନ ହୋଇଛି । ଭାରତୀୟ ଅଧିନାୟକ ଶ୍ରେୟସ ଆୟର ଦୁଇଟି ସ୍ଥାନ ଉପରକୁ ଉଠି ବ୍ୟାଟିଂ ରାଙ୍କିଂରେ ସପ୍ତମ ସ୍ଥାନରେ ପହଞ୍ଚିଛନ୍ତି । ଟି-୨୦ ବ୍ୟାଟିଂ ଟପ୍-୧୦ରେ ଭାରତର ତିନି ଜଣ ଖେଳାଳି ସ୍ଥାନ ପାଇଛନ୍ତି। ଅଭିଷେକ ଶର୍ମା ପ୍ରଥମ ସ୍ଥାନରେ ଥିବାବେଳେ ଈଶାନ କିଶନ ତୃତୀୟ ସ୍ଥାନରେ ରହିଛନ୍ତି।
ଦକ୍ଷିଣ ଆଫ୍ରିକାର ସ୍ପିନର ସାଇମନ୍ ହାର୍ମର ଟେଷ୍ଟ୍ ବୋଲିଂ ରାଙ୍କିଂରେ ୯ଟି ସ୍ଥାନ ଉପରକୁ ଉଠି ସପ୍ତମ ସ୍ଥାନ ହାସଲ କରିଛନ୍ତି । ଅଷ୍ଟ୍ରେଲିଆ ବିପକ୍ଷ ତୃତୀୟ ଟେଷ୍ଟ୍ରେ ସେ ୧୦ଟି ୱିକେଟ୍ ନେଇଥିଲେ । ଏହା ସହ ଟେଷ୍ଟ୍ ବୋଲିଂ ଟପ୍-୧୦ରେ ଦକ୍ଷିଣ ଆଫ୍ରିକାର ତିନି ଜଣ ବୋଲର ସ୍ଥାନ ପାଇଛନ୍ତି । କାଗିସୋ ରବାଡା ଅଷ୍ଟମ ସ୍ଥାନରେ ଅଛନ୍ତି । ଟେଷ୍ଟ୍ ବୋଲିଂ ରାଙ୍କିଂର ଟପ୍-୫ରେ ଷ୍ଟାର୍କ ପ୍ରଥମ, ୟାନସେନ ଦ୍ୱିତୀୟ, ନ୍ୟୁଜିଲାଣ୍ଡର ମ୍ୟାଟ୍ ହେନରୀ ତୃତୀୟ, ଇଂଲଣ୍ଡର ଓଲି ରବିନ୍ସନ ଚତୁର୍ଥ ଏବଂ ଭାରତର ଯଶପ୍ରୀତ ବୁମ୍ରା ପଞ୍ଚମ ସ୍ଥାନରେ ରହିଛନ୍ତି।
ଟେଷ୍ଟ୍ ଅଲ୍ରାଉଣ୍ଡର ରାଙ୍କିଂରେ ମାର୍କୋ ୟାନସେନ ନିଜର ଶୀର୍ଷ ସ୍ଥାନ ବଜାୟ ରଖିଛନ୍ତି । କେପ୍ଟାଉନ୍ରେ ଖେଳାଯାଇଥିବା ତୃତୀୟ ଟେଷ୍ଟ୍ରେ ସେ ମାତ୍ର ୩ଟି ୱିକେଟ୍ ନେଇଥିଲେ ମଧ୍ୟ ବ୍ୟାଟ୍ରେ ୫୦ ରନ୍ର ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ । ଏହି ରାଙ୍କିଂରେ ଭାରତର ରବୀନ୍ଦ୍ର ଜାଡେଜା ଦ୍ୱିତୀୟ, ଦକ୍ଷିଣ ଆଫ୍ରିକାର ୱିଆନ୍ ମୁଲଡର ତୃତୀୟ, ବାଂଲାଦେଶର ମେହଦୀ ହାସନ ମିରାଜ ଚତୁର୍ଥ ଏବଂ ସାଇମନ୍ ହାର୍ମର ପଞ୍ଚମ ସ୍ଥାନରେ ଅଛନ୍ତି ।
