ଭୁବନେଶ୍ୱର,୧୧।୧(ବ୍ୟୁରୋ): ରାଜଧାନୀ ଭୁବନେଶ୍ୱରରେ ଆଉ ଏକ ହତ୍ୟାକାଣ୍ଡ ଘଟିଛି। ଜଣେ ଯୁବତୀଙ୍କୁ ତଣ୍ଟିଚିପି ହତ୍ୟା କରାଯାଇଛି। ସୋମବାର ଭରତପୁର ଥାନା ଅନ୍ତର୍ଗତ ତାରିଣୀ ବସ୍ତିର ଏକ ଭଡ଼ାଘରୁ ଉକ୍ତ ଯୁବତୀଙ୍କ ମୃତଦେହକୁ ପୋଲିସ ଜବତ କରିଛି। ସେ ହେଲେ ପୁରୀ ଜିଲା ବ୍ରହ୍ମଗିରି ଥାନା ଚାପମାଣିକ ଗ୍ରାମର ସୁରେଖା ପଲେଇ(୨୧)। ତାଙ୍କ ମାଆ କୁନ୍ତଳା ପଲେଇଙ୍କ ଅଭିଯୋଗକ୍ରମେ ପୋଲିସ ଏକ ହତ୍ୟା ମାମଲା (ନଂ.୧୪/୨୨) ରୁଜୁ କରି ତଦନ୍ତ ଆରମ୍ଭ କରିଛି। ଯୁବତୀଙ୍କ ବେକରେ କଳା ଦାଗ ରହିଛି। ଏଥିସହ ମୃତଦେହ ପଡିଥିବା ସ୍ଥାନରେ ଖାଦ୍ୟ ସାମଗ୍ରୀ ପଡିଥିବାରୁ ସେଠାରେ ଭୋଜିଭାତ ହୋଇଥିବା ଜଣାପଡିଛି। ଯୋଜନାବଦ୍ଧ ଭାବେ ଭୋଜିଭାତ କରି ତାଙ୍କୁ ତଣ୍ଟିଚିପି ହତ୍ୟା କରାଯାଇଥିବା ପୋଲିସ ସନ୍ଦେହ କରୁଛି। ଏଥିସହ ମୃତଦେହକୁ ବ୍ୟବଚ୍ଛେଦ ପାଇଁ ଏମ୍ସକୁ ପଠାଇଛି।
ସୂଚନା ଅନୁଯାୟୀ, ବ୍ରହ୍ମଗିରି ଚାପମାଣିକ ଗ୍ରାମର ଲୋକନାଥ ପଲେଇଙ୍କ ବଡଝିଅ ସୁରେଖା ଭୁବନେଶ୍ୱରରେ ୪ବର୍ଷ ହେବ ରହିବା ସହ ଏକ ବିୟୁଟି ପାର୍ଲରରେ କାମ କରିବା ସହ ତାରିଣୀ ବସ୍ତିରେ ଭଡ଼ା ଘର ନେଇ ରହୁଥିଲେ। ମାଉସୀ ଝିଅ ମୌସୁମୀ ପ୍ରଧାନ ପ୍ରାୟ ସମୟରେ ତାଙ୍କ ସହ ରହୁଥିଲେ। ସୋମବାର ସକାଳେ ମୌସୁମୀ ସୁରେଖାଙ୍କୁ ବହୁଥର ଫୋନ୍ କରିଥିଲେ ବି ସେ ଉଠାଇ ନ ଥିଲେ। ତେଣୁ ସେ ଅପରାହ୍ନ ୨ଟାରେ ସୁରେଖା ରହୁଥିବା ଭଡ଼ାଘରକୁ ଆସିଥିଲେ। ଘର କବାଟ ଆଉଜା ହୋଇଥିଲା। ଘର ଭିତରେ ସୁରେଖା ମୃତ ଅବସ୍ଥାରେ ଖଟରେ ପଡ଼ିଥିବା ସେ ଦେଖିବା ପରେ ପଡ଼ୋଶୀଙ୍କୁ ବଡ଼ପାଟିରେ ଡାକିଥିଲେ। ପଡୋଶୀମାନେ ପହଞ୍ଚତ୍ବା ପରେ ଥାନାକୁ ଖବର ଦେଇଥିଲେ। ଘଟଣାସ୍ଥଳରେ ଭରତପୁର ଥାନା ପୋଲିସ ପହଞ୍ଚତ୍ ତଦନ୍ତ ଆରମ୍ଭ କରିଥିଲା। ଏଥିସହ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରୁ ବିଭିନ୍ନ ନମୁନା ସଂଗ୍ରହ କରିଥିଲା। ଏନେଇ ଥାନା ଅଧିକାରୀ ବିଶ୍ୱରଞ୍ଜନ ସାହୁ କହିଛନ୍ତି, ଯୁବତୀଙ୍କ ମୃତ୍ୟୁ କେମିତି ହୋଇଛି ତାହା କହିହେବ ନାହିଁ। ବିଭିନ୍ନ ଦିଗକୁ ନେଇ ଘଟଣାର ତଦନ୍ତ ଚାଲୁ ରହିଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ସେ କହିଛନ୍ତି।
