ଅନୁଗୋଳ ଅଫିସ, ୧୧ା୪: ପଶ୍ଚିମା ଝଡ଼ ଓ କାଳବୈଶାଖୀ ପ୍ରଭାବ ହ୍ରାସ ପାଇଥିବାରୁ ତାତି ହଠାତ୍ ବଢ଼ିଯାଇଛି। ସୋମବାର ଅନୁଗୋଳର ତାପମାତ୍ରା ୩୯.୭ ଡିଗ୍ରୀ ଛୁଇଁଛି। ଏହା ଜିଲାରେ ଚଳିତବର୍ଷର ସର୍ବାଧିକ ତାପମାତ୍ରା ବୋଲି ରେକର୍ଡ କରାଯାଇଛି। ଫଳରେ କିଛିଦିନ ହେଲା ମେଘୁଆ ପାଗ ଯୋଗୁ ତାତିରୁ ତ୍ରାହି ପାଇଥିବା ଅନୁଗୋଳବାସୀ ଗ୍ରୀଷ୍ମ ପ୍ରବାହରେ ଦିନତମାମ ଅସ୍ତବ୍ୟସ୍ତ ହୋଇଛନ୍ତି। ସକାଳୁ ଟାଣ ଖରା ଯୋଗୁ ପୂର୍ବାହ୍ନ ୧୧ଟା ପରେ ସହରରେ ସେତେଟା ଗହଳି ନ ଥିଲା। ରାସ୍ତା ମଧ୍ୟ ଖାଁ ଖାଁ ହୋଇଯାଇଥିଲା। ଜନଗହଳିପୂର୍ଣ୍ଣ ସ୍ଥାନ କୁହାଯାଉଥିବା ବଜାର ଛକରେ ବ୍ୟବସାୟିକ ପ୍ରତିଷ୍ଠାନ ଖୋଲା ରହିଥିଲେ ହେଁ ଗ୍ରାହକଙ୍କ ସଂଖ୍ୟା କମି ଯାଇଥିଲା। ଆଜିଠାରୁ ସରକାରୀ ଅଫିସ ସକାଳୁଆ ହୋଇଥିବା ବେଳେ ମଙ୍ଗଳବାରଠାରୁ ଜିଲାର ସମସ୍ତ ସ୍କୁଲରେ ସକାଳୁଆ ପାଠପଢ଼ା ହେବ। ସକାଳ ୭ଟାରୁ କ୍ଲାସ ଆରମ୍ଭ ହୋଇ ପୂର୍ବାହ୍ନ ୧୧ଟା ୩୦ ଯାଏ ଚାଲିବ ବୋଲି ଜିଲା ଶିକ୍ଷା ବିଭାଗ ପକ୍ଷରୁ ସୂଚନା ମିଳିଛି।
ସାଧାରଣତଃ ଏପ୍ରିଲ ଆରମ୍ଭରୁ ଗ୍ରୀଷ୍ମ ପ୍ରବାହ ଜୋର୍ ଧରିଥାଏ। ହେଲେ ଚଳିତବର୍ଷ ପଶ୍ଚିମା ଝଡ଼ ଓ କାଳବୈଶାଖୀ ପ୍ରଭାବ ଯୋଗୁ ଏହା ଦ୍ୱିତୀୟ ସପ୍ତାହ ଯାଏ ଅନୁଭବ ହୋଇ ନ ଥିଲା। କିନ୍ତୁ ଏବେ ଉତ୍ତର ଓ ଉତ୍ତର ପଶ୍ଚିମ ଦିଗରୁ ଶୁଷ୍କ ବାୟୁ ପ୍ରବାହିତ ହୋଉଥିବାରୁ ତାତି ହଠାତ୍ ବଢ଼ିଯାଇଛି। ଆଗାମୀ ଦିନେ ଦୁଇଦିନ ମଧ୍ୟରେ ତାପମାତ୍ରା ଆହୁରି ଊର୍ଦ୍ଧ୍ୱକୁ ଉଠିବ ବୋଲି ଅନୁଗୋଳ ଉପଜିଲାପାଳଙ୍କ ପାଣିପାଗ ଅଫିସ ପକ୍ଷରୁ କୁହାଯାଇଛି। ତେଣୁ ଆଗକୁ ଅନୁଗୋଳ ସହର ସମେତ ଜିଲା ଏକପ୍ରକାର ତତଲା କଡେଇରେ ପରିଣତ ହେବାର ସମ୍ଭାବନା ରହିଛି। ତେବେ ଜିଲାରେ ସୋମବାର ଠାରୁ ସମସ୍ତ ସରକାରୀ କାର୍ଯ୍ୟାଳୟରେ ସକାଳୁ କାର୍ଯ୍ୟ ଆରମ୍ଭ ହୋଇଛି। ଅନୁଗୋଳ ପୌରପାଳିକା ପକ୍ଷରୁ ସହରରେ ଥିବା ସମସ୍ତ ପାନୀୟ ଜଳ ପ୍ରକଳ୍ପକୁ ଚାଲୁ କରାଯାଇଛି। ଆବଶ୍ୟକସ୍ଥଳେ ଜଳଛତ୍ର ଖୋଲାଯିବାକୁ ଯୋଜନା ହୋଇଛି। ସହରରେ ବୁଲା ଗୋରୁଙ୍କ ପାଇଁ ଜଳ ବ୍ୟବସ୍ଥା କରାଯିବ ବୋଲି ପୌରପରିଷଦ ପକ୍ଷରୁ ସୂଚନା ପ୍ରଦାନ କରାଯାଇଛି। ସେହିପରି ସରକାରୀ ନିର୍ଦ୍ଦେଶ ଅନୁଯାୟୀ ମଙ୍ଗଳବାରଠାରୁ ସବୁ ସ୍କୁଲ ସକାଳୁଆ ହେବ। ସକାଳ ୭ଟାରୁ ପୂର୍ବାହ୍ନ ୧୧ଟା ୩୦ ଯାଏ ସ୍କୁଲ ଚାଲିବ। ଆଗକୁ ତାତି ଅଧିକ ବଢ଼ିବାକୁ ଥିବାରୁ ଲୋକମାନେ ସତର୍କ ରହିବାକୁ ଜିଲା ଜରୁରିକାଳୀନ ବିଭାଗ ପକ୍ଷରୁ କୁହାଯାଇଛି। ଆବଶ୍ୟକ ପଡ଼ିଲେ ମଧ୍ୟାହ୍ନ ସମୟରେ ଲୋକମାନେ ସାଙ୍ଗରେ ଛତା, ଗାମୁଛା ଓ ପାଣି ବୋତଲ ଧରି ଆସିବାକୁ ପରାମର୍ଶ ଦିଆଯାଇଛି। ମଧ୍ୟାହ୍ନ ୧୨ଟା ପରେ ଶ୍ରମିକମାନେ କୌଣସି କାର୍ଯ୍ୟ କରିବେ ନାହିଁ ବୋଲି ବିଭିନ୍ନ ବିଭାଗକୁ ଚିଠି କରାଯାଇଛି। ଏହାକୁ କଡ଼ାକଡ଼ି ଭାବେ ପାଳନ କରିବାକୁ ଜିଲା ଶ୍ରମ ବିଭାଗ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଥିବା ପ୍ରଶାସନ ପକ୍ଷରୁ କୁହାଯାଇଛି। ଏଥିରେ ଖିଲାପ କରାଗଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଶ୍ରମ ବିଭାଗ ପକ୍ଷରୁ ଚିଠିରେ ଉଲ୍ଲେଖ ରହିଛି।
ଆବଶ୍ୟକସ୍ଥଳେ ଜଳଛତ୍ର ଖୋଲାଯିବ
ଅନୁଗୋଳ ସହରରେ ଥିବା ପ୍ରାୟ ୨୫ରୁ ଅଧିକ ପାନୀୟ ଜଳ ପ୍ରକଳ୍ପକୁ କାର୍ଯ୍ୟକ୍ଷମ କରାଯାଇଛି। ଅନ୍ୟ ଯେଉଁଠି ସମସ୍ୟା ରହିଛି, ତାହାକୁ ତୁରନ୍ତ ମରାମତି କରାଯାଇ ଲୋକଙ୍କୁ ପାଣି ଯୋଗାଇ ଦିଆଯିବ। ଆବଶ୍ୟକସ୍ଥଳେ ଜଳଛତ୍ର ଖୋଲଯିବ।
-ଅକ୍ଷୟ କୁମାର ସାମନ୍ତ, ପୌରାଧ୍ୟକ୍ଷ, ଅନୁଗୋଳ
୧୧ଟା ୩୦ ପର୍ଯ୍ୟନ୍ତ ପାଠପଢ଼ା
ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ଜିଲାର ସମସ୍ତ ବିଦ୍ୟାଳୟ ସକାଳ ୭ଟାରୁ ଆରମ୍ଭ ହୋଇ ପୂର୍ବାହ୍ନ ୧୧ଟା ୩୦ଯାଏ ଚାଲିବ ବୋଲି ସରକାରଙ୍କ ପକ୍ଷରୁ ନିର୍ଦ୍ଦେଶ ଆସିଛି। ଏହାକୁ ଅନୁଗୋଳ ଜିଲାରେ କାଯର୍ର୍ୟକାରୀ କରାଯିବ। ପ୍ରତ୍ୟେକ ବିଦ୍ୟାଳୟରେ ଛାତ୍ରୀଛାତ୍ରଙ୍କ ପାଇଁ ପାନୀୟ ଜଳର ବ୍ୟବସ୍ଥା କରାଯିବା ସହ ଅନ୍ୟାନ୍ୟ ସୁବିଧା କରାଯାଇଛି।
-ନିରଞ୍ଜନ ସାହୁ, ଜିଲା ଶିକ୍ଷା ଅଧିକାରୀ
ସତର୍କ ରହିବା ଜରୁରୀ
ହଠାତ୍ ଗ୍ରୀଷ୍ମ ପ୍ରବାହ ବଢିଯିବା ସମସ୍ତଙ୍କ ଚିନ୍ତାର କାରଣ ହୋଇଛି। ଆଗକୁ ଏହା ଅଧିକ ବୃଦ୍ଧିପାଇବ ବୋଲି ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଥିବାରୁ ଲୋକମାନେ ସତର୍କ ରହିବା ଜରୁରୀ। ଅତି ଆବଶ୍ୟକ ପଡିଲେ ମଧ୍ୟାହ୍ନରେ ଘରୁ ବାହାରନ୍ତୁ ନ ହେଲେ ଅଂଶୁଘାତର ଆଶଙ୍କା ରହୁଛି।
-ସୌମ୍ୟରଞ୍ଜନ ଦାଶ, ଅନୁଗୋଳ
ପାନୀୟ ଜଳ ଉପରେ ପ୍ରଶାସନ ଗୁରୁତ୍ୱ ଦେଉ
ଅନୁଗୋଳ ଜିଲାର ବିଭିନ୍ନ ଅଞ୍ଚଳରେ ଖରାଦିନେ ପାନୀୟ ଜଳର ଅଭାବ ଦେଖାଦେଇଥାଏ। ତେଣୁ ଲୋକଙ୍କ ନିକଟରେ ବିଶୁଦ୍ଧ ପାନୀୟ ଜଳ ପହଞ୍ଚାଇବା ଉପରେ ପ୍ରଶାସନ ଅଧିକ ଗୁରୁତ୍ୱ ଦେବା ଆବଶ୍ୟକ। ଅଚଳ ପ୍ରକଳ୍ପକୁ ତୁରନ୍ତ ମରାମତି କରାଯାଉ।
-ସାକିନ ପ୍ରିୟଦର୍ଶିନୀ ଜେନା, ଅନୁଗୋଳ
