ଇସଲାମାବାଦ/ତାଇପେ ସିଟି,୧୩।୧୨ : ଚାଇନାର ବଢୁଥିବା ପ୍ରଭାବ ଉପରେ ନଜର ରଖୁଥିବା ଏକ ଅଧ୍ୟୟନରୁ ଜଣାପଡିଛି ଯେ ପୃଥିବୀର ୮୨ ଦେଶ ଉପରେ ଚାଇନା ନିଜର ପ୍ରଭାବ ବିସ୍ତାର କରିଛି। ଏହି ତାଲିକାର ଶୀର୍ଷରେ ପାକିସ୍ତାନ ରହିଛି। ପାକିସ୍ତାନ ଚାଇନା ଦ୍ୱାରା ଅଧିକ ପ୍ରଭାବିତ ହୋଇଛି। ରେଡିଓ ଫ୍ରି ୟୁରୋପ ଏବଂ ରେଡିଓ ଲିବର୍ଟି ଦ୍ୱାରା ଏହି ସୂଚନା ଦିଆଯାଇଛି।
ତାଇୱାନର ଏକ ଗବେଷଣା ସଂସ୍ଥା ଡବଲଥିଙ୍କ ଲ୍ୟାବ୍ସ ଦ୍ୱାରା ଡିସେମ୍ବର ୮ ରେ ଜାରି ହୋଇଥିବା ଚାଇନା ଇଣ୍ଡେକ୍ସ ନାମକ ଏକ ଡାଟାବେସରେ ପୃଥିବୀରେ ଚାଇନା ନିଜର ପ୍ରଭାବ ବିସ୍ତାର କରିଥିବା ଦେଶ ମଧ୍ୟରେ ପାକିସ୍ତାନକୁ ତାଲିକାର ଶୀର୍ଷରେ ରଖାଯାଇଛି।
ଏହି ସଂଗଠନ କହିଛି ଯେ ବୈଦେଶିକ ତଥା ଘରୋଇ ନୀତି,ପ୍ରଯୁକ୍ତିବିଦ୍ୟା ଏବଂ ଅର୍ଥନୀତି କ୍ଷେତ୍ରରେ ଚାଇନା ଉପରେ ଏହାର ନିର୍ଭରଶୀଳତା ଏସବୁ ଦେଶକୁ ବିଶେଷ ଅସୁରକ୍ଷିତ କରିଥାଏ। ରିପୋର୍ଟ ଅନୁଯାୟୀ, ଚାଇନା ଉପରେ ନିର୍ଭରଶୀଳତା ଦୃଷ୍ଟିରୁ ପାକିସ୍ତାନ ପରେ କାମ୍ବୋଡିଆ ଏବଂ ସିଙ୍ଗାପୁର ଦ୍ୱିତୀୟ ସ୍ଥାନରେ ଥିବାବେଳେ ଥାଇଲାଣ୍ଡ ତୃତୀୟ ସ୍ଥାନରେ ରହିଛି। ସୂଚକାଙ୍କରେ ଦକ୍ଷିଣ ଆଫ୍ରିକା ଏବଂ ପେରୁ ପଞ୍ଚମ ସ୍ଥାନରେ ରହିଛନ୍ତି। ଫିଲିପାଇନ୍ସ ସପ୍ତମ ସ୍ଥାନରେ ଥିବାବେଳେ ମାଲେସିଆ ଦଶମ ସ୍ଥାନରେ ରହିଛି।
ସୂଚକାଙ୍କରେ କିର୍ଗିଜସ୍ତାନ ଏବଂ ତାଜିକିସ୍ତାନ ଅଷ୍ଟମ ତଥା ନବମ ସ୍ଥାନରେ ରହିଛନ୍ତି। ଏହି ଦୁଇ ଦେଶ ଚାଇନାର ଜିନଜିଆନ ପ୍ରଦେଶ ସହିତ ଏକ ସୀମା ବାଣ୍ଟିଛନ୍ତି। ରିପୋର୍ଟ ଅନୁଯାୟୀ, ୧୯ତମ ସ୍ଥାନରେ ଜର୍ମାନୀ ଭଳି ୟୁରୋପୀୟ ଦେଶ ରହିଥିବାବେଳେ ଆମେରିକା ୨୧ ତମ ସ୍ଥାନରେ ରହିଛି। ଚାଇନା ଇଣ୍ଡେକ୍ସ ପ୍ରସ୍ତୁତି କରିବାରେ ଅନୁସନ୍ଧାନକାରୀ ଦଳ ଉଚ୍ଚଶିକ୍ଷା, ଘରୋଇ ରାଜନୀତି, ଅର୍ଥନୈତିକ ସମ୍ପର୍କ, ବୈଦେଶିକ ନୀତି, ସାମରିକ ସହଯୋଗ, ଗଣମାଧ୍ୟମ, ପ୍ରଯୁକ୍ତିବିଦ୍ୟା ଏବଂ ସାଂସ୍କୃତିକ ସମ୍ପର୍କ ସମେତ ସମଗ୍ର ବିଶ୍ୱରେ ପ୍ରଭାବ ଉପରେ ନଜର ରଖିବା ପାଇଁ ନଅଟି ବିଭାଗ ଉପରେ ଅଧ୍ୟୟନ କରିଥିଲେ।
ଡବଲଥିଙ୍କ ଲ୍ୟାବର ସହ-ପ୍ରତିଷ୍ଠାତା ତଥା ସିଇଓ ମିନ ହ୍ବେନ-ୱୋ ରେଡିଓ ଫ୍ରି ୟୁରୋପକୁ କହିଛନ୍ତି ଯେ ଚାଇନା ପ୍ରଭାବର ବିଭିନ୍ନ ଦିଗ ବିଷୟରେ ସଚେତନତା ସୃଷ୍ଟି କରିବା ପାଇଁ ଡାଟାବେସ ତିଆରି କରାଯାଇଛି। ଏହି ଡାଟାବେସର ଏକ ପ୍ରମୁଖ ଲକ୍ଷ୍ୟ ହେଉଛି ଚାଇନାର ପ୍ରଭାବର ବିଭିନ୍ନ ଦିଗ ବିଷୟରେ ବିଶ୍ୱବ୍ୟାପୀ ସଚେତନତା ବୃଦ୍ଧି କରିବା। ସେ କହିଛନ୍ତି ଯେ ଚୀନ ଉପରେ ଚାପ ପ୍ରୟୋଗ କରିବାର ବିଭିନ୍ନ ଉପାୟ ବିଷୟରେ ଏହା ଅନେକ ତଥ୍ୟ ଦେଇପାରେ।
ସୂଚକାଙ୍କର ଶୀର୍ଷରେ ପାକିସ୍ତାନ ରହିବାର କାରଣ ହେଉଛି ଚାଇନା-ପାକିସ୍ତାନ ଅର୍ଥନୈତିକ କରିଡର (ସିପିଇସି) ର ଉପସ୍ଥିତି। କରିଡର ହେଉଛି ବେଜିଂର ବେଲ୍ଟ ଆଣ୍ଡ ରୋଡ ପଦକ୍ଷେପର ଏକ କେନ୍ଦ୍ର, ଯାହା ଗତ ୧୦ ବର୍ଷ ମଧ୍ୟରେ ଚାଇନାର ସଂସ୍ଥାଗୁଡ଼ିକୁ ଭିତ୍ତିଭୂମି ପ୍ରକଳ୍ପର ବିକାଶରେ ଆର୍ଥିକ ସହାୟତା ଦେଇଛି। ଏହି କାରଣରୁ ଚାଇନା ଉପରେ ପାକିସ୍ତାନର ନିର୍ଭରଶୀଳତା ବହୁତ ବୃଦ୍ଧି ପାଇଛି।
