ବ୍ରହ୍ମପୁର ଅଫିସ,୮ା୯: ଚିକିତ୍ସା ଅବହେଳାରୁ ବ୍ରହ୍ମପୁର ବଡ ମେଡିକାଲରେ ଏକ ନବଜାତ ଶିଶୁର ମୃତ୍ୟୁ ଘଟିଥିବା ନେଇ ଗୁରୁବାର ଅଭିଯୋଗ ହୋଇଛି। ଏହି ଘଟଣାକୁ ନେଇ ମୃତ ଶିଶୁଙ୍କ ବାପା ପ୍ରମୋଦ କୁମାର ଉଥାନସିିଂ ଏମ୍କେସିଜି ଅଧୀକ୍ଷକଙ୍କ ନିକଟରେ ଅଭିଯୋଗ କରିଛନ୍ତି। ଏହି ଘଟଣା ଜଣାପଡିବା ପରେ ସେଠାରେ ଉତ୍ତେଜନା ଦେଖାଦେଇଥିଲା।
ଘଟଣାରୁ ପ୍ରକାଶ ଯେ, ଗେଟବଜାରରେ ରହୁଥିବା ପ୍ରମୋଦ ସ୍ତ୍ରୀଙ୍କ ପ୍ରସବ ପାଇଁ ଏମ୍କେସିଜି ପ୍ରସୂତି ବିଭାଗରେ ତାଙ୍କୁ ଭର୍ତ୍ତି କରିଥିଲେ। ଗତ ୬ତାରିଖରେ ତାଙ୍କର ଏକ ଶିଶୁପୁତ୍ର ଜନ୍ମ ହୋଇଥିଲା। ଶିଶୁଟିର କିଛି ସ୍ବାସ୍ଥ୍ୟଗତ ସମସ୍ୟା ଥିବାରୁ ତାଙ୍କୁ ଆଇସିୟୁରେ ଭର୍ତ୍ତି କରାଯାଇଥିଲା। ବୁଧବାର ଶିଶୁର ସ୍ବାସ୍ଥ୍ୟାବସ୍ଥାରେ ସୁଧାର ଆସୁଥିବା କର୍ମଚାରୀମାନେ ପ୍ରମୋଦଙ୍କୁ କହିଥିଲେ। କିନ୍ତୁ ଗୁରୁବାର ଶିଶୁ ହଠାତ୍ ଗୁରୁତର ହୋଇ ପଡ଼ିଥିବା କର୍ମଚାରୀମାନେ ତାଙ୍କୁ କହିଥିଲେ। ଏହାପରେ ମଧ୍ୟାହ୍ନରେ ଶିଶୁର ମୃତ୍ୟୁ ହୋଇଥିଲା। ଆଇସିୟୁରେ ଚିକିତ୍ସା ଅବହେଳା ଯୋଗୁ ପୁଅର ମୃତ୍ୟୁ ଘଟିଥିବା ପ୍ରମୋଦ ଏମ୍କେସିଜି ଅଧୀକ୍ଷକଙ୍କ ନିକଟରେ ଅଭିଯୋଗ କରିଛନ୍ତି। ଘଟଣାର ତଦନ୍ତ କରି ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଅନୁରୋଧ କରିଛନ୍ତି।
