ବରଗଡ଼,୫।୭(ପ୍ରେମାନନ୍ଦ ଖମାରୀ): ବରଗଡ଼ ଜଳସମ୍ପଦ ବିଭାଗର ବିବାଦ ପିଛା ଛାଡୁନାହିଁ। ବରଗଡ଼-ଭେଡ଼େନ କେନାଲରେ ବକ୍ସ କଣ୍ଡୁଇଟ୍ (କେନାଲ ସୌନ୍ଦର୍ଯ୍ୟକରଣ ପାଇଁ ତିଆରି ହୋଇଥିବା କାର୍ଯ୍ୟ) ନିର୍ମାଣରେ ଅନିୟମିତତା ଧରାପଡ଼ି ବିଭାଗୀୟ ଅଧୀକ୍ଷଣ ଯନ୍ତ୍ରୀ, ନିର୍ବାହୀ ଯନ୍ତ୍ରୀ ଏବଂ ସହକାରୀ ନିର୍ବାହୀ ଯନ୍ତ୍ରୀ ନିଲମ୍ବିତ ହେବା ଘଟଣାକୁ ନେଇ ଚର୍ଚ୍ଚା ନ ଥମୁଣୁ ବର୍ତ୍ତମାନ ଏହି କେନାଲର ପୁରୁଣା ରିଜର୍ଭ ପୋଲିସ ପାଖରେ ନିର୍ମାଣାଧୀନ ଏକ ବ୍ରିଜ୍ ନିର୍ମାଣକୁ ନେଇ ପୁଣିଥରେ ଏହି ବିଭାଗ ବିବାଦୀୟ ସ୍ଥିତିରେ ଛନ୍ଦି ହୋଇଯାଇଛି। ବ୍ରିଜ ନିର୍ମାଣର ସ୍ଥାନ ନିରୂପଣରେ ତ୍ରୁଟି ରହିବା ସହିତ ଏଥିରେ ନିମ୍ନମାନର କାମ ହୋଇଥିବା ଅଭିଯୋଗ ହୋଇଛି। ତେବେ ବ୍ରିଜ ନିର୍ମାଣସ୍ଥଳ ପରିଦର୍ଶନ ସହିତ ସେ ଦିଗରେ ତଦନ୍ତ କରାଯାଇ ବିହିତ ପଦକ୍ଷେପ ନିଆଯିବ ବୋଲି ଜିଲାପାଳ ଆଦିତ୍ୟ ଗୋୟଲ କହିଛନ୍ତି।
ସୂଚନା ଅନୁଯାୟୀ, ବରଗଡ଼-ଭେଡ଼େନ ରାସ୍ତାପାର୍ଶ୍ୱ ପୁରୁଣା ରିଜର୍ଭ ପୋଲିସ ନିକଟରେ ଏହି କେନାଲ ପରେ ଏକ ପୁରୁଣା ବ୍ରିଜ ରହିଛି ଏବଂ ତାହା ସେଠାରୁ ଗୋବିନ୍ଦପାଲି ଦେଇ ବରଗଡ଼ ସହରକୁ ସଂଯୋଗ କରୁଛି। ଏହାସହିତ ସେହି ବ୍ରିଜ ଦେଇ ବରଗଡ଼ ସହର ଲୋକେ ଭେଡ଼େନ ରାସ୍ତାକୁ ଆସିବା ସହିତ ତୋରା, ଅଡ଼ଗାଁ ଆଦି ଅଞ୍ଚଳକୁ ଯାତାୟାତ କରିଥାନ୍ତି। ଏହା ସହିତ କେନାଲ ପାର୍ଶ୍ୱରେ ବ୍ୟବସାୟିକ ଗୋଦାମ ଗୃହ ମଧ୍ୟ ରହିଛି। ତେବେ ସେହି ପୁରୁଣା ବ୍ରିଜ୍ଟି ସଂକୁଚିତ ଏବଂ ଦୁର୍ବଳ ହୋଇ ପଡ଼ିବାରୁ ତା’ର ପାଖାପାଖି ଉପଯୁକ୍ତ ସ୍ଥାନରେ ଏକ ପ୍ରଶସ୍ତ ବ୍ରିଜ ନିର୍ମାଣ କରିବାକୁ ପ୍ରସ୍ତାବ ଦିଆଯାଇଥିଲା ଏବଂ ସେହି ପ୍ରସ୍ତାବ ଅନୁଯାୟୀ ବ୍ରିଜ ନିର୍ମାଣ ପାଇଁ ରାଜ୍ୟ ସରକାର ପ୍ରାୟ ୫୦ଲକ୍ଷ ଟଙ୍କା ଅନୁଦାନ ମଞ୍ଜୁର କରିଥିଲେ। ଏହାପରେ ସେଠାରେ କେନାଲ ଉପରେ ଏକ ନୂତନ ବ୍ରିଜ ନିର୍ମାଣ ଚାଲିଛି।
ମାତ୍ର ଦୂରଦୃଷ୍ଟି ଅଭାବରୁ ବ୍ରିଜ ନିର୍ମାଣ ସ୍ଥାନ ନିରୂପଣ ଠିକ୍ଭାବେ ହୋଇ ନ ଥିବା ଅଭିଯୋଗ ହୋଇଛି। ଫଳରେ ନୂତନ ବ୍ରିଜ ଦ୍ୱାରା ଲୋକେ ଆଗଭଳି ଉପକୃତ ହେବେ ନାହିଁ, ବରଂ ସମସ୍ୟା ବଢ଼ି ଚାଲିବ ବୋଲି ମତପ୍ରକାଶ ପାଇଛି। ବରଗଡ଼ର ପୂର୍ବତନ ପୌରାଧ୍ୟକ୍ଷ ପ୍ରଶାନ୍ତ ବେହେରା କହିଛନ୍ତି, ବ୍ରିଜଟି ଯେଉଁଠି ନିର୍ମାଣ ହେଉଛି, ତା’ର ଗୋଟିଏ ପାର୍ଶ୍ୱରେ ବରଗଡ଼-ଭେଡ଼େନ ରାସ୍ତା ଥିବାବେଳେ ଅନ୍ୟପାର୍ଶ୍ୱରେ ରୟତ ଜମି ରହିଛି। ରୟତ ଜମିରେ ଜମି ମାଲିକ ବାଡ଼ ମଧ୍ୟ ଦେଇଦେଲେଣି। ସେହିପରି ବ୍ରିଜ ନିର୍ମାଣ ମଧ୍ୟ ଅତି ନିମ୍ନମାନର ହେଉଛି। ଫଳରେ ବ୍ରିଜ ନିର୍ମାଣ ହେଲେ ମଧ୍ୟ ସେ ଦେଇ ଭାରିଯାନ ଯାତାୟାତ ସମ୍ଭବ ହେବ ନାହିଁ। ଏ ନେଇ ସେ ବିଭାଗୀୟ ଯନ୍ତ୍ରୀଙ୍କଠାରୁ ଜିଲାପାଳଙ୍କୁ ବାରମ୍ବାର ଅବଗତ କରି ସାରିଛନ୍ତି। କିନ୍ତୁ କିଛି ପଦକ୍ଷେପ ନିଆଯାଇ ନାହିଁ ଏବଂ ଖାମଖିଆଲଭାବେ ବ୍ରିଜ ନିର୍ମାଣ କାମ ଚାଲିଥିବା ସେ ଅଭିଯୋଗ କରିଛନ୍ତି। ସେହିପରି ଅନ୍ୟଜଣେ ସ୍ଥାନୀୟ ନାଗରିକ ଅଭୟ ବାଗ କହିଛନ୍ତି, କେନାଲର ଡାହାଣ ପାର୍ଶ୍ୱରେ ତାଙ୍କର ଏକ ଗୋଦାମ ଗୃହ ରହିଛି। ବିଭିନ୍ନ ସମୟରେ ପୁରୁଣା ବ୍ରିଜ ଦେଇ ସେଠାକୁ ଟ୍ରକ ଏବଂ ଅନ୍ୟ ଗାଡ଼ିଗୁଡ଼ିକ ଯାତାୟାତ କରୁଛି। ନୂତନ ବ୍ରିଜ ହେଲେ ପୂର୍ବାପେକ୍ଷା ଅଧିକ ସୁବିଧା ହେବ ବୋଲି ଆଶା କରୁଥିଲୁ। କିନ୍ତୁ ସେହି ବ୍ରିଜ ଦେଇ ଯଦି ବଡ଼ ଗାଡ଼ି ଅତିକ୍ରମ କରିପାରିବ ନାହିଁ, ନିଶ୍ଚିତ ଭାବେ ତାଙ୍କ ବ୍ୟବସାୟ ସମେତ ଅନେକ ଲୋକେ ପ୍ରଭାବିତ ହେବେ ବୋଲି ସେ କହିଛନ୍ତି।
