ନୂଆଦିଲ୍ଲୀ,୧୬।୬: ୨୦୨୪ରୁ ଭାରତ ସରକାର ଦୀର୍ଘକାଳୀନ କୋଇଲା ବିଦ୍ୟୁତ କ୍ରୟ ଚୁକ୍ତି (PPA) ପୁଣି ଆରମ୍ଭ କରିବା ପରେ, ଆଦାନୀ ଗ୍ରୁପ ଏକ ବଡ଼ ବ୍ୟବସାୟିକ ସଫଳତା ହାସଲ କରିଛି। ଆଗାମୀ ୨୫ ବର୍ଷ ମଧ୍ୟରେ ଏହି ସରକାରୀ ଚୁକ୍ତିଗୁଡ଼ିକରୁ ଆଦାନୀ ଗ୍ରୁପ ୧୩.୨୭ ଲକ୍ଷ କୋଟି ଟଙ୍କାରୁ ଅଧିକ ରାଜସ୍ବ ଆୟ କରିବାକୁ ଯାଉଛି। ତେବେ ଏହି ସମସ୍ତ ବିଦ୍ୟୁତ କ୍ରୟ ଚୁକ୍ତି ମଧ୍ୟରୁ କେବଳ ଗୋଟିଏକୁ ଛାଡ଼ି ବାକି ସମସ୍ତ ଚୁକ୍ତି ଭାଜପା ଶାସିତ ରାଜ୍ୟଗୁଡ଼ିକରୁ ହିଁ ମିଳିଛି।
ମିଳିଥିବା ସୂଚନା ଅନୁଯାୟୀ, ମାର୍ଚ୍ଚ ୨୦୨୪ରୁ ଜାନୁଆରୀ ୨୦୨୬ ମଧ୍ୟରେ ଏଭଳି ୧୨ଟି ଦୀର୍ଘକାଳୀନ ଚୁକ୍ତି ପାଇଁ ବିଡ (Bid) ଡକାଯାଇଥିଲା। ଏଥିମଧ୍ୟରୁ ୮ଟି ଟେଣ୍ଡର ଭାଜପା ଶାସିତ ରାଜ୍ୟଗୁଡ଼ିକ ଦ୍ୱାରା ଜାରି କରାଯାଇଥିଲା। ଆଦାନୀ ଗ୍ରୁପ ଏହି ସମସ୍ତ ୮ଟି ଯାକ ଟେଣ୍ଡର ହାତେଇବାରେ ସଫଳ ହୋଇଛି, କେତେକ ସ୍ଥାନରେ ଏକାକୀ ଏବଂ କେତେକ ସ୍ଥାନରେ ଅନ୍ୟ ସଂସ୍ଥା ସହ ମିଶି ଏହି ଚୁକ୍ତି ହାସଲ କରିଛି।
ଅନ୍ୟପଟେ, ବାକି ରହିଥିବା ୪ଟି ଟେଣ୍ଡର ଅଣ-ଭାଜପା ବା ବିରୋଧୀ ଦଳ ଶାସିତ ରାଜ୍ୟଗୁଡ଼ିକର ଥିଲା। ରିପୋର୍ଟ ଅନୁଯାୟୀ, ଯେତେବେଳେ ବିରୋଧୀ ଶାସିତ ରାଜ୍ୟଗୁଡ଼ିକ ସମାନ ଆକାର ଏବଂ ସମାନ ଅବଧିର ଟେଣ୍ଡର ଜାରି କରିଥିଲେ, ସେଠାରେ ଆଦାନୀ ଗ୍ରୁପ ମାତ୍ର ଗୋଟିଏ ବିଡ ଜିତିବାରେ ସଫଳ ହୋଇଥିଲା। ପଶ୍ଚିମବଙ୍ଗ (ତୃଣମୂଳ କଂଗ୍ରେସ ଶାସିତ) ଭଳି କେତେକ କ୍ଷେତ୍ରରେ ଆଦାନୀ ଗ୍ରୁପ ଯୋଗ୍ୟ ବିବେଚିତ ହେବା ପରେ ମଧ୍ୟ ନିଜେ ଟେଣ୍ଡର ପ୍ରକ୍ରିୟାରୁ ଓହରି ଯାଇଥିଲା।
କେବଳ ଦୁଇଟି ଘଟଣା ମଧ୍ୟରେ ସମାନତା ଥିବା ମାତ୍ରେ ଯେ ସେମାନଙ୍କ ଭିତରେ ସମ୍ପର୍କ ଅଛି ତାହା କୁହାଯାଇପାରିବ ନାହିଁ। କିନ୍ତୁ ପୂର୍ବରୁ ଏକ ରିପୋର୍ଟରେ ଦର୍ଶାଯାଇଥିଲା ଯେ, କେତେକ ଭାଜପା ଶାସିତ ରାଜ୍ୟ ନିଜର ଟେଣ୍ଡର ନିୟମ ଓ ସର୍ତ୍ତାବଳୀକୁ ଏଭଳି ଭାବେ ବଦଳାଇଥିଲେ ଯାହା ସିଧାସଳଖ ଆଦାନୀ ଗ୍ରୁପ୍କୁ ଫାଇଦା ପହଞ୍ଚାଇଥିଲା।
ସୂଚନାଯୋଗ୍ୟ ଯେ, ପ୍ରତ୍ୟେକ ବିଦ୍ୟୁତ କ୍ରୟ ଚୁକ୍ତି ପାଇଁ ଧାର୍ଯ୍ୟ ହୋଇଥିବା ଶୁଳ୍କ (Tariff) ଏବଂ ଚୁକ୍ତିର ସମୟସୀମାକୁ ଆଧାର କରି ଆଦାନୀ ଗ୍ରୁପର ଏହି ଆନୁମାନିକ ୧୩.୨୭ ଲକ୍ଷ କୋଟି ଟଙ୍କାର ଭବିଷ୍ୟତ ଆୟ ଆକଳନ କରାଯାଇଛି।
