ବ୍ରହ୍ମପୁର ଅଫିସ,୨୫ା୧୦: ଜିଲାରେ ସୋମବାରଠାରୁ ପାର୍ବଣ ଆରମ୍ଭ । ସେଥିପାଇଁ ବିଭିନ୍ନ ଶକ୍ତିପୀଠ, ମନ୍ଦିରରେ ପୂଜାର୍ଚ୍ଚନା ଅନୁଷ୍ଠିତ ହେବ। ଦଶହରାରେ ଶାନ୍ତି ଶୃଙ୍ଖଳାକୁ ଦୃଷ୍ଟିରେ ରଖି ଅପରାଧୀମାନଙ୍କୁ ସାବଡ଼ କରିବା ପାଇଁ ପୋଲିସ ଏକ ବ୍ଲ୍ୟୁପ୍ରିଣ୍ଟ ପ୍ରସ୍ତୁତ କରିଛି। ବିଶେଷକରି ଜିଲାରେ ପୂଜା ସମୟରେ ଦଶହରା ମାମୁଲି, ଚାନ୍ଦା ନାଁରେ ଲୋକଙ୍କ ଠାରୁ ଜୋରଜବରଦସ୍ତ ବଟି ଆଦାୟ କରାଯାଇଥାଏ। ଏହା ବେଆଇନ ଅଟେ। ଯେଉଁ ବ୍ୟକ୍ତି ଏଭଳି କାର୍ଯ୍ୟରେ ଲିପ୍ତ ରହୁଥିବା ନେଇ ସୂଚନା ଆସିବ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ ପକ୍ଷରୁ କୁହାଯାଇଛି।
ଏଭଳି କୌଣସି ଖବର ପାଇଲେ ତୁରନ୍ତ ଡାଏଲ୍-୧୦୦/୧୧୨କୁ ଖବର କରିବା ସହିତ ଥାନାକୁ ଜଣାନ୍ତୁ। କୌଣସି ଅସାମାଜିକଙ୍କୁ ଭୟଭୀତ କରନ୍ତୁ ନାହିଁ। ନିର୍ଭୟ ହୋଇ ପୋଲିସକୁ ଖବର କରନ୍ତୁ। ସେହିପରି ପରମ୍ପରା ନାଁରେ ଚାଲିିଥିବା ଜୁଆଖେଳକୁ ମଧ୍ୟ ପ୍ରଶ୍ରୟ ଦିଆଯିବ ନାହିଁ। ଜୁଆଖେଳ ସମ୍ପର୍କରେ କୌଣସି ସୂଚନା ପାଇଲେ ତୁରନ୍ତ ପୋଲିସକୁ ସୂଚନା ଦିଅନ୍ତୁ। ପ୍ରତ୍ୟେକ ଥାନା ପୋଲିସ ପକ୍ଷରୁ ସହରର ପ୍ରବେଶ ପଥରେ ବ୍ଲକିଂ କରାଯାଉଛି। ସନ୍ଦେହଜନକ ଭାବେ ସହର ଭିତରକୁ ଆସୁଥିବା ଓ ବାହାରକୁ ଯାଉଥିବା ସମସ୍ତ ଯାନବାହନକୁ କଡାକଡି ଯାଞ୍ଚ କରାଯାଉଛି। ସେହିପରି ସମସ୍ତ ଜନସାଧାରଣ ଟ୍ରାଫିକ ନିୟମ ପାଳନ କରିବା ସହ ପୋଲିସକୁ ସହଯୋଗ କରିବାକୁ ଏସପି ପରାମର୍ଶ ଦେଇଛନ୍ତି।
ବିଶେଷକରି ସହରର ବିଭିନ୍ନ ସ୍ଥାନରେ ଅନୁଷ୍ଠିତ ପୂଜା ମଣ୍ଡପ କମିଟିମାନେ ପୂଜା ପେଣ୍ଡାଲରେ ସିସିଟିଭି ଲଗାଇବା ସହ ଭକ୍ତଙ୍କ ସୁରକ୍ଷା ପ୍ରତି ଅଧିକ ଧ୍ୟାନ ଦେବାକୁ ସେ ନିର୍ଦ୍ଦେଶ ଦେଇଛନ୍ତି। ସେହିପରି ପୂଜା ପେଣ୍ଡାଲ ନିକଟରେ ଯେପରି ପାର୍କିଂ ଓ ଟ୍ରାଫିକ ସମସ୍ୟା ସୃଷ୍ଟି ନ ହେବ ସେଥିପ୍ରତି ଦୃଷ୍ଟି ଦେବାକୁ ପୂଜା କମିଟିକୁ ନିର୍ଦ୍ଦେଶ ରହିଛି। ପାର୍ବଣ ସମୟରେ ଜନସାଧାରଣ ସତର୍କ ରହିବା ସହିତ ଆବଶ୍ୟକସ୍ଥଳେ ପୋଲିସର ସହାୟତା ନେଇପାରିବେ ବୋଲି ଏସ୍ପି ଏସପି ଡ. ଶ୍ରବଣା ବିବେକ ଏମ. କହିଛନ୍ତି।
