ଇନ୍ଦୋର,୧୩।୧୦: ଅନ୍ତର୍ଜାତୀୟ ଟି-୨୦ କ୍ରିକେଟ୍ରେ ନିଜ ବିସ୍ଫୋରକ ବ୍ୟାଟିଂରେ ନୂଆ ରେକର୍ଡ କରିଛନ୍ତି ଭାରତୀୟ ଓପନର୍ ଅଭିଷେକ ଶର୍ମା। ଗୋଟିଏ କ୍ୟାଲେଣ୍ଡର ବର୍ଷରେ ସର୍ବାଧିକ ଛକା ମାରିବା ତାଲିକାରେ ସେ ସୂର୍ଯ୍ୟକୁମାର ଯାଦବଙ୍କ ସମକକ୍ଷ ହୋଇଛନ୍ତି। ୨୦୨୬ରେ ଏଯାଏ ଅଭିଷେକ ୬୮ଟି ଛକା ମାରିଥିବା ବେଳେ, ସୂର୍ଯ୍ୟକୁମାର ୨୦୨୨ରେ ଏହି ସଂଖ୍ୟା ହାସଲ କରିଥିଲେ।
ଇନ୍ଦୋରରେ ୱେଷ୍ଟଇଣ୍ଡିଜ ବିପକ୍ଷ ତୃତୀୟ ଟି-୨୦ ମ୍ୟାଚ୍ରେ ଅଭିଷେକ ମାତ୍ର ୩୦ଟି ବଲ୍ରୁ ୬୯ ରନ୍ର ଦମ୍ଦାର ଇନିଂସ ଖେଳିଥିଲେ। ଏହି ପାଳିରେ ସେ ୬ଟି ଚୌକା ସହ ୫ଟି ଛକା ମାରିଥିଲେ। ତାଙ୍କ ଆକ୍ରମଣାତ୍ମକ ବ୍ୟାଟିଂ ଭାରତକୁ ଦ୍ରୁତ ଆରମ୍ଭ ଦେଇଥିଲା। ଏହି ପାଞ୍ଚଟି ଛକା ସହ ୨୦୨୬ରେ ତାଙ୍କ ମୋଟ ଛକା ସଂଖ୍ୟା ୬୮ରେ ପହଞ୍ଚିଛି। ଫଳରେ ଗୋଟିଏ କ୍ୟାଲେଣ୍ଡର ବର୍ଷରେ ଅନ୍ତର୍ଜାତୀୟ ଟି-୨୦ କ୍ରିକେଟ୍ରେ ସର୍ବାଧିକ ଛକା ମାରିବାର ରେକର୍ଡରେ ସେ ସୂର୍ଯ୍ୟକୁମାରଙ୍କ ସହ ମିଳିତ ଭାବେ ପ୍ରଥମ ସ୍ଥାନରେ ରହିଛନ୍ତି।
ଗୋଟିଏ ବର୍ଷରେ ସର୍ବାଧିକ ଛକା
– ୬୮ ଛକା ଅଭିଷେକ ଶର୍ମା (୨୦୨୬)
– ୬୮ ଛକା ସୂର୍ଯ୍ୟକୁମାର ଯାଦବ (୨୦୨୨)
– ୫୪ ଛକା ଅଭିଷେକ ଶର୍ମା (୨୦୨୫)
– ୫୨ ଛକା ଈଶାନ କିଶନ (୨୦୨୬)
– ୪୫ ଛକା ସାହିବଜାଦା ଫରହାନ (୨୦୨୫)
ଅଭିଷେକଙ୍କ ଏହି ସଫଳତାର ଆଉ ଏକ ବିଶେଷତ୍ୱ ରହିଛି। ସେ ୨୦୨୫ ଓ ୨୦୨୬ଦୁଇଟି କ୍ୟାଲେଣ୍ଡର ବର୍ଷରେ ୫୦ରୁ ଅଧିକ ଛକା ମାରିଛନ୍ତି। ଏହି ଫର୍ମାଟ୍ରେ ତାଙ୍କ ଆକ୍ରମଣାତ୍ମକ ବ୍ୟାଟିଂ ତାଙ୍କୁ ଅନ୍ୟ ବ୍ୟାଟରଙ୍କଠାରୁ ସ୍ବତନ୍ତ୍ର କରିଛି।
ଅନ୍ତର୍ଜାତୀୟ ଟି-୨୦ରେ ଭାରତ ପାଇଁ ସର୍ବାଧିକ ଛକା ମାରିଥିବା ବ୍ୟାଟରଙ୍କ ତାଲିକାରେ ରୋହିତ ଶର୍ମା ଓ ସୂର୍ଯ୍ୟକୁମାର ଯାଦବଙ୍କ ପରେ ଅଭିଷେକ ତୃତୀୟ ସ୍ଥାନରେ ରହିଛନ୍ତି। ତାଙ୍କ ବ୍ୟାଟ୍ରୁ ଏଯାଏ ଏହି ଫର୍ମାଟ୍ରେ ୧୪୧ଟି ଛକା ବାହାରିଛି। ଏହି ରେକର୍ଡ ଅଭିଷେକଙ୍କ ବଢ଼ୁଥିବା ପ୍ରଭାବ ଓ ଆକ୍ରମଣାତ୍ମକ ଖେଳର ଆଉ ଏକ ପ୍ରମାଣ।
Dharitri – Odisha’s No.1 Odia Daily
