ଲାଞ୍ଜିଗଡ, ୨୯।୧(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ ଥାନା ଅନ୍ତର୍ଗତ ବସନ୍ତପଡା ଗ୍ରାମ ବୁଲାଣିରେ ଏକ ଅଜଣା ଗାଡି ଚାପାରେ ଜଣେ ମହିଳାଙ୍କ ମୃତ୍ୟୁ ଘଟିଛି । ମୃତକ ମହିଳା ଜଣକ ଡେଙ୍ଗସର୍ଗି ଗାଁର ବୃକୁଳି ମାଝୀ (୪୦) ବୋଲି ଜଣା ପଡିଛି ।
ସୂଚନାନୁସାରେ ଲାଞ୍ଜିଗଡରୁ ମୁନିଗୁଡାକୁ ସଂଯୋଗ କରୁଥିବା ମୁଖ୍ୟ ରାସ୍ତାର ବସନ୍ତପଡା ଗ୍ରାମ ମୁଣ୍ଡରେ ଥିବା ବୁଲାଣିରେ ସା ୭ ଘଣ୍ଟା ସମୟରେ ବୃକୁଳି ମାଝୀ ନିଜ ଘରକୁ ଯାଉଥିବା ସମୟରେ ଏକ ଗାଡି ତାଙ୍କୁ ଧକ୍କା ଦେଇଛି। ମହିଳା ଜଣକ ନିଜ ବାପଘର ବସନ୍ତପଡା ଗାଁ ଠାରୁ ନିଜ ଶାଶୁଘର ଡେଙ୍ଗସର୍ଗି ଗାଁ ଯିବା ସମୟରେ ବସନ୍ତପଡା ବୁଲାଣିରେ ଏହି ଦୁର୍ଘଟଣା ଘଟିଛି । ମୃତ ମହିଳାଙ୍କ ସ୍ବାମୀ ସ୍ବର୍ଗତ ସନ୍ୟାସୀ ମାଝୀଙ୍କ ୫ ବର୍ଷ ପୂର୍ବରୁ ମୃତ୍ୟୁ ଘଟିଥିବା ବେଳେ ତାଙ୍କର ୪ ପୁଅ ଓ ୨ ଝିଅକୁ ନେଇ ମହିଳା ଜଣକ ଦିନ ମଜୁରିଆ ଭାବେ କାମକରି ପରିବାର ପ୍ରତିପୋଷଣ କରୁଥିଲେ । ବର୍ତ୍ତମାନ ଏହି ୬ ଗୋଟି ସନ୍ତାନ ବାପା ମା’ ଛେଉଣ୍ଡ ହୋଇପଡିଛନ୍ତି । ଘଟଣା ସ୍ଥଳରେ ମହିଳାଙ୍କ ମୃତଦେହ ପଡି ରହିଥିବା ବେଳେ ସ୍ଥାନୀୟ ଲୋକଙ୍କ ଉତ୍ତେଜନା ଦେଖାଦେଇଛି । ଖବର ପାଇ ଲାଞ୍ଜିଗଡ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଜାରି ରଖିଛି ।
