ରେମୁଣା, ୫ା୧୦(ଡି.ଏନ.ଏ.): ବାଲେଶ୍ୱର ଜିଲା ରେମୁଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଅବ୍ୟବସ୍ଥା ନେଇ ଶୁକ୍ରବାର ବିଳମ୍ବିତ ରାତିରେ ରୋଗୀଙ୍କ ସମ୍ପର୍କୀୟମାନେ ଡାକ୍ତରଖାନାରେ ଭଙ୍ଗାରୁଜା କରିଛନ୍ତି। ଉତ୍ତ୍ୟକ୍ତ ଲୋକେ ଡାକ୍ତରଖାନାରେ ଲାଗିଥିବା ସିସି କ୍ୟାମେରା ଭାଙ୍ଗିବା ସହ ଆଉଟଡୋରକୁ ତାଲା ପକାଇ ଦେଇଥିଲେ। ଆଇଆଇସି ଶୁଭ୍ରାଂଶୁ ଶେଖର ନାୟକ ପହଞ୍ଚି ପରିସ୍ଥିତିକୁ ଆୟତ୍ତ କରିବା ପାଇଁ ୧ ପ୍ଲାଟୁନ ପୋଲିସ ଫୋର୍ସ ମୁତୟନ କରିଛନ୍ତି। ଶନିବାର ସକାଳେ ସବ୍ଇନ୍ସପେକ୍ଟର ନଗରଦୀପ ସେଠୀଙ୍କ ନେତୃତ୍ୱରେ ଘଟଣାର ତଦନ୍ତ କରାଯାଇଛି। ସିଡିଏମ୍ଓଙ୍କ ନିର୍ଦ୍ଦେଶରେ ଡାକ୍ତର ଶାନ୍ତିଲତା ଗିଡ଼ି ଅସ୍ଥାୟୀ ଭାବେ ଷ୍ଟୋର ରୁମ୍ରେ ଆଉଟଡୋର ଖୋଲି ରୋଗୀଙ୍କୁ ଚିକିତ୍ସା କରିଛନ୍ତି। ମଧ୍ୟାହ୍ନରେ ପରିସ୍ଥିତି ସ୍ବାଭାବିକ ହୋଇଛି। ଏଭଳି ଅବ୍ୟବସ୍ଥା ପ୍ରତିବାଦରେ ଆସନ୍ତା ୧୬ତାରିଖରେ ରେମୁଣା ବ୍ୟବସାୟ ସଂଘ ପକ୍ଷରୁ ଆନ୍ଦୋଳନ କରାଯିବ ବୋଲି ସଂଘ ସଭାପତି ଭରତ ଚନ୍ଦ୍ର ପୋଥାଳ ଚେତାବନୀ ଦେଇଛନ୍ତି।
ରେମୁଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଘୋଷଣା ହେବା ପରେ ମଧ୍ୟ ଅବସ୍ଥାରେ ସୁଧାର ଆସିନି। ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଯେତିକି ଡାକ୍ତର ରହିବା କଥା ଏଠାରେ ରହୁନାହାନ୍ତି। ସବୁ ସମୟରେ ଜିଲା ମୁଖ୍ୟ ଡାକ୍ତରଖାନାରୁ ଡାକ୍ତର ଡେପୁଟେଶନରେ ଆସୁଛନ୍ତି। ସ୍ଥାୟୀ ଡାକ୍ତର ଭାବେ ଡା. ରାମଚନ୍ଦ୍ର କିସ୍କୁ ବର୍ଷେ ହେଲା ନିଯୁକ୍ତି ହେବା ପରେ ଜିଲାରୁ ଡେପୁଟେଶନ ବନ୍ଦ ହୋଇଯାଇଛି। ଫଳରେ ଦିନରାତି ସେ କାର୍ଯ୍ୟ କରୁଛନ୍ତି। ଏଥିପାଇଁ ଡାକ୍ତର କିସ୍କୁ ଦିନରାତି ଡ୍ୟୁଟି କରିବା ସମ୍ଭବ ନୁହେଁ ବୋଲି ୩ଦିନ ପାଇଁ ଛୁଟିରେ ଯାଇ ଛୁଟି ସମ୍ପ୍ରସାରଣ କରି କରିଚାଲିଛନ୍ତି। ଚଳିତମାସ ପହିଲାଠାରୁ ରାତିରେ କାୈଣସି ଡାକ୍ତର ଡ୍ୟୁଟି କରୁ ନ ଥିବାରୁ ଲୋକେ ନାହଁି ନ ଥିବା ଅସୁବିଧା ଭୋଗୁଛନ୍ତି। ଏପରିକି ଗତ ୨ତାରିଖ ରାତିରେ ଅଠାନ୍ତର ଗାଁର ହରିଦାସ ଉଚ୍ଚ ରକ୍ତଚାପରେ ପୀଡ଼ିତ ହୋଇ ଚିକିତ୍ସା ହେବାକୁ ଆସି ଡାକ୍ତର ନ ଥିବାରୁ ମୃତ୍ୟୁବରଣ କରିଥିଲେ। ସେହିପରି ଶୁକ୍ରବାର ରାତି ୧୧ଟା ବେଳେ ମନ୍ଦାରପୁରର ଲମ୍ବୋଦର ଦାସ ଛାତିରେ ଯନ୍ତ୍ରଣାରେ ଛଟପଟ ହେଉଥିବା ବେଳେ ଡାକ୍ତରଖାନା ଆସିଥିଲେ। ହେଲେ ଡାକ୍ତରଖାନାରେ ଡାକ୍ତର ନ ଥିବାରୁ ଉତ୍ତେଜନା ପ୍ରକାଶ ପାଇଥିଲା। ପରିସ୍ଥିତି ଅଣାୟତ୍ତ ହୋଇପଡିଥିଲା।
