ନୂଆଦିଲ୍ଲୀ,୨୪।୯: ଅନ୍ତର୍ଜାତୀୟ ଚାପ ଯୋଗୁ ଆତଙ୍କବାଦୀ ସଂଗଠନ ଜୈଶ୍-ଇ-ମହମ୍ମଦ୍ ଏହାର ନାମ ପରିବର୍ତ୍ତନ କରିଛି। ମାସୁଦ୍ ଅଝାରଙ୍କ ଭାଇ ଅବଦୁଲ୍ ରଉଫ୍ ଅସଗର ସଂଗଠନର ଦାୟିତ୍ୱ ନେବାପରେ ଏହାର ନାମ ପରିବର୍ତ୍ତନ କରି ମଜଲିସ୍ ଓ୍ବରସା-ଇ-ଶୁହୁଦା ଜମ୍ମୁ ଓ୍ବା କଶ୍ମୀର ରଖାଯାଇଛି। ସଂଗଠନର ନାମ ପରିବର୍ତ୍ତନ ହୋଇଥିଲେ ମଧ୍ୟ କ୍ୟାଡ଼ରରେ କୌଣସି ଅଦଳବଦଳ କରାଯାଇନାହିଁ। ସୂଚନାଯୋଗ୍ୟ, ଅସଗରଙ୍କ ନେତୃତ୍ୱରେ ପାକିସ୍ତାନ ବାଲାକୋଟରେ ପୁଣି ଜୈଶ୍ ସଦସ୍ୟଙ୍କୁ ତାଲିମ୍ ଦିଆଯିବା ଆରମ୍ଭ ହୋଇଛି। ଭାରତରେ ବଡ଼ ଧରଣର ଆତଙ୍କବାଦୀ ଆକ୍ରମଣ ପାଇଁ ଷଡ଼ଯନ୍ତ୍ର ହେଉଥିବା ଭାରତୀୟ ଗୋଇନ୍ଦା ବିଭାଗ ରିପୋର୍ଟରେ ମଧ୍ୟ ସତର୍କ ସୂଚନା ପ୍ରକାଶ ପାଇଛି। ଏହାକୁ ଦୃଷ୍ଟିରେ ରଖି ନିୟନ୍ତ୍ରଣ ରେଖାଠାରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି।
